Salmu
Pa diretor di múzika. Pa toka na ton di múzika di jitite.* Un múzika di kes fidju di Korá.
84 Ó Jeová di izérsitu,
Fórti kel lugar ki bu ta mora é bunitu!*
2 Tudu kel ki mi é*
Sta ku gana di bai pa kes pátiu di kaza di Jeová.
Sin, N perde forsa sô pamodi vontadi di bai.
Di tudu nha korason i di tudu nha alma, N ta grita di alegria pa kel Deus bibu.
3 Ó Jeová di izérsitu, nha Rei i nha Deus,
Ti pasu ta atxa un kaza la
I andorinha un ninhu pa el,
Undi el ta kuida di ses fidju, pértu di bu grandiozu altar,
Kel lugar ki bu ta mora.
4 Filís é kes ki ta mora na bu kaza
Es ta sta sénpri ta lova-u. (Selá)
5 Filís é kes ómi ki ta atxa ses forsa na bo,
Kes ki ses korason ta krê anda na kaminhu pa bu kaza.
6 Óras ki es ta pasa na vali di Baka,*
Es ta bira-l un lugar xeiu di fonti di agu
I kes primeru txuba ta kubri-l* di benson.
7 Es ta anda kada bês ku más forsa.
Kada un di es ta fika dianti di Deus na Sion.
8 Ó Jeová di izérsitu, obi nha orason,
Ó Deus di Jakó, obi-m. (Selá)
9 Ó nos skudu i nos Deus, odja.*
Odja pa róstu di kel ki bu skodje.
10 Pamodi un dia na bus pátiu é midjór di ki mil na kalker otu lugar!
N skodje fika di pé na pórta di kaza di nha Deus,
Envês di mora na kes ténda di maldadi.
11 Pamodi Jeová Deus é sol i skudu,
El ta mostra bondadi i el ta da ónra.
Jeová ka ta nega nada di bon
Pa kes algen ki é lial.
12 Ó Jeová di izérsitu,
Filís é kel ómi ki ta kunfia na bo.