Salmu
KUARTU LIVRU
(Salmus 90-106)
Orason di Muizés, kel ómi di Deus verdaderu.
90 Ó Jeová, bo é nos lugar di proteson* pa tudu jerason.
2 Bu izisti antis di montanha nase,
Antis di bu kria téra* i txon ki ta da kumida,
Di tudu ténpu pa tudu ténpu, abo é Deus.
3 Bu ta poi ómi ta volta pa téra.
Bu ta fla-s: “Fidjus di ómi, nhos volta pa téra.”
4 Pa bo, mil anu é sima onti ki pasa,
Sima alguns óra di noti.*
5 Bu ta kaba ku es dirapenti. Es é sima un sinplis sónu.
Di palmanhan es é sima rélva ki ta nase.
6 Di palmanhan es ta kria i es ta bira txeu,
Má di noti es ta murutxa i es ta seka.
7 Pamodi bu raiba ta kaba ku nos
I nu ta fika ku txeu medu pamodi bu fúria.
8 Bu ta poi nos éru bu dianti.*
Bu ta pode odja klaru kes kuza ki nu ta faze sukundidu.
9 Nos dia* ta kaba pamodi bu raiba,
I nos anu ta kaba sima un folgu.
10 Nos vida ta dura 70 anu,
Ô 80 anu pa kes ki é más fórti.*
Má kes anu li sta xeiu di difikuldadi i tristéza.
Es ta pasa faxi i nu ta dizaparse.
11 Ken ki pode intende forsa di bu raiba?
Bu raiba é grandi dimás sima kel grandi ruspetu ki bu merese.
12 Inxina-nu modi ki nu ta konta nos dia
Pa nu pode ten un korason ki ten sabedoria.
13 Ó Jeová, ben! Ti ki ténpu kel-li ta dura?
Ten péna di bu sérvu.
14 Di palmanhan, mostra-nu bu amor lial,
Pa nu pode grita di alegria i pa nu fika kontenti duránti tudu nos vida.*
15 Da-nu txeu alegria sima kes txeu dia ki bu pô-nu ta sufri,
Txeu anu di alegria sima kes anu di difikuldadi.
16 Pa bus sérvu odja kes kuza bon ki bu ta faze,
I pa ses fidju odja bu grandi puder.
17 Jeová, nos Deus, abensua-nu.
Poi kes kuza ki nu ta faze ta kóre dretu.*
Sin, pa es kóre dretu.