Salmu
Un múzika.
98 Nhos kanta un kántiku novu pa Jeová,
Pamodi el faze kuzas rei di bunitu.
El salva se povu* ku se mô direita, ku se brasu santu.
2 Jeová dexa pesoas sabe ma el ta da salvason.
Dianti di nasons, el mostra se justisa.
3 El lenbra di se amor lial i di se lialdadi ki el mostra pa kes disendenti di Israel.
Tudu algen na téra odja modi ki nos Deus salva-nu.*
4 Pa téra interu da un gritu di vitória pa lova Jeová.
Nhos fika kontenti, nhos grita di alegria i nhos kanta lovor.*
5 Nhos kanta lovor pa Jeová ku arpa,
Ku arpa i ku un kántiku bunitu.
6 Nhos da gritu di vitória dianti di Jeová, nos Rei,
Ku tronbéta i ku son di buzina.
7 Pa mar i tudu kuza ki ten na el grita di alegria,
Pa téra* i tudu kes ki ta mora na el tanbê grita di alegria.
8 Pa riu da palmu,
Pa montanhas grita di alegria tudu djuntu
9 Dianti di Jeová, pamodi el sta ben* julga téra.
El ta ben julga téra interu ku justisa
I kes povu di manera justu.