Salmu
Kántiku. Un múzika di Davidi.
108 Ó Deus, nha korason é fiel pa bo.
N ta ben toka i N ta kanta lovor ku tudu kel ki mi é.*
2 N krê toka arpa i otus instrumentu di kórda.
N ta ben labanta sédu antis di sol sai.
3 Ó Jeová, N ta ben lova-u na meiu di povu,
I N ta ben kanta pa N lova-u* na meiu di nason.
4 Pamodi bu amor lial é grandi, el ta txiga ti séu,
I bu lialdadi ta txiga ti núvens.
5 Ó Deus, mostra modi ki bo é grandi na séu.
Pa bu glória sta riba di téra interu.
6 Pa kes ki bu ta ama libradu,
Salva-nu ku bu mô direita i responde-m.
7 Deus santu pâpia.* El fla:
“Ku alegria, N ta ben dividi Sikén pa ken ki N krê,
N ta ben midi vali* di Sukote pa N da nha povu.
8 Jiliade é di meu i Manasés tanbê,
I Efrain é kapaseti* di nha kabésa.
Judá é nha vara ki N ta uza pa N governa.
9 Moabe é kel basia ki N ta laba na el.
N ta ben bota nha sandália riba di Edon.
N ta ben kanta vitória pamodi N vense Filístia.”
10 Ken ki ta ben leba-m pa kel sidadi ki ten muralhas fórti?
Ken ki ta ben gia-m ti Edon?
11 Ó Deus, é ka bo mê ki nega-nu?
Nos Deus ka sta kunpanha nos trópa más.
12 Djuda-nu na nos frónta,
Pamodi ka bale péna spera pa salvason di ómi.
13 Deus ta ben da-nu forsa
I el ta ben piza nos inimigu.