Salmu
115 Nu ka merese nada, ó Jeová, nu ka merese nada,*
Má é bu nómi ki merese glória
Pamodi abo é un Deus di amor lial i fiel.
2 Pamodi ki kes nason tinha ki flaba:
“Undi ses Deus sta?”
3 Nos Deus sta na séu.
El ta faze tudu kel ki el krê.
4 Ses imajen é di prata i oru,
É mô di ómi ki faze-s.
5 Es ten bóka, má es ka ta pode pâpia.
Es ten odju, má es ka ta pode odja.
6 Es ten orédja, má es ka ta pode obi.
Es ten narís, má es ka ta pode txera.
7 Es ten mô, má es ka ta pode palpa.
Es ten pé, má es ka ta pode anda.
Es ka ta pode faze ninhun son ku ses garganta.
8 Kes algen ki ta faze-s ta ben bira sima es,
I tanbê tudu kes ki ta kunfia na es.
9 Ó Israel, kunfia na Jeová.
El é bu ajuda i bu skudu.
10 Ó disendentis di Aron, nhos kunfia na Jeová.
El é nhos ajuda i nhos skudu.
11 Nhos ki ten grandi ruspetu pa Jeová, nhos kunfia na Jeová.
El é nhos ajuda i nhos skudu.
12 Jeová ta lenbra di nos i el ta ben abensua-nu.
El ta ben abênsua kes disendenti di Israel.
El ta ben abênsua kes disendenti di Aron.
13 Jeová ta ben abênsua kes ki ten grandi ruspetu pa el,
Kes pikinoti i tanbê kes grandi.
14 Jeová ta ben poi anhos i nhos fidju*
Ta bira más txeu.
15 Pa Jeová, Kel ki faze séu ku téra,
Abênsua nhos.
16 Séu é di Jeová,
Má téra, el da-l pa kes fidju di ómi.
17 Algen mortu ka ta lova Jeová.
Nen kes ki ta dixi pa silénsiu di mórti.
18 Má nos, nu ta lova Jeová,
Gósi i pa tudu ténpu.
Nhos lova Jeová!*