Salmu
Un múzika di Davidi.
143 Ó Jeová, obi nha orason.
Obi nha pididu di ajuda.
Responde-m, pamodi abo é fiel i justu.
2 Ami é bu sérvu,
Ka bu julga-m, pamodi ningen ka pode ser justu bu dianti.
El obriga-m mora na sukuru, sima kes algen ki dja ten txeu ténpu ki móre.
4 Nha forsa* sta ta kaba.
Nha korason ka sta xinti más nada.
5 N ta lenbra di kes ténpu antigu,
N ta midita na tudu kel ki dja bu faze.
N gosta di pensa na* trabadju di bu mô.
6 N ta labanta nha mô pa bo.
Ami é sima un téra séku ki tene sedi di bo. (Selá)
7 Ó Jeová, responde-m faxi.
N ka tene forsa más.
Ka bu sukundi bu róstu di mi,
Sinon N ta ser sima kes algen ki sta ta dixi pa kóba.*
8 Mostra-m bu amor lial di palmanhan,
Pamodi N ta kunfia na bo.
Mostra-m modi ki N debe vive,
Pamodi N ta djobe orientason na bo.*
9 Ó Jeová, libra-m di nhas inimigu.
N ta djobe proteson na bo.
10 Inxina-m faze bu vontadi,
Pamodi bo é nha Deus.
11 Ó Jeová, mante-m bibu, pamodi bu nómi.
Libra-m di frónta, pamodi abo é justu.
12 Pamodi bu amor lial, kaba ku* nhas inimigu.
Distrui tudu kes algen ki ta ataka-m,
Pamodi ami é bu sérvu.