Salmu
146 Nhos lova Jeová!*
Pa tudu kel ki mi é* lova Jeová.
2 N ta ben lova Jeová pa tudu ténpu di nha vida.
N ta ben kanta lovor* pa nha Deus timenti N sta bibu.
3 Ka nhos kunfia na kes prínsipi*
Nen na kes fidju di ómi, ki ka ta pode traze salvason.
4 Óras ki el para di da folgu,* el ta volta pa téra.
Na kel dia mê, el ta para di pensa.
5 Filís é kel algen ki ten Deus di Jakó pa djuda-l,
Ki ta poi se speransa na Jeová, se Deus,
6 Kel ki faze séu ku téra,
Mar i tudu kuza ki ten na es,
Kel ki é sénpri fiel,
7 Kel ki ta faze justisa pa kes algen ki ta sploradu,
I kel ki ta da pon pa kes ki sta ku fómi.
Jeová ta liberta kes algen ki sta prézu.*
8 Jeová ta abri odju di kes algen ségu.
Jeová ta labanta kes ki sta xeiu di prubléma.
Jeová ta ama kes algen justu.
9 Jeová ta proteje kes stranjeru.
El ta kuida di kes mininu ki ka ten pai* i di kes viúva.
Má el ta straga planu* di kes algen mau.
10 Jeová ta ben ser Rei pa tudu ténpu.
Ó Sion, bu Deus ta ben governa di jerason pa jerason.
Nhos lova Jeová!