Salmu
147 Nhos lova Jeová!*
É bon kanta lovor* pa nos Deus.
É sábi i bon lova-l!
2 Jeová sta ta faze Jiruzalen.
El sta ta djunta kes israelita ki sta spadjadu.
3 El ta konsola* kes algen ki tene korason maguadu.
El ta poi liga na ses frida.
4 El sabe kantu stréla ki ten.
I el ta txoma tudu es pa ses nómi.
5 Nos Sinhor é grandi i el ten txeu puder.
Se sabedoria* ka ten limiti.
6 Jeová ta labanta kes algen mansu,
Má el ta bota kes algen mau na txon.
7 Nhos kanta pa agradese Jeová.
Nhos kanta lovor pa nos Deus ku arpa.
8 El ta kubri séu ku núven,
El ta poi txuba ta kai na téra,
I el ta poi padja ta kria na montanha.
9 El ta da animal kumida,
I el ta da kes fidju di korvu kumida óras ki es ta grita di fómi.
10 El ka ta fika dimiradu ku forsa di kabalu,
Nen ku forsa* di algen.
11 Jeová gosta di kes algen ki ten grandi ruspetu pa el,
Di kes ki ta poi speransa na se amor lial.
12 Ó Jiruzalen, da Jeová glória.
Ó Sion, lova bu Deus.
13 El ta reforsa kes tranka di bus porton.
El ta abênsua bus fidju.
14 El ta traze pas pa bu tiritóriu.
El ta da-u kel midjór* trigu avontádi.
15 El ta da téra órdi.
Se palavra ta txiga faxi.
16 El ta poi névi ta kai sima lan.
El ta spadja jiada sima sinza.
17 El ta bota se granizu* pa baxu sima padás di pon.
Ken ki ta pode aguenta se friu?
18 El ta da órdi i es ta derete.
El ta poi béntu ta sopra i kes agu ta kóre.
19 El ta fla Jakó se palavra,
Ses lei i ses julgamentu pa Israel.
20 El ka faze kel-li ku ninhun otu nason.
Es ka sabe nada sobri ses lei.
Nhos lova Jeová!