Salmu
Salmu di Davidi.
27 Jeová é nha lus i nha salvason.
Di kenha ki N ta xinti medu?
Jeová ta proteje nha vida.
Ken ki ta pô-m ta treme di medu?
2 Kantu kes algen mau ataka-m pa kaba ku mi,
É nhas inimigu i kes ki staba kóntra mi ki tropesa i kai.
3 Sikrê un izérsitu arma ses ténda pa es ataka-m,
Nha korason ka ta ben xinti medu.
Sikrê es ben briga kóntra mi,
Simé N ta kontinua ku kunfiansa.
4 Un kuza N pidi Jeová
I é kel-li ki N ta dizeja:
Mora na kaza di Jeová tudu dia di nha vida,
Pa N para i odja bondadi* di Jeová
I pa N odja ku adimirason pa se ténplu.*
5 Pamodi na dia di disgrasa, el ta proteje-m na se lugar di sukundi.
El ta sukundi-m na se ténda
I el ta pô-m riba di un rótxa altu.
6 Gósi, N vense nhas inimigu ki ta serka-m.
N ta ben oferese sakrifisius ku gritu di alegria na se ténda.
N ta ben kanta lovor* pa Jeová.
7 Ó Jeová, obi-m óras ki N ta grita ta pidi ajuda.
Ten péna di mi i responde-m.
8 Na nha korason N ta lenbra di kuzê ki bu fla:
“Nhos djobe modi ki nhos ta agrada-m.”*
Ó Jeová, N ta djobe manera di agrada-u.
9 Ka bu sukundi bu róstu di mi.
Ka bu nega bu sérvu pamodi bu raiba.
Abo é kel ki ta djuda-m.
Ka bu bandona-m nen ka bu dexa-m, ó Deus di nha salvason.
10 Sikrê nha pai ku nha mai bandona-m,
Jeová ta resebe-m.
11 Ó Jeová, inxina-m anda na bu kaminhu,
Gia-m na kaminhu di justisa pamodi nhas inimigu.
12 Ka bu intrega-m na mô di nhas inimigu,*
Pamodi tistimunhas falsu dja labanta kóntra mi,
I es sta ta amiasa-m ku violénsia.
13 Kuzê ki ta sérba di mi si N ka tinha fé,
Ma N ta odjaba bondadi di Jeová timenti N sta ku vida?*
14 Poi bu speransa na Jeová.
Ten koraji i ten un korason fórti.
Sin, poi bu speransa na Jeová.