LISON 13
Modi ki relijion falsu ta afasta pesoas di Deus?
Si Deus é amor, pamodi ki relijions dja faze txeu kuza mariadu na se nómi? É pamodi kes relijion é falsu. Kuzas ki es ta fla i ki es ta faze ta poi pesoas ta pensa kuzas mariadu sobri Deus. Modi ki es ta faze kel-la? Modi ki Deus ta xinti? Kuzê ki el ta ben faze?
1. Modi ki kes kuza ki relijion falsu ta inxina ta afasta pesoas di Deus?
Relijion falsu ‘troka verdadi di Deus pa mintira’. (Romanos 1:25) Pur izénplu, kuazi tudu relijion ka ta inxina ses sigidoris nómi di Deus. Má, Bíblia ta fla ma nu debe uza nómi di Deus. (Romanos 10:13, 14) Alguns xéfi di relijion ta fla ma óras ki ta kontise un disgrasa, é pamodi vontadi di Deus. Má kel-li é mintira. Deus nunka é ka kulpadu pa kes kuza mariadu ki ta kontise. (Lé Tiago 1:13.) Má mintiras ki relijions ta konta ta poi pesoas ta afasta di Deus.
2. Modi ki kes kuza ki relijion falsu ta faze ta afasta pesoas di Deus?
Relijion falsu ka ta trata pesoas sima Jeová ta trata. Bíblia ta fla ma pekadus di relijion falsu ‘dja djunta ti ki txiga na Séu’. (Apocalipse 18:5) Dja ten un monti anu ki relijions sta ta mete na pulítika, ta apoia géras i es é kulpadu pa mórti di un monti algen. Alguns xéfi di relijion krê ser riku, pur isu es ta pidi ses sigidoris dinheru. Tudu kes kuza li ta prova ma es ka konxe Deus i nen es ka ten direitu di faze kuzas na se nómi. — Lé 1 João 4:8.
3. Kuzê ki Deus ta atxa di relijion falsu?
Si kes kuza ki relijion falsu ta faze ta pô-u xatiadu, modi ki bu ta atxa ma Jeová ta xinti? El ta ama pesoas, má el sta xatiadu ku xéfis di relijion ki ta konta mintira sobri el i ki ta maltrata ses sigidoris. El ta promete ma relijion falsu ta ben distruídu i ‘nunka más el ka ta atxadu.’ (Apocalipse 18:21) Ka ta dura, Deus ta ben kaba ku tudu relijion falsu. — Apocalipse 18:8.
SABE MÁS
Nu ben odja (1) kuzê más ki Deus ta atxa di relijion falsu, (2) otus kuza ki relijion falsu dja faze i (3) pamodi ki bu ka debe dexa kes kuza ki relijions ta faze inpidi-u di konxe Jeová.
4. Deus ka ta seta tudu relijion
Txeu algen ta kridita ma relijions é sima kaminhus diferenti ki ta leba pa Deus. Má kel-li é verdadi? Lé Mateus 7:13, 14, i dipôs pâpia sobri kel pergunta li:
Kuzê ki Bíblia ta fla sobri kaminhu ki ta leba pa vida?
Odja VÍDIU, i dipôs pâpia sobri kel pergunta li:
Bíblia ta fla ma ten txeu relijion ki ta agrada Deus?
5. Relijion falsu ka ta mostra amor di Deus
Relijion falsu ta afasta pesoas di Deus di un monti manera. Un di kes manera é pamodi es ta mete na géra. Nu ben odja un izénplu. Odja VÍDIU. Dipôs pâpia sobri kes pergunta li:
Kuzê ki txeu igreja faze na Sugundu Géra na Mundu Interu?
Kuzê ki bu ta atxa di kuzas ki es faze?
Lé João 13:34, 35 i 17:16. Dipôs pâpia sobri kes pergunta li:
Modi ki bu ta atxa ma Jeová ta xinti óras ki relijions ta mete na géra?
Relijion falsu é kulpadu pa txeu kuza mariadu. Kuzê ki dja bu odja relijions ta faze ki ta prova ma es ka ta mostra amor di Deus?
Relijion falsu ka ta mostra amor di Deus
6. Deus krê djuda pesoas sai di relijion falsu
Lé Apocalipse 18:4,a i dipôs pâpia sobri kel pergunta li:
Modi ki bu ta xinti di sabe ma Deus krê djuda kes algen ki relijion falsu sta ta ngana?
7. Kontinua ta prende sobri Deus verdaderu
Kes kuza mariadu ki relijion falsu ta faze debe afasta-u di Deus? Imajina un fidju ki ta nega obi ku se pai, el ta sai di kaza i el ta faze kuzas mariadu. Kel pai ka ta fika kontenti ku kuzas ki se fidju sta ta faze. Pamodi ki ka ta sérba justu kulpa kel pai pa manera ki se fidju sta ta vive?
Ta sérba justu kulpa Jeová i para di prende sobri el pamodi kuzas ki relijions sta ta faze?
ALGUNS ALGEN TA FLA: “N ka sta interesadu na relijion, pamodi relijion é kulpadu pa txeu prubléma ki sta na mundu.”
É si ki bu ta pensa?
Pamodi ki kuzas ki relijion falsu ta faze ka debe afasta-nu di Jeová?
REZUMU
Relijion falsu ta afasta pesoas di Deus pamodi es ta inxina kuzas falsu i es ta faze txeu kuza mariadu. Deus ta ben kaba ku relijion falsu.
Perguntas di rezumu
Kuzê ki bu ta atxa di kuzas ki relijion falsu ta inxina i di kuzas ki es ta faze?
Kuzê ki Jeová ta atxa di relijion falsu?
Kuzê ki Deus ta ben faze ku relijion falsu?
DJOBE MÁS
Odja dôs kuza ki kuazi tudu relijion ta faze ki ka ta agrada Deus.
“Tudu relijion é igual? Tudu relijion ta leba-nu pa Deus?” (Artigu na jw.org)
Pamodi ki Jeová krê pa nu adora-l djuntu ku otus algen?
Un padri ka staba kontenti ku se relijion. Má kel-li ka inpidi-l di prende verdadi sobri Deus.
“Pamodi ki un padri bandona igreja” (Nhos korda!, febreru di 2015)
Dja ten txeu anu ki relijions sta ta konta mintira sobri Deus. Es ta poi pesoas ta kridita ma Deus ka ta preokupa ku nos i ma el é kruel. Prende verdadi sobri três di kes mintira.
“Mintiras ki ka ta dexa pesoas ama Deus” (Sentinéla, 1 di novenbru di 2013)
a Bíblia ta konpara relijion falsu ku un mudjer ki ta txomadu di Babilónia Grandi. Pa bu sabe pamodi, djobe párti PRENDE MÁS nu 1.