LISON 14
Modi ki nu pode adora Deus sima el ta krê?
Sima nu prende na kel otu lison, é ka tudu relijion ki ta agrada Deus. Má, nu pode adora nos Kriador di un manera ki ta dexa-l kontenti. Ki ‘tipu di adorason [ô, relijion]’ ki ta agrada-l? (Tiago 1:27, nóta di rodapé) Odja kuzê ki Bíblia ta inxina.
1. Modi ki nu ta prende adora Deus sima el ta krê?
Bíblia ta inxina-nu modi ki nu debe adora Deus. Jizus fla Deus: ‘Bu palavra é verdadi.’ (João 17:17) Alguns relijion envês di sigi kuzê ki Bíblia ta inxina, es ta sigi ensinus i tradisons di ómi. Má, Jeová ka sta kontenti ku kes algen ki ‘ta poi di ladu se mandamentu’. (Lé Marcos 7:9.) Nu ta poi korason di Deus ta fika kontenti óras ki nu ta vive di akordu ku Bíblia i nu ta sigi se konsedjus.
2. Modi ki nu debe adora Jeová?
Jeová, ki é nos Kriador, merese pa nu adora-l sô el. (Apocalipse 4:11) Kel-li krê fla ma nu debe ama-l i ka uza ninhun tipu di imaji pa adora-l. — Lé Isaías 42:8.
Nos adorason pa Jeová debe ser ‘santu i ki el ta seta’. (Romanos 12:1) Kel-li krê fla ma nu meste obi ku se leis. Pur izénplu, kes algen ki ta ama Jeová ta sigi se leis sobri kazamentu. Tanbê es ta ivita kuzas ki ta prujudika-s, sima tabaku, siré, drógas ô bebe dimás.a
3. Pamodi ki nu debe adora Jeová djuntu ku nos irmons?
Kes runion ki nu ta faze tudu simana ta da-nu xansi di ‘lova Jeová na kongregason.’ (Salmo 111:1, 2) Un di kes manera ki nu ta faze kel-li é óras ki nu ta kanta pa lova Deus. (Lé Salmo 104:33.) Jeová ta pidi-nu pa nu sisti runions pamodi el ta ama-nu i el sabe ma kes runion ta djuda-nu vive filís pa tudu ténpu. Na runions, nu ta nkoraja otus i es ta nkoraja-nu tanbê.
SABE MÁS
Odja pamodi ki Jeová ka ta seta pa nu uza imaji na adorason. Prende maneras inportanti ki nu pode lova Deus.
4. Nu ka debe uza imaji pa adora Deus
Modi ki nu sabe ma Deus ka ta fika kontenti si nu uza imaji? Odja VÍDIU, i dipôs pâpia sobri kel pergunta li:
Na ténpu ki Bíblia skrebedu, kuzê ki kontise kantu alguns sérvu di Deus tenta uza imaji pa adora-l?
Alguns algen ta uza imaji pa es pode xinti más pértu di Deus. Má, kel-li ta pô-s ta fika más pértu di Deus mê? Lé Êxodo 20:4-6 i Salmo 106:35, 36, i dipôs pâpia sobri kes pergunta li:
Ki imaji dja bu odja pesoas ta uza na ses adorason?
Kuzê ki Jeová ta atxa di uza imaji pa adora-l?
Kuzê ki bu ta atxa di uza imaji pa adora Deus?
5. Si nu adora sô Jeová nu ta fika livri di kes ensinu falsu
Odja modi ki adora Jeová di manera ki el ta seta pode pô-nu ta fika livri di ensinus falsu. Odja VÍDIU.
Lé Salmo 91:14, i dipôs pâpia sobri kel pergunta li:
Kuzê ki Jeová promete ma el ta faze, si nu mostra ma nu ta ama-l i ma nu ta adora-l sô el?
6. Nu ta adora Deus na runion
Nu ta lova Jeová i nu ta nkoraja kunpanheru óras ki nu ta da komentáriu na runion. Lé Salmo 22:22, i dipôs pâpia sobri kes pergunta li:
Bu gosta di obi komentárius na runion?
Bu krê pripara pa da un komentáriu?
7. Jeová ta fika kontenti óras ki nu ta pâpia ku otus sobri kes kuza ki nu ta prende
Ten txeu manera ki nu pode pâpia ku otus sobri kes kuza ki sta na Bíblia. Lé Salmo 9:1 i 34:1, i dipôs pâpia sobri kel pergunta li:
Kuzê ki dja bu prende na Bíblia ki bu ta gostaba di pâpia ku otu algen?
ALGUNS ALGEN TA FLA: “Basta nu ten Deus na korason. Ka ta nporta modi ki nu ta adora-l.”
Kuzê ki bu ta atxa?
REZUMU
Nu ta agrada nos Kriador óras ki nu ta adora-l sô el, nu ta lova-l na runions i nu ta pâpia ku otus sobri kes kuza ki nu ta prende.
Perguntas di rezumu
Modi ki nu ta prende adora Deus sima el ta krê?
Pamodi ki nu debe adora sô Jeová?
Pamodi ki nu debe adora Deus djuntu ku kes ki krê agrada-l?
DJOBE MÁS
Na spiriénsa “N ka ta adora imaji más” odja modi ki un mudjer para di adora imaji.
“Bíblia ta muda vida di algen” (Sentinéla, 1 di julhu di 2011)
Prende kuzê ki pode djuda-u da komentárius na runion.
Odja modi ki runion djuda un jóven, sikrê éra difísil pa el sisti runions.
Txeu algen ta atxa ma kristons debe uza krus na adorason. Má nu debe uza-l na nos adorason?
“Pamodi ki Tistimunhas di Jeová ka ta uza krus na adorason?” (Artigu na jw.org)
a Nu ta ben pâpia di kes asuntu li na otus lison.