Modi ki bu pode ten serteza ma Deus ta obi bus orason?

FAZE ORASON PA JEOVÁ DEUS NA NÓMI DI JIZUS

“Si nhos pidi nha Pai kalker kuza na nha nómi, el ta ben da nhos el.” — Juan 16:23.

Kes palavra di Jizus ta mostra klaru ma Jeová ka krê pa nu uza imajen, santus, anjus ô kes algen ki dja móre óras ki nu ta faze orason. Má, el krê pa nu faze orason na nómi di Jizus Kristu. Óras ki nu ta faze orason na nómi di Jizus, nu ta mostra ma nu ta intende ma Deus ta obi nos orason pamodi kuzê ki Jizus faze pa nos. Jizus fla: “É sô através di mi ki algen ta txiga na nha Pai.” — Juan 14:6.

PÂPIA DI KORASON

‘Nhos konta-l tudu kel ki sta na nhos korason.’ — Salmo 62:8.

Óras ki nu ta faze orason pa Jeová, nu debe pâpia ku el sima óras ki un fidju ta pâpia ku se pai ki ta ama-l. Envês di fika ta ripiti kes palavra dikoradu ô uza un livru di orason, nu debe pâpia ku el ku ruspetu i di korason.

FAZE ORASON DI AKORDU KU VONTADI DI DEUS

“Ka ta inporta kuzê ki nu pidi di akordu ku se vontadi, el ta obi-nu.” — 1 Juan 5:14.

Na Bíblia, Jeová Deus ta fla-nu kuzê ki el ta ben faze pa nos i kuzê ki el krê pa nu faze pa el. Pa Deus seta nos orason, nu meste faze orason “di akordu ku se vontadi”. Pa kel-li, nu meste studa Bíblia asi pa nu pode konxe-l dretu. Si nu faze si, el ta fika kontenti ku nos orason.

SOBRI KUZÊ KI NU PODE FAZE ORASON?

Faze orason pa pidi kes kuza ki bu meste. Nu pode faze orason pa Deus ta pidi kes kuza ki nu meste sima kumida, ropa i un lugar pa mora. Tanbê nu pode faze orason ta pidi sabedoria pa toma bons disizon i forsa pa nu aguenta prublémas. Nu pode faze orason ta pidi fé, perdon i ajuda di Deus. — Lukas 11:3, 4, 13; Tiagu 1:5, 17.

Faze orason pa otus algen. Pai ku mai ki ta ama ses fidju ta fika kontenti óras ki ses fidju ta ama kunpanheru. Nos é fidjus di Jeová, i tanbê el krê pa nu preokupa i ama kunpanheru. Pur isu, nu debe faze orason pa nos maridu ô mudjer, nos fidjus, nos família i nos amigus. Disiplu Tiagu skrebe: “Nhos ora pa kunpanheru”. — Tiagu 5:16.

Faze orason pa agradese. Bíblia ta fla kel-li sobri nos Kriador: “El ka dexa di faze kuzas dretu ki mostra ken ki el é, kantu el da nhos txuba di séu i ténpu di bon kodjéta. El da nhos txeu kumida i el intxi nhos korason di alegria.” (Atus 14:17) Óras ki nu ta pensa na tudu kuza ki Deus dja faze pa nos, kel-li ta pô-nu ta agradese-l na orason. É klaru ki nu debe tanbê mostra nos gratidon pa Deus óras ki nu ta obi ku el. — Kolosensis 3:15.

TEN PAXÉNXA I KONTINUA TA FAZE ORASON

Alvês, nu pode xinti tristi pamodi orason ki nu faze di korason ka respondedu lógu. Kel-li krê fla ma Deus ka ta preokupa ku nos? Klaru ki nau! Nu ben odja alguns spiriénsia ki ta mostra ma nu meste sô kontinua ta faze orason.

Steve, ki dja nu papiaba di el na primeru artigu, fla: “Si N ka ta fazeba orason dja N perdeba tudu speransa di ser filís otu bês.” Kuzê ki pô-l ta muda di ideia? El kumesa ta studa Bíblia i el prende ma é inportanti faze orason. Tanbê el prende ma el ka debe dizisti di faze orason. Steve fla: “N faze orason pa Deus ta agradese-l pa tudu amor i ajuda ki N resebe di nhas amigu. Nunka N ka xinti tantu kontenti sima N sta xinti gósi.”

Jenny, ki ta atxaba ma el ka mereseba pa Deus obi-l, fla: “Kantu N staba la na txon, N pidi Deus pa djuda-m intende pamodi ki N staba ta xinti ma N ka tinha valor.” Kuzê ki djuda-l? El fla: “Pâpia ku Deus djuda-m odja kuzas sima el ta odja, i N intende ma mésmu ki nha korason kondena-m, Deus ka ta kondena-m. Kel-li tanbê djuda-m ka dizisti, má kontinua ta tenta.” Kal ki foi rezultadu? El fla: “Orason djuda-m odja Jeová sima un Pai i un Deus ki ta ama-m i ki ta preokupa ku mi, un Amigu ki sta sénpri la pa mi. I el ta kontinua ta djuda-m si N ta sforsa pa faze kuzê ki el krê.”

Odja tanbê kuzê ki kontise ku Isabel. Kantu el fika grávida, se dotor fla-l ma se fidju ta naseba ku un prubléma gravi. El fika dizanimadu dimás. Alguns algen ti fla-l pa el tra mininu. El fla: “N xinti sima ki N sta ba moreba di tantu tristéza na nha korason.” Kuzê ki el faze? El fla: “N faze txeu orason ta pidi Deus pa djuda-m.” Ku ténpu se fidju, Gerard, nase difisienti. Isabel xinti ma Deus responde se orason? Sin! Di ki manera? Isabel fla: “Óras ki N ta odja nha fidju, ki gósi ten 14 anu, kontenti sikrê difisienti, N ta da kónta ma el é midjór respósta pa nhas orason, kel benson más grandi ki Jeová dja da-m.”

Kes tipu di komentáriu li, di korason, ta pô-nu ta pensa na kes palavra ki un skritor di Salmo fla: ‘Bu ta obi pididu di kes mansu, ó Jeová. Bu ta bira ses korason fórti i bu ta da-s txeu atenson.’ (Salmo 10:17) Di serteza nu ten txeu motivu pa nu kontinua ta faze orason!

Na Bíblia nu ta atxa txeu orason ki Jizus faze. Di serteza kel orason más konxedu é kel ki el inxina ses disiplu. Kuzê ki nu pode prende ku kel orason?