LISON 22
Modi ki bu pode pâpia di notísias sábi ku otus algen?
Sima bu ta ba ta prende kes kuza ki Bíblia ta inxina, talvês bu ta pensa: ‘Tudu algen ten ki sabe kel-li!’ É verdadi ki tudu algen meste sabe kel-li! Má simé, bu pode xinti medu di pâpia ku otus sobri kes kuza ki bu sta ta prende. Nu ben odja modi ki bu pode vense kel medu i xinti alegria di prega kes notísia sábi.
1. Modi ki bu pode pâpia ku otus sobri kes kuza ki bu sta ta prende?
Kes disiplu di Jizus fla: ‘Nu ka pode para di pâpia di kes kuza ki nu odja i ki nu obi.’ (Atos 4:20) Es ta daba tantu valor pa kes kuza ki es prende ki es kria papiaba di es ku tudu algen. É si ki bu ta xinti tanbê? Nton, tenta atxa maneras di pâpia ku bus família i amigus sobri kes kuza ki bu sta ta prende. Má ka bu skese di faze-l ku ruspetu. — Lé Colossenses 4:6.
Alguns ideia pa pâpia sobri Bíblia
Óras ki bu ta pâpia ku bus família, fla si: “N prende un kuza interesanti kel simana li.”
Mostra un amigu ki sta duenti ô preokupadu un testu di Bíblia pa konsola-l.
Óras ki bus koléga di trabadju pergunta-u modi ki bu pasa fin di simana, fla-s kuzê ki bu prende na bu studu di Bíblia ô na runion.
Mostra bus amigu nos pájina na internet, jw.org.
Konvida un algen pa sisti bu studu di Bíblia ô mostra-l modi ki el pode pidi un studu di Bíblia na jw.org.
2. Pamodi ki bale péna prega djuntu ku kongregason?
Kes disiplu di Jizus ka prega kes notísia sábi sô pa kes algen ki es konxeba. Jizus ‘manda-s par-par pa es bai prega se dianti pa tudu kes sidadi’. (Lucas 10:1) Es prega di manera organizadu, i kel-la da txeu algen xansi di obi kes notísia sábi. Tanbê es fika kontenti di prega djuntu. (Lucas 10:17) Abo tanbê bu ta gostaba di prega djuntu ku kongregason?
SABE MÁS
Odja modi ki bu pode vense medu i xinti alegria di pâpia ku otus sobri kes notísia sábi.
3. Jeová ta sta ku bo
Alguns algen ki krê prega pode fika ku medu di kuzê ki pesoas pode fla ô modi ki es pode reaji.
Bu ta xinti medu di pâpia ku otus sobri kes kuza ki bu sta ta prende? Pamodi?
Odja VÍDIU, i dipôs pâpia sobri kel pergunta li:
Modi ki kes jóven konsigi vense medu ki es tinha?
Lé Isaías 41:10, i dipôs pâpia sobri kel pergunta li:
Óras ki bu xinti medu di prega, modi ki orason ta djuda-u?
Bu sabia?
Txeu Tistimunha di Jeová ta atxaba ma nunka es ka ta konsigi papiaba ku otus algen sobri kes notísia sábi. Pur izénplu, un irmon ki txoma Sergei ta atxaba ma el ka tinha valor i éra difísil pa el pâpia ku otus algen. Má, dipôs el kumesa ta studa Bíblia. El fla: “Nbóra N tinha medu, N kumesa ta pâpia ku otus algen sobri kes kuza ki N staba ta prende. N fika spantadu di odja ma pâpia ku otus sobri Bíblia djuda-m ganha más kunfiansa. Tanbê nha fé fika más fórti.”
4. Pâpia ku ruspetu
Óras ki bu ta pâpia ku otus sobri kes notísia sábi, ka bu pensa sô na kuzê ki bu ta fla má tanbê modi ki bu ta fla. Lé 2 Timóteo 2:24 i 1 Pedro 3:15, i dipôs pâpia sobri kes pergunta li:
Modi ki kes versíklu li pode djuda-u óras ki bu ta pâpia ku otus sobri Bíblia?
Alguns família ô amigus pode ka konkorda ku bo. Kuzê ki bu ta fazeba? Kuzê ki bu ka debe faze?
Pamodi ki é mutu más midjór faze perguntas ku jetu, envês di fla pesoas na kuzê ki es debe kridita?
5. Pâpia ku otus sobri notísias sábi ta da alegria
Jeová manda Jizus prega notísias sábi. Kuzê ki Jizus ta atxaba di kel trabadju? Lé João 4:34, i dipôs pâpia sobri kes pergunta li:
Nu ta kume pa nu pode fika bibu i tanbê el ta dexa-nu kontenti. Pamodi ki Jizus fla ma faze vontadi di Deus (pur izénplu prega) é sima kumida?
Pamodi ki bu ta atxa ma prega notísias sábi ta da alegria?
Alguns sujiston
Duránti runion di meiu di simana, prende modi ki bu pode da tistimunhu.
Pâpia ku bu instrutor pa sabe modi ki bu pode kumesa ta faze diziginason na runion di meiu di simana. Kes diziginason ta djuda-u sta más priparadu pa pâpia ku otus sobri kes kuza ki bu sta ta prende.
Uza kes párti “Alguns algen ta fla” ô “Un algen pode pergunta” pa bu odja modi ki bu ta responde alguns pergunta i kuzê ki bu ta fla óras ki un algen ka konkorda ku bo.
UN ALGEN PODE PERGUNTA: “É modi? Konta-m nobidadi.”
Modi ki bu ta uzaba kel oportunidadi li pa bu fla kel algen kuzê ki bu sta ta prende na bu studu di Bíblia?
REZUMU
Nu ta fika kontenti di pâpia ku otus sobri kes notísia sábi, i faze kel-li pode ser más fásil di ki kel ki bu ta imajina.
Perguntas di rezumu
Pamodi ki nu debe pâpia ku otus algen sobri kes notísia sábi?
Modi ki bu pode faze-l ku ruspetu?
Si bu ta xinti medu di prega, kuzê ki pode djuda-u?
DJOBE MÁS
Odja kuatu manera sinplis ki bu pode uza kel karton di kontatu di jw.org pa pâpia sobri notísias sábi ku otus algen.
Prende kuatu kualidadi ki ta djuda-u pâpia sobri notísias sábi.
“Bu sta prontu pa bira un piskador di ómi?” (Sentinéla, setenbru di 2020)
Odja un izénplu na Bíblia ki pode djuda-nu ten koraji pa pâpia ku otus sobri notísias sábi, sikrê nos é jóven.
Odja modi ki bu pode pâpia di Bíblia ku bus família ki ka konxe Jeová.