Kontinua ta prega pamodi amor!

1. Kuzê ki papiadu di el na runion anual di 2023?

NA RUNION anual di 2023,a nu intende midjór kes kuza ki nu ta kridita na el i nu obi alguns avizu sábi sobri nos trabadju di pregason. Pur izénplu, nu prende ma alguns algen pode ten oportunidadi di fika di ladu di povu di Jeová mésmu dipôs ki Babilónia Grandi distruídu. Tanbê fladu ma apartir di novénbru di 2023, publikadoris ka meste flaba más kantu óra ki es faze na pregason. Kel mudansa li bira nos pregason ménus inportanti ô ménus urjenti ki antis? É klaru ki nau!

2. Pamodi ki nos trabadju di pregason sta ba ta bira kada bês más urjenti timenti dia sta ba ta pasa? (Markus 13:10)

² Kada dia ki ta pasa, nos pregason ta bira kada bês más urjenti. Pamodi? Pamodi ka falta txeu ténpu antis di fin ben. Odja kuzê ki Jizus fla sobri trabadju di pregason na ténpu di fin. (Lé Markus 13:10.) Di akordu ku Mateus, Jizus fla ma notísias sábi ta ben pregadu na mundu interu antis di “fin” ben. (Mat. 24:14) Kel-li krê fla fin di kel mundu mau li di Satanás. Jeová dja ten “kel dia i kel óra” markadu pa kes kuza li ben kontise. (Mat. 24:36; 25:13; Atus 1:7) Kada dia nu sta fika más pértu di fin. (Rom. 13:11) Má, timenti fin ka ben nu meste kontinua ta prega.

3. Kuzê ki ta motiva-nu prega?

³ Óras ki nu ta pensa na nos trabadju di pregason, é inportanti nu pensa na kel pergunta li: Pamodi ki nu ta prega notísias sábi? É pamodi amor ta motiva-nu faze kel-la. Kuzê ki nu ta faze na trabadju di pregason ki ta mostra nos amor pa notísias sábi, nos amor pa pesoas, i más inportanti inda, amor pa Jeová i se nómi? Nu ben pâpia di kada un di es.

NU TA PREGA PAMODI NU TA AMA NOTÍSIAS SÁBI

4. Modi ki bu ta xinti óras ki bu resebe un notísia sábi?

⁴ Pensa na modi ki bu xinti kantu bu resebe un notísia sábi. Talvês un algen di bu família tevi fidju ô un algen da-u un trabadju ki bu staba ta meste. Di serteza bu fika ku gana di pâpia di kel notísia li ku bus família i bus amigu. Kontise mésmu kuza kantu bu obi kel midjór notísia ki ten, ki é notísias sábi di Reinu di Deus?

5. Modi ki bu xinti kantu bu obi verdadis di Palavra di Deus pa primeru bês? (Odja fotus.)

⁵ Pensa na modi ki bu xinti kantu bu obi pa primeru bês verdadis di Palavra di Deus. Bu prende ma bu Pai na séu ta ama-u, ma el krê pa bu faze párti di se família ki ta adora-l, ma el promete kaba ku tudu dór i sufrimentu, ma bu pode ben odja na mundu novu kes algen ki bu ta ama ki dja móre, i txeu otus kuza. (Mar. 10:29, 30; Juan 5:28, 29; Rom. 8:38, 39; Apo. 21:3, 4) Kes verdadi ki bu prende toka bu korason. (Luk. 24:32) Bu gosta txeu di kes kuza ki bu prende, i bu krê kontaba tudu algen sobri es! — Konpara ku Jeremias 20:9.

6. Kuzê ki bu prende ku spiriénsia di Ernestu ku Roza?

⁶ Odja spiriénsia di un irmon ki txoma Ernestu.b Kantu el tinha uns 10 anu, se pai móre. Ernestu fla: “N ta perguntaba si el baba pa séu ô si el ka ta izistiba más. N tinha siumis di otus kriansa ki tinha pai.” Ernestu ta baba txeu bês pa simitériu, el ta poba juelhu na txon frenti di koba di se pai i el ta oraba: “Favor Deus, N krê sabe undi ki nha pai sta.” Uns 17 anu dipôs ki se pai móre, Ernestu oferesedu un studu di Bíblia i el seta-l lógu. El fika txeu kontenti di sabe ma algen ki sta mortu ka sabe di más nada, i é sima si el sta na un sónu pezadu. Tanbê el prende ma Bíblia ta promete ma na futuru ta ben ten un resureison. (Ecl. 9:5, 10; Atus 24:15) Ti ki enfin, el atxa respóstas pa perguntas ki dja tinha txeu anu ki el krê sabeba! Ernestu staba txeu kontenti pamodi kes verdadi ki el staba ta prende. Roza, se mudjer, studa tanbê i el staba txeu kontenti pamodi kes kuza ki el staba ta prende. Es batiza na anu 1978. Ku zelu es prega pa família, amigus i otus algen sobri kes verdadi ki es prende ki ten txeu valor. Pamodi kel-li, Ernestu i Roza dja djuda más di 70 algen prende sobri Jeová i batiza.

7. Kuzê ki ta kontise óras ki nu ta ama verdadis di Bíblia? (Lukas 6:45)

⁷ Óras ki nu ta ama kes kuza ki nu ta prende na Bíblia, nu ta krê fla tudu algen sobri es. (Lé Lukas 6:45.) Nu ta xinti sima kes disiplu di Jizus ki fla: “Nu ka pode para di pâpia di kes kuza ki nu odja i ki nu obi.” (Atus 4:20) Nu ta ama verdadi di tal manera ki nu ta krê pâpia ku tudu algen ki nu pode sobri el.

NU TA PREGA PAMODI NU TA AMA PESOAS

8. Pamodi ki nu krê pâpia ku otus algen sobri notísias sábi? (Odja kuadru “Amor ta djuda na faze disiplus”.) (Odja fotu.)

⁸ Sima Jeová i Jizus, nu ta ama pesoas. (Pro. 8:31; Juan 3:16) Nu ta xinti txeu konpaxon pa kes algen ki sta “sen Deus” i ki “ka [ten] speransa”. (Efé. 2:12) Es ten txeu prubléma, i nos nu ten soluson pa kes prubléma, ki é notísias sábi di Reinu di Deus. Pamodi nu ta ama-s i nu ten konpaxon pa es, nu krê faze tudu kel ki nu ta pode pa nu pâpia ku es sobri notísias sábi. Kel mensajen li ki ten txeu valor pode intxi ses korason di speransa, djuda-s ten kel midjór vida ki ten gósi i da-s speransa di un “vida di verdadi”, ki é vida pa tudu ténpu na mundu novu di Deus. — 1 Tim. 6:19.

9. Ki avizu nu ta da sobri futuru, i pamodi? (Ezequiel 33:7, 8)

⁹ Amor ki nu ten pa pesoas ta motiva-nu pa nu aviza-s ma fin di kel mundu mau li sta kuazi ta txiga. (Lé Ezequiel 33:7, 8.) Nu ta xinti konpaxon pa tudu algen, i kel-li ta inklui kes algen di nos família ki ka ta sirbi Jeová. Txeu di es ta vive ses vida, sen sabe kuzê ki sta ben kontise. Bíblia ta fla: “Ta ben ten un grandi tribulason ki sima kel-la nunka ka kontiseba désdi komésu di mundu ti gósi, i nen el ka ta ben kontise otu bês.” (Mat. 24:21) Nu krê pa es sabe kuzê ki sta ben kontise duránti ténpu di julgamentu. Primeru, relijion falsu ta ben distruídu i dipôs kel mundu mau li ta ben distruídu na Armajedon. (Apo. 16:14, 16; 17:16, 17; 19:11, 19, 20) Nu ta ora pa txeu algen obi kuzê ki nu ten pa fla i pa es ben sirbi Jeová djuntu ku nos. Má i si kes algen di nos família i otus algen ka krê seta nos mensajen?

10. Pamodi ki é urjenti nu kontinua ta aviza pesoas sobri kuzê ki sta ben kontise?

¹⁰ Sima nu odja na studu ki pasa, talvês Jeová ta ben salva pesoas ki poi fé na el óras ki es odja distruison di Babilónia Grandi. Pur isu, é inda más urjenti nu kontinua ta aviza-s gósi. Pensa na kel-li: dipôs pesoas pode ben lenbra di kuzê ki nu fla-s gósi. (Konpara ku Ezequiel 33:33.) Talvês es ta ben lenbra di kes avizu ki nu da-s i es ta ben sirbi Jeová djuntu ku nos antis di fika tardi dimás. Sima kel guarda di kadia na Filipus ki poi fé na Deus sô dipôs ki “téra treme ku forsa”, talvês alguns algen ki ka seta mensajen di Reinu gósi ta ben muda ses manera di pensa dipôs ki es odja Babilónia Grandi distruídu. — Atus 16:25-34.

NU TA PREGA PAMODI NU TA AMA JEOVÁ I SE NÓMI

11. Modi ki nu ta da Jeová glória, onra i puder? (Apokalipse 4:11) (Odja fotus.)

¹¹ Kel motivu más inportanti ki ta pô-nu ta prega notísias sábi é pamodi nu ta ama Jeová Deus i se nómi santu. Nu ta odja nos trabadju di pregason sima un manera di nu lova nos Deus ki nu ta ama. (Lé Apokalipse 4:11.) Di tudu nos korason, nu ta konkorda ku kes palavra li: “Jeová nos Deus, é bo ki merese resebe glória, onra i puder.” Nu ta da-l glória i onra óras ki nu ta pâpia ku otus algen sobri kes próva ki ta mostra ma el “kria tudu kuza” i ma nu ta izisti pamodi el ki da-nu vida. Nu ta da Jeová nos puder óras ki nu ta uza nos ténpu, nos forsa i kuzas ki nu ten pa nu faze nos midjór na pregason. (Mat. 6:33; Luk. 13:24; Kol. 3:23) Nton, nu pode fla ma nu ta ama pâpia sobri kel Deus ki nu ta ama. Tanbê nu ta xinti motivadu na pâpia ku otus algen sobri se nómi i ki tipu di Deus ki el é. Pamodi?

12. Modi ki nu ta santifika nómi di Jeová na pregason?

¹² Nos amor pa Jeová ta motiva-nu santifika se nómi. (Mat. 6:9) Nu krê fla otus algen ma kes kuza orível ki Satanás ta konta sobri Jeová é ka verdadi. (Gén. 3:1-5; Jó 2:4; Juan 8:44) Óras ki nu ta prega, nu ta xinti vontadi di konta tudu algen ki krê obi ken ki Jeová é i kuzê ki el gosta. Nu krê pa tudu algen sabe ma se kualidadi prinsipal é amor, ma se manera di governa é dretu i justu i ma ka ta dura se Reinu ta ben kaba ku tudu sufrimentu i el ta ben traze pas i filisidadi pa tudu algen na téra. (Sal. 37:10, 11, 29; 1 Juan 4:8) Óras ki nu ta difende nómi di Jeová na pregason, nu sta ta santifika se nómi. Tanbê, nu ta fika kontenti pamodi nu sta ta faze kel ki nu debe faze dja ki nos é Tistimunhas di Jeová. Pamodi ki nu ta fla kel-li?

13. Pamodi ki é un priviléjiu pa nos ser txomadu di Tistimunhas di Jeová? (Isaías 43:10-12)

¹³ Jeová skodje-nu pa nu ser se ‘tistimunha’. (Lé Isaías 43:10-12.) Dja ten alguns anu ki un karta di Grupu Enkaregadu di Óbra fla: “Kel priviléjiu más grandi ki kalker un di nos pode ten é ser txomadu di Tistimunha di Jeová.”c Pamodi ki kel-li é un priviléjiu? Odja un izénplu. Imajina ma bu akuzadu di faze un kuza mariadu. Nton, bu meste di un algen pa fla otus ma kel akuzason é ka verdadi i ma bo é un bon algen ki nunka ka ta fazeba un kuza di kel-la. Kenha ki bu ta skodjeba? Di serteza bu ta skodjeba un algen ki bu konxe, ki bu ta kunfia na el i ki ten un bon nómi. Asi, otus algen pode kridita na el. Kantu Jeová skodje-nu pa nu ser se tistimunha, el mostra ma el konxe-nu dretu i ma el ta kunfia ma nu ta pâpia ku otus algen ma el é kel úniku Deus verdaderu. Pa nos é un ónra ser se tistimunhas. Pur isu, nu ta uza tudu oportunidadi pa pâpia ku otus algen sobri se nómi i prova ma tudu kes kuza orível ki sta ta papiadu sobri el é ka verdadi. Di kel manera li, nu ta mostra ma nu ten orgulhu di ser Tistimunhas di Jeová! — Sal. 83:18; Rom. 10:13-15.

NU TA KONTINUA TA PREGA TI KI FIN BEN

14. Ki kuzas ki sta ben kontise ki ta dexa-nu kontenti?

¹⁴ Nu sta txeu kontenti di sabe kuzê ki ka ta dura ta ben kontise. Ku benson di Jeová nu ta spera odja txeu algen ta djunta ku nos antis di grandi tribulason kumesa. Tanbê, nu sta txeu kontenti pamodi mésmu duránti grandi tribulason, ki é kel ténpu más difísil ki ta ben ten, txeu algen talvês ta sai di mundu di Satanás i es ta djunta ku nos pa lova Jeová! — Atus 13:48.

15-16. Kuzê ki nu ta ben kontinua ta faze i ti ki ténpu?

¹⁵ Ti la nu ten un trabadju inportanti pa faze, ki é priviléjiu di prega notísias sábi di Reinu di Deus na téra interu. Kel-li é un trabadju ki nu ka ta ben faze otu bês. Omésmu ténpu nu meste kontinua ta aviza pesoas sobri kuzê ki ka ta dura ta ben kontise. Pesoas meste sabe ma falta poku ténpu pa fin di kel mundu li txiga. Dipôs óras ki ténpu di julgamentu txiga, es ta ben sabe ma kel mensajen ki nu ta pregaba binha di Jeová Deus. — Eze. 38:23.

¹⁶ Nton, kuzê ki nu debe sta disididu na faze? Nu debe dexa amor motiva-nu. Amor pa notísias sábi, amor pa pesoas i más inportanti inda, amor pa Jeová Deus i se nómi. Asi, nu ta kontinua ta prega ku zelu i urjénsia ti ki Jeová fla: “Dja sta bon!”