Jeová é un Deus organizadu. (1 Coríntios 14:33) Pur isu nu ta spéra ma se povu ta ser organizadu tanbê. Modi ki kongregason sta organizadu? Kuzê ki nu pode faze pa djuda kongregason kontinua organizadu?

1. Kenha ki é kabésa di kongregason?

‘Kristu é kabésa di kongregason’. (Efésios 5:23) La di Séu, Jizus sta ta toma kónta di trabadju ki povu di Deus sta ta faze na mundu interu. Jizus skodje un ‘skravu fiel i prudenti’, ki é un grupu di ansions ku txeu spiriénsa ki tanbê ta txomadu di Grupu Enkaregadu di Óbra. (Lé Mateus 24:45-47.) Sima kontise na primeru séklu ku apóstlus i ansions na Jiruzalen, oji tanbê Grupu Enkaregadu di Óbra ta orienta kongregason na mundu interu. (Atos 15:2) Má é ka kes ómi li ki ta manda na nos organizason. Es ta lé Bíblia pa es odja kuzê ki Jeová krê pa es faze, i di korason es ta sigi orientason ki Jizus ta da.

2. Ken ki é ansions i kuzê ki es ta faze?

Ansions é ómis ki ten txeu spiriénsa ki ta inxina povu di Jeová kes kuza ki sta na Bíblia. Tanbê, es sta prontu pa djuda i nkoraja kes algen ki ta sirbi Jeová. Es ka ta pagadu pa trabadju ki es ta faze. Má, es ta sirbi di ‘livri vontadi dianti di Deus; ka pamodi amor pa ganha algun kuza ku dizonestidadi, má di manera animadu’. (1 Pedro 5:1, 2) Ten alguns irmon ki ta djuda ansions, i es ta txomadu di ajudantis di kongregason. Ku ténpu, kes ajudanti di kongregason pode kualifika i es ta bira ansions tanbê.

Grupu Enkaregadu di Óbra ta skodje alguns ansion pa ser enkaregadu di grupu di kongregason. Enkaregadu di grupu ta vizita txeu kongregason pa da-s orientason i nkorajamentu. Tanbê, es ta skodje alguns irmon pa ser ansions i ajudantis di kongregason ku bazi na kuzê ki Bíblia ta fla. — 1 Timóteo 3:1-10, 12; Tito 1:5-9.

3. Kuzê ki tudu Tistimunha di Jeová debe faze?

Tudu algen na kongregason ta ‘lova nómi di Jeová’ óras ki es ta partisipa na runion i es ta faze ses midjór na pregason. — Lé Salmo 148:12, 13.

SABE MÁS

4. Jizus é un líder ki ta mostra bondadi

Jizus ta faze-nu un konviti sábi. Lé Mateus 11:28-30, i dipôs pâpia sobri kel pergunta li:

• Ki tipu di líder Jizus é i modi ki el krê pa nu xinti?

VÍDIU: Ansions djuda irmons kantu kontise un tremor di téra na Nepal (4:56)

Bíblia ta mostra klaru modi ki ansions debe faze ses trabadju.

Lé Isaías 32:2 i 1 Pedro 5:1-3, i dipôs pâpia sobri kes pergunta li:

• Ansions ta sforsa pa anima otus, sima Jizus faze. Modi ki kel-li ta pô-u ta xinti?

• Di ki otus manera ansions pode imita Jizus?

5. Ansions ta inxina ku ses izénplu

VÍDIU: Ansions, nhos ser un izénplu pa kongregason! (7:39)

Jizus mostra ansions modi ki es debe kuida di kongregason. Lé Mateus 23:8-12, i dipôs pâpia sobri kes pergunta li:

• Kuzê ki Bíblia ta fla ma ansions debe faze? Bu ta atxa ma xéfis di relijion sta ta faze sima Bíblia ta fla?

1. Ansions ta sforsa pa ten un amizadi fórti ku Jeová i es ta djuda ses família tanbê

2. Ansions ta kuida di tudu algen na kongregason

3. Ansions ta prega sénpri

4. Ansions ta inxina i tanbê es ta djuda na linpéza i na otus trabadju

6. Nu pode djuda ansions

Bíblia ta fla-nu pamodi ki é inportanti nu djuda ansions. Lé Hebreus 13:17, i dipôs pâpia sobri kes pergunta li:

• Pamodi ki Bíblia ta fla ma nu debe obi di korason ku kes ki ta kuida di kongregason? Kuzê ki bu ta atxa?

Lé Lucas 16:10, i dipôs pâpia sobri kel pergunta li:

• Pamodi ki nu debe obi ku ansions mésmu na kuzas ki ta parse ma é ka inportanti?

REZUMU

Jizus é kabésa di kongregason i ansions ta obi ku el. Nu ta fika kontenti di djuda ansions pamodi es ta anima-nu i es ta inxina-nu ku ses izénplu.

Perguntas di rezumu

• Ken ki é kabésa di kongregason?

• Modi ki ansions ta djuda kongregason?

• Kuzê ki tudu algen ki ta adora Jeová debe faze?

DJOBE MÁS

Odja modi ki Grupu Enkaregadu di Óbra i otus ansion ta preokupa txeu ku irmons.

Nu da irmons forsa na ténpu di pirsigison (4:22)

Sabe kuzê ki enkaregadu di grupu di kongregason ta faze.

Vida di un enkaregadu di grupu di kongregason fóra di sidadi (4:51)

Sabe kal ki é lugar inportanti ki mudjer ten na kongregason.

“Tistimunhas di Jeová ta uza mudjeris pa inxina?” (Sentinéla, 1 di setenbru di 2012)

Odja modi ki ansions ta sforsa txeu pa nkoraja ses irmon.

Ansions ta djuda pa nu ten alegria (Sentinéla, 15 di janeru di 2013)

1. Ki konsedju Bíblia ta da pa maridus?

Jeová skodje maridu pa ser xéfi di família. (Lé Efésios 5:23.) Jeová ta spéra ma el ta toma disizons ki ta djuda família. Bíblia ta fla maridus: ‘Nhos kontinua ta ama nhos mudjer’. (Efésios 5:25) Kuzê ki kel-li krê fla? Un maridu ki ta mostra amor, ta trata se mudjer ku bondadi óras ki es sta na kaza i óras ki es sta ku otus algen tanbê. El ta proteje se mudjer i el ta faze se midjór pa pô-l filís i da-l kes kuza ki el meste. (1 Timóteo 5:8) Má más inportanti inda, el ta djuda-l ten un amizadi fórti ku Jeová. (Mateus 4:4) Pur izénplu, el ta ora i el ta lé Bíblia ku se mudjer. Óras ki un maridu ta kuida di se mudjer ku amor, el ta konsigi mante se amizadi ku Jeová. — Lé 1 Pedro 3:7.

Jizus é Kabésa di kongregason. (Efésios 5:23) Oji, la di Séu, Jizus sta ta uza un ‘skravu fiel i prudenti’ pa orienta se sigidoris na Téra. (Lé Mateus 24:45.) Jizus skodje kel ‘skravu’ i el da-l autoridadi pa toma alguns disizon. Má simé, kel skravu ten ki obi ku Jizus i sirbi irmons di Kristu. Kenha ki é kel skravu? Modi ki kel skravu ta kuida di nos?