Mostra Amor

Prubléma

Ideias mariadu sobri algen ka ta kaba faxi. Sima ta mestedu ténpu i sforsu pa kaba ku un vírus, ta mestedu ténpu i sforsu pa kaba ku ideias mariadu sobri algen. Kuzê ki bu pode faze pa bu tra kes ideia mariadu di bu korason?

Prinsípiu di Bíblia

Fotus: 1. Un ómi di Ázia sta ta abri pórta pa un ómi di kor prétu ki sta ku alguns kópu di kafé na mô. 2. Kel mésmu ómi di kor prétu sta ta da se kolégas di trabadju kafé. Un di kes koléga é kel mudjer indiana ki parseba na kel fotu.

‘Nhos bisti di amor, pamodi el é kel ligason perfetu di union.’ — COLOSSENSES 3:14.

Kuzê ki kel-li krê fla? Faze kuzas dretu pa otus ta poi algen ta fika unidu ku kunpanheru. Sima bu ta ba ta mostra más amor pa otus, kes ideia mariadu sobri es ta bira más poku. Sima bu ta ba ta xinti más amor, bu korason ka ta ten lugar pa ôdiu ô ideias mariadu sobri otus.

Kuzê ki bu pode faze

Fotus: 1. Un mudjer indiana sta ta djuda un mudjer di kor branku ki dja sta di idadi subi skada ku kónpra. 2. Kel mudjer di idadi di kor branku sta da bolinhus pa se vizinhu, ki é kel ómi di Ázia ki parseba na kel otu fotu.

Pensa na maneras ki bu pode mostra amor pa kes algen di un grupu ki bu tinha ideia mariadu sobri es. Ka meste ser kuzas konplikadu. Tenta faze un ô más di kes kuza li:

Kada bês ki bu faze algun kuza pa mostra amor pa otus, bu ta poi diskriminason ta fika más lonji di bo

Mostra ma bo é idukadu. Abri pórta pa un algen di kel grupu pasa ô labanta pa bu dexa-l xinta na transpórti pa públiku.
Mésmu si es ka ta pâpia bu língua dretu, tenta pâpia ku es.
Mostra paxénxa óras ki es ta faze un kuza ki bu ka ta ntende.
Si es konta-u ses prublémas, tenta ntende-s.