LISON 50

Modi ki bu família pode ser filís? — Párti 2

Formatu di livru na papel

Fidjus é un prezenti di Jeová. El ta spéra ma pai ku mai ta kuida dretu di kel prezenti li. Jeová ta da bons konsedju ki pode djuda pai ku mai faze kel-la. Se konsedju tanbê ta mostra kuzê ki fidjus pode faze pa djuda ses família ser filís.

1. Ki konsedju Jeová ta da pa pai ku mai?

Jeová krê pa pai ku mai ama ses fidjus i pa es pasa txeu ténpu ku es. Tanbê, el krê pa pai ku mai proteje ses fidjus i pa es uza konsedjus di Bíblia pa trena-s. (Provérbios 1:8) Jeová ta da kel konsedju li pa kes ki é pai: ‘Nhos kontinua ta kria nhos fidjus na instruson di Jeová.’ (Lé Efésios 6:4.) Jeová ta fika kontenti óras ki pai ku mai ta sigi orientason ki el ta da pa kria ses fidjus i es ka ta da ningen kel responsabilidadi la.

2. Ki konsedju Jeová ta da pa fidjus?

Jeová ta fla fidjus: ‘Nhos obi ku nhos pai i ku nhos mai’. (Lé Colossenses 3:20.) Óras ki fidjus ta ruspeta i ta obi ku ses pai ku ses mai, es ta poi Jeová kontenti i ses pai ku ses mai kontenti tanbê. (Provérbios 23:22-25) Jizus dexa un bon izénplu kantu el éra mininu. Nbóra el éra perfetu, el obi i el ruspeta se pai ku se mai. — Lucas 2:51, 52.

3. Modi ki bu família pode bira más amigu di Deus?

Si bo é pai ô mai, di sertéza bu krê pa bus fidju ama Jeová sima bu ta ama-l. Modi ki bu pode konsigi kel-la? Óras ki bu ta faze kuzê ki Bíblia ta fla: ‘Bu debe inxina bus fidju [palavras di Jeová] i pâpia di es xintadu na bu kaza, i óras ki bu sta anda na strada’. (Deuteronómio 6:7) ‘Inxina’ ta nvolve ripiti algun kuza. Talvês dja bu odja ma bu ten ki ripiti bus fidju un kuza txeu bês pa es pode lenbra. Nton, kel testu li krê fla ma sénpri bu debe djobe oportunidadi pa inxina bus fidju sobri Jeová. É bon pa família interu tra un ténpu tudu simana pa studa Bíblia djuntu. Mésmu si bu ka ten fidju, é bon bu tra ténpu tudu simana pa studa Palavra di Deus.

SABE MÁS

Odja alguns kuza ki pode djuda tudu algen na família xinti suguru i filís.

4. Trena bus fidju ku amor

Trena un fidju é ka fásil. Má, modi ki Bíblia pode djuda? Lé Tiago 1:19, 20, i dipôs pâpia sobri kes pergunta li:

Modi ki pai ku mai pode mostra amor óras ki es ta pâpia ku ses fidjus?
Pamodi ki un pai ô un mai nunka ka debe disiplina se fidju óras ki el sta xatiadu?a

Un pai sta nbaxadu ta pâpia ku se fidju ki tene un bóla na mô. Sta un vazu kebradu na txon.

5. Proteje bus fidju

Pa bu proteje bus fidju, é rei di inportanti bu pâpia ku kada un di es sobri séksu. Talvês bu pode xinti vergónha di faze kel-la. Odja VÍDIU, i dipôs pâpia sobri kes pergunta li:

VÍDIU: Proteje bus fidju di kuzas mariadu (2:58)

Pamodi ki alguns pai ku mai ta atxa difísil pâpia ku ses fidjus sobri séksu?
Modi ki alguns pai ku mai konsigi pâpia ku ses fidjus sobri séksu?

Bíblia dja flaba ma mundu di Satanás ta biraba kada bês más mau. Lé 2 Timóteo 3:1, 13, i dipôs pâpia sobri kel pergunta li:

Alguns di kes algen mau ki versíklu 13 ta pâpia di es, ta faze abuzu seksual di mininus. Nton, pamodi ki é inportanti pai ku mai inxina ses fidjus sobri séksu i inxina-s proteje di kes algen ki krê abuza di es?

Bu sabia?

Tistimunhas di Jeová dja faze txeu publikason pa djuda pai ku mai inxina ses fidjus sobri séksu i inxina-s proteje di kes algen ki ta krê abuza di es. Pur izénplu, odja:

Proteje bus fidju (vídiu)
Prende ku kel Grandi Instrutor, kapítlus 10 i 32
“Modi ki bu pode inxina bu fidju sobri séksu” (Nhos korda!, nunbru 5 di 2016)

6. Ruspeta bu pai ku bu mai

Mininus ku jóvens pode mostra ruspetu pa ses pai ku ses mai na manera ki es ta pâpia ku es. Odja VÍDIU, i dipôs pâpia sobri kes pergunta li:

VÍDIU: Modi ki N pode pâpia ku nha pai i ku nha mai? (2:19)

Pamodi ki un jóven debe pâpia ku se pai i ku se mai di manera ki ta mostra ruspetu?
Modi ki un jóven pode pâpia ku se pai i ku se mai di manera ki ta mostra ruspetu?

Lé Provérbios 1:8, i dipôs pâpia sobri kel pergunta li:

Modi ki un jóven debe reaji óras ki se pai ku se mai ta fla-l kuzê ki el debe faze?

7. Adora Jeová djuntu ku bu família

Tistimunhas di Jeová ta tra un ténpu tudu simana pa es faze ses adorason na família. Modi ki es pode faze adorason na família? Odja VÍDIU, i dipôs pâpia sobri kes pergunta li:

VÍDIU: Adorason na família — Kes difikuldadi i kes rekonpénsa (8:04)

Modi ki un família pode faze ses adorason na família tudu simana?
Kuzê ki un pai ô un mai pode faze pa ses adorason na família ser sábi i pa djuda tudu es? — Odja fotu na komésu di es lison.
Pamodi ki alvês é difísil pa bu família studa tudu djuntu?

Na Israel antigu, Jeová ta speraba ma famílias ta papiaba sénpri di Skrituras. Lé Deuteronómio 6:6, 7, i dipôs pâpia sobri kel pergunta li:

Modi ki bu pode sigi kel konsedju li?

Alguns ideia pa adorason na família:

Pripara pa runion.
Lé i pâpia di un stória di Bíblia ki bu família pode gosta.
Si bu ten un fidju pikinoti, diskarega ô inprimi un atividadi pa kriansas na jw.org.
Si bu fidju é jóven, uza un artigu pa jóvens na jw.org.
Bo ku bus fidju, nhos pode imajina ser algun personájen di Bíblia.
Odja un vídiu na jw.org i pâpia sobri el.