LISON 55
Apoia bu kongregason
Na mundu interu, milhons di algen ta sirbi Jeová ku alegria na milharis di kongregason. Es sta kontenti ku instruson i orientason ki es ta resebe. I es ta faze tudu kel ki es pode pa es apoia ses kongregason. É si ki bu ta xinti sobri bu kongregason?
1. Modi ki bu pode uza bu ténpu i forsa pa apoia kongregason?
Nos tudu nu pode djuda na kongregason. Pur izénplu, na bu kongregason ten algun algen ki dja sta di idadi ô ki sta duenti? Bu pode djuda-s bai sisti runion? Ô djuda-s di otus manera, sima faze-s kónpra ô linpa-s kaza? (Lé Tiago 1:27.) Tanbê nu pode oferese pa djuda linpa i konpo nos Salon di Reinu. Ningen ka ta obrigadu faze kes kuza li. Má, nos amor pa Deus i pa nos irmons é ki ta pô-nu ‘oferese nos kabésa di livri vontadi’. — Salmo 110:3.
Tistimunhas di Jeová pode djuda kongregason di txeu manera. Pur izénplu, irmons kualifikadu pode ser ajudantis di kongregason, i ku ténpu bira ansion. Irmons ku irmans pode djuda más txeu na pregason óras ki es ta ser pioneru. Tanbê, alguns Tistimunha di Jeová pode djuda óras ki es ta faze nos lugar di adorason ô óras ki es ta muda pa un otu kongregason ki meste di ajuda.
2. Modi ki nu pode uza kes kuza ki nu ten pa apoia kongregason?
Nu pode ‘onra Jeová ku nos kuza di valor’. (Provérbios 3:9) Nu ta fika kontenti di uza nos dinheru i kes kuza ki nu ten pa apoia nos kongregason i trabadju di pregason na mundu interu. (Lé 2 Coríntios 9:7.) Nos kontribuison tanbê ta uzadu pa djuda óras ki ta kontise un dizastri na naturéza. Txeu di nos ta disidi ‘poi algun kuza apárti’ pa nu pode faze nos kontribuison sénpri. (Lé 1 Coríntios 16:2.) Nu pode poi nos kontribuison na kes kaxa di kontribuison na nos lugaris di adorason ô nu pode faze-l pa internet na donate.jw.org. Jeová ta da-nu oportunidadi pa nu mostra nos amor pa el na manera ki nu ta disidi uza nos dinheru ô kes kuza ki nu ten.
SABE MÁS
Odja alguns manera ki bu pode apoia kongregason.
3. Nu pode uza kes kuza ki nu ten
Jeová ku Jizus ta ama kes algen ki gosta di da. Pur izénplu, Jizus ilôjia un viúva póbri, má ki simé faze un kontribuison. Lé Lucas 21:1-4, i dipôs pâpia sobri kes pergunta li:
Nu meste da txeu dinheru pa nu agrada Jeová?
Modi ki Jeová ku Jizus ta xinti óras ki nu ta faze nos kontribuison di korason?
Pa bu prende modi ki ta uzadu nos kontribuison, odja VÍDIU. Dipôs pâpia sobri kel pergunta li:
Modi ki ta uzadu kontribuisons pa djuda kongregasons na mundu interu?
4. Nu pode oferese pa djuda
Na ténpu ki Bíblia skrebedu, kes sérvu di Jeová trabadja txeu pa kuida di ses lugar di adorason. Má es ka djuda sô ku dinheru. Lé 2 Crónicas 34:9-11, i dipôs pâpia sobri kel pergunta li:
Kuzê ki kada israelita faze pa kuida di kaza di Jeová, ô lugar di adorason?
Pa bu odja modi ki Tistimunhas di Jeová ta sigi kel izénplu di Bíblia li, odja VÍDIU. Dipôs pâpia sobri kes pergunta li:
Pamodi ki é inportanti mante nos Salon di Reinu linpu i ben konpodu?
Kal ki é alguns manera ki bu pode djuda?
5. Irmons pode faze más pa djuda kongregason
Bíblia ta insentiva irmons pa es faze tudu kel ki es pode pa djuda kongregason más txeu. Pa odja un izénplu, odja VÍDIU. Dipôs responde kel pergunta li:
Na vídiu, kuzê ki Ryan faze pa djuda más txeu na kongregason?
Bíblia ta mostra kuzê ki irmons debe faze pa es pode ser ajudantis di kongregason i ansions. Lé 1 Timóteo 3:1-13, i dipôs pâpia sobri kes pergunta li:
Modi ki kes irmon ki krê ser ajudantis di kongregason i ansions debe ser?
Modi ki ses família debe ser? — Odja versíklus 4 i 11.
Óras ki irmons ta sforsa pa faze kes kuza li, modi ki kel-li ta djuda tudu algen na kongregason?
UN ALGEN PODE PERGUNTA: “Undi ki Tistimunhas di Jeová ta atxa dinheru pa faze ses trabadju?”
Modi ki bu ta respondeba?
REZUMU
Jeová ta fika txeu kontenti óras ki nu ta sforsa pa uza nos ténpu, forsa i kes kuza ki nu ten pa apoia kongregason.
Perguntas di rezumu
Modi ki nu pode uza nos ténpu i forsa pa apoia kongregason?
Modi ki nu pode uza kes kuza ki nu ten pa apoia kongregason?
Kuzê ki bu ta gostaba di faze pa apoia kongregason?
DJOBE MÁS
Odja pamodi ki Deus ka ta iziji pa kes algen ki ta adora-l faze dízimu más.
“Kuzê ki Bíblia ta fla sobri paga dízimu?” (Artigu na jw.org)
Ten alguns trabadju na kongregason ki Bíblia ta da pa kes ómi ki é batizadu. Má, i si un mudjer ki é batizadu meste faze kes tipu di trabadju la?
“Autoridadi ki ansions ten na kongregason” (Sentinéla, febreru di 2021)
Konxe alguns Tistimunha di Jeová ki ta mostra koraji i ki ta faze txeu sakrifisiu pa leba publikasons pa ses irmon.
Odja modi ki nos trabadju ta sustentadu di manera diferenti di otus relijion.
“Di undi ki dinheru ta ben pa sustenta trabadju di Tistimunhas di Jeová?” (Artigu na jw.org)