LISON 11

Modi ki bu pode tra más pruvetu di leitura di Bíblia

Formatu di livru na papel

Dja bu kustuma krê faze un kuza i sô di pensa na faze-l bu atxa ma bu ka ta konsigi? Talvês bu tevi ki ba ta faze-l poku-poku. Mésmu kuza ta kontise ku leitura di Bíblia. Bu pode pergunta: ‘Pa undi ki N ta kumesa?’ Na kel lison li, nu ta ben odja alguns kuza sinplis ki bu pode faze pa djuda-u gosta di lé i di studa Bíblia.

1. Pamodi ki nu debe lé Bíblia sénpri?

Un algen ki sénpri ta lé Bíblia ô ‘lei di Jeová’, ta ser filís i ta ten bon rezultadu. (Lé Salmo 1:1-3.) Pa kumesa, tenta lé sô alguns minutu tudu dia. Sima bu ta ba ta konxe Palavra di Deus más txeu, más bu ta gosta di lé Bíblia.

2. Modi ki leitura di Bíblia pode djuda-u?

Pa leitura di Bíblia djuda-nu más txeu, nu ten ki ‘midita na el’. (Josué 1:8, nóta di rodapé) Kel-li krê fla ma nu debe para i pensa na kuzê ki nu sta lé. Sima bu ta ba ta lé, pergunta bu kabésa: ‘Kuzê ki kel-li ta inxina-m sobri Jeová? Modi ki N pode uza kel-li na nha vida? Modi ki N pode uza kes versíklu li pa N djuda otus algen?’

3. Modi ki bu pode atxa ténpu pa lé Bíblia?

Bu ta atxa difísil tra ténpu pa lé Bíblia? Txeu algen ta xinti si. Tenta ‘uza bu ténpu di midjór manera’. (Efésios 5:16) Bu pode faze kel-li óras ki bu ta tra ténpu pa lé Bíblia tudu dia. Alguns algen ta lé Bíblia sédu palmanhan. Otus ta prifiri lé más tardi, talvês na óra di almosu. Inda otus ta lé Bíblia di noti antis di ba deta. Kal ki é midjór óra pa bo?

SABE MÁS

Odja modi ki bu pode bira bu leitura di Bíblia más sábi i modi ki bu pode pripara dretu pa bu tra más pruvetu di el.

Dizenhus: Un mininu ta prende gosta poku-poku di un kumida. 1. El sta brinka ku kumida. 2. Dipôs ki el sta más grandi, el sta ta kume kel kumida. 3. Gósi ki el sta más grandi inda, el gosta di kel kumida. — Sima nu pode prende gosta di diferentis tipu di kumida, nu pode prende gosta di lé Bíblia

4. Modi ki bu pode gosta di lé Bíblia

Pode ka ser fásil kumesa ta lé Bíblia. Má, nu pode ‘dizenvolve un dizeju fórti’ pa lé Bíblia, sima un algen ta prende gosta di un kumida ki nunka el ka kumeba antis. Lé 1 Pedro 2:2, i dipôs pâpia sobri kel pergunta li:

Bu ta atxa ma si bu lé Bíblia tudu dia, bu pode fika ta gosta i ta krê le-l más txeu?

Odja VÍDIU ki ta mostra modi ki alguns algen kumesa ta gosta di lé Bíblia. Dipôs pâpia sobri kes pergunta li.

VÍDIU: Jóvens ki prende ama Palavra di Deus (5:33)

Na vídiu, ki dizafius kes jóven konsigi vense?
Kuzê ki djuda-s kontinua ta lé Bíblia?
Modi ki es fika ta gosta di ses leitura di Bíblia más txeu?

Alguns ideia pa djuda-u kumesa:

Skodje un traduson di Bíblia izatu i modérnu. Tenta uza Tradução do Novo Mundo ki sta na bu língua ô na un otu língua ki bu konxe dretu.
Kumesa ta lé Bíblia na un párti ki bu gosta más txeu. Odja tabéla “Kumesa ta lé Bíblia”, pa bu atxa alguns ideia.
Marka kel ki dja bu lé. Uza tabéla “Marka bu leitura di Bíblia” ki sta na kel publikason li.
Uza aplikativu JW Library^®. Ku kel aplikativu li, bu pode obi i lé Bíblia na bu telemóvel ô na tablet na kalker lugar.
Uza kes apêndice ki sta na Tradução do Novo Mundo. Bu ta atxa mapas, tabélas i glossário ki pode bira bu leitura di Bíblia más sábi.

5. Pripara pa bu studu di Bíblia

Lé Salmo 119:34, i dipôs pâpia sobri kel pergunta li:

Pamodi ki é bon bu faze orason antis di bu lé Bíblia ô di pripara pa bu studu di Bíblia?

Modi ki bu pode tra más pruvetu di bu studu di Bíblia? Óras ki bu sta pripara un lison, tenta faze kes kuza li:

Lé kes parágrafu ki sta na komésu di lison.
Djobe i lé kes testu di Bíblia, i tenta ntende modi ki es sta ligadu ku kel matéria.
Sublinha sô kes palavra ô kes frazi ki ta responde kada pergunta. Kel-li ta djuda-u pâpia di kel lison ku bu instrutor.

Dizenhus: Un mudjer sta ta pripara pa se studu di Bíblia. 1. El sta ta lé primeru pájina di kel lison. 2. El sta ta lé kes testu di Bíblia. 3. El sta ta sublinha sô kes palavra i frazis inportanti di lison.

Bu sabia?

Tistimunhas di Jeová ta uza txeu traduson di Bíblia. Má, kel traduson ki nu gosta más txeu é Tradução do Novo Mundo da Bíblia Sagrada, pamodi el é izatu, klaru i el ta uza nómi di Deus. Odja artigu na jw.org “Tistimunhas di Jeová ten ses própi Bíblia?”

ALGUNS ALGEN TA FLA: “Studa Bíblia é difísil dimás. Inda más pa un algen okupadu sima mi.”