Dipôs ki Adon ku Eva sai di jardin di Éden, es ten txeu fidju. Ses primeru fidju, ki txomaba Kain, éra agrikultor i Abel, ses sugundu fidju, éra pastor.

Un dia Kain ku Abel faze un oférta pa Jeová. Bu sabe kuzê ki é un oférta? É un tipu di prenda spesial. Jeová fika kontenti ku oférta di Abel, má el ka fika kontenti ku oférta di Kain. Kel-li poi Kain fika uma xatiadu. Jeová aviza Kain ma si el kontinuaba ku raiba el ta fazeba algun kuza mariadu. Má Kain ka obi ku Jeová.

Nton, Kain fla Abel: ‘Bai kanpu djuntu ku mi.’ Kantu es staba sô es dôs na kanpu, Kain mata se irmon. Kuzê ki Jeová faze? Jeová kastiga Kain. El manda Kain pa lonji di se família. Kain ka podia voltaba nunka más.

Kuzê ki nu pode prende? Nu pode kumesa ta fika ku raiba si kuzas ka kontise sima nu krê. Si nu xinti raiba ta kria déntu nos ô si otus algen aviza-nu pamodi es odja ma nu sta ku raiba, nu debe faze algun kuza pa kontrola-l antis di el kontrola-nu.

Jeová nunka ka ta skese di Abel, pamodi Abel ta amaba el i el ta fazeba kuzas dretu. Deus ta ben da Abel vida otu bês óras ki el ben faze Téra bira un paraízu.

Ku ténpu, Téra fika xeiu di algen. Txeu di kes algen éra mau. Ti alguns anju na Séu bira mau. Es dexa ses kaza na Séu i es ben pa Téra. Bu sabe pamodi ki es faze kel-li? Es faze kel-li pa es pode kazaba ku mudjeris.

Kes anju ten fidjus ku kes mudjer. Ses fidju kumesa ta kria i ta fika uma grandi. Es éra violéntu i es ta maltrataba otus algen. Jeová ka pode dexaba kes kuza li kontinuaba ta kontise. Nton, el disidi manda un dilúviu pa kaba ku kes algen mau.

Má tinha un ómi ki éra diferenti. Se nómi éra Nué. El ta amaba Jeová. El tinha se mudjer i três fidju. Ses fidju txomaba: Sen, Kan i Jafé. I kada un di es tinha ses mudjer. Jeová fla Nué pa faze un arka grandi, asi el ku se família pode salvaba na Dilúviu. Un arka é un kaxa grandi di madera ki ta boia riba di agu. Tanbê Jeová fla-l pa el leba txeu animal pa déntu di arka pa es pode salva tanbê.

Nué kumesa lógu ta faze arka. Nué ku se família ten uns 50 anu ta trabadja pa faze kel arka. Es faze arka sima Jeová fla-s. Duránti tudu kel ténpu, Nué aviza pesoas ma Dilúviu staba ta binha. Má es ka obi ku el.

Nton txiga kel dia pa entra na arka. Nu ben odja kuzê ki kontise dipôs.