Pâpia sima na un konbérsu normal

Kuzê ki Filipi faze

VÍDIU: Filipi prega pa kel eunuku di Itiópia

1. Odja VÍDIU, ô lé Atus 8:30, 31. Dipôs pensa i responde kes pergunta li:

1. Modi ki Filipi kumesa ta pâpia ku kel eunuku di Itiópia?

2. Pamodi ki kel-li foi un manera normal di kumesa ta pâpia ku kel ómi i inxina-l un kuza novu?

Kuzê ki nu ta prende ku Filipi?

2. Si nu pâpia ku un algen di manera normal, el pode xinti más avontádi i krê obi kuzê ki nu sta fla-l.

Imita Filipi

3. Presta atenson. Bu pode prende txeu sobri un algen si bu presta atenson na se róstu, na se manera di sta i na jéstus ki el ta faze. Kel algen sta mostra ma el krê pâpia ku bo? Bu pode kumesa ta pâpia sobri un verdadi di Bíblia ku un pergunta sinplis sima: “Bu sabia ma... ?” Ka bu insisti na pâpia ku un algen si el ka krê pâpia ku bo.

4. Ten paxénxa. Ka bu atxa ma bu ten ki kumesa lógu ta pâpia sobri un asuntu di Bíblia ku kel algen. Spera óra sértu pa bu faze kel-li di manera normal. Alvês pode ser ki bu ten ki spera ti ki bu pâpia ku kel algen otu bês.

5. Faze mudansas. Kel algen pode kumesa ta pâpia sobri un kuza ki bu ka sta ta speraba. Nton, pa bu pâpia sobri un asuntu ki ta interesa kel algen, bu ten ki skodje un otu asuntu di Bíblia diferenti di kel ki bu priparaba.