Kuzê ki é Babilónia Grandi?

Respósta di Bíblia

Livru di Apokalipse ta pâpia di “un mudjer” ki é un “grandi prostituta” i el ten un nómi ki é “un mistériu: ‘Babilónia Grandi’”. (Apokalipse 17:1, 3, 5) Kel mudjer li ta reprizenta tudu kes relijion falsu di mundu, ki “troka verdadi di Deus pa mintira”.a (Romanus 1:25) Sikrê kes relijion li ten alguns kuza diferenti di kunpanheru, di un manera ô di otu, tudu es ta afasta pesoas di kel Deus verdaderu, Jeová. — Deuteronómio 4:35.

Kuzas ki ta djuda-nu sabe kuzê ki é Babilónia Grandi

1. Babilónia Grandi é un sinblu. Livru di Apokalipse ta pâpia di txeu “sinal”, nton nu pode fla ma Babilónia Grandi é un sinblu. El é ka un mudjer di verdadi. (Apokalipse 1:1) Alén di kel-li, el “sta xintadu riba di txeu agu,” i kel-li “ta reprizenta povu, monti di algen, nason i língua.” (Apokalipse 17:1, 15) Un mudjer di verdadi ka ta pode faze kel-li.

2. Babilónia Grandi ta reprizenta un organizason di mundu interu. El ta txomadu di “kel sidadi grandi ki ten un reinu riba di kes rei di téra.” (Apokalipse 17:18) Nton, el é un organizason ki ta influensia mundu interu.

3. Babilónia Grandi é un organizason relijiozu, ka un organizason pulítiku nen di komérsiu. Na kel antigu sidadi di Babilónia, es éra txeu relijiozu i es éra konxedu pa ses ‘inkantamentu’ i ‘fitisaria’. (Isaías 47:1, 12, 13; Jeremias 50:1, 2, 38) Na verdadi, kes algen ki ta moraba na kel sidadi, ta adoraba kes deus falsu i es éra kóntra kel Deus verdaderu, Jeová. (Jénezis 10:8, 9; 11:2-4, 8) Kes governanti di Babilónia éra orgulhozu i es ta atxaba ma es éra más midjór di ki Jeová i se adorason. (Isaías 14:4, 13, 14; Daniel 5:2-4, 23) Di mésmu manera, Babilónia Grandi é konxedu pa kes “fitisaria ki [el] ta faze.” Kel-li ta mostra ma el é un organizason relijiozu. — Apokalipse 18:23.

   Babilónia Grandi ka pode ser un organizason pulítiku, pamodi “kes rei di téra” ta lamenta se distruison. (Apokalipse 17:1, 2; 18:9) Nen el ka ta reprizenta komérsiu, pamodi Bíblia ta mostra ma el é diferenti di kes “komersianti di téra”. — Apokalipse 18:11, 15.

4. 

   Photograph taken by courtesy of the British Museum

   Babilónia Grandi é un sinblu ki ta reprizenta dretu kes relijion falsu. Envês di inxina pesoas modi ki es ta ser amigu di kel Deus verdaderu, ki é Jeová, relijion falsu ta poi pesoas ta adora otus deus. Bíblia ta txoma kel-li di “prostituison spritual”. (Levítiku 20:6, nóta; Ézudu 34:15, 16) Txeu relijion falsu sta kontinua ta inxina pesoas kes krénsa ki ta izistiba na Babilónia antigu, sima trindadi, ma alma ka ta móre i uza imajen na ses adorason. Kes relijion li, ta mistura ses adorason pa Deus ku amor pa mundu. Bíblia ta fla ma kel-li é adultériu spritual. — Tiagu 4:4.

   Rikéza di relijion falsu i manera ki es ta izibi-s, é sima kel ki Bíblia ta fla sobri Babilónia Grandi, ki sta “bistidu di roxu i brumedju”, i “infeitadu ku oru, pédras di valor i pérulas”. (Apokalipse 17:4) Babilónia Grandi é fonti “di kes kuza nojéntu di téra” ô ensinus i konportamentu ki ka ta agrada Deus. (Apokalipse 17:5) Kes algen ki ta faze párti di relijion falsu é kes “povu, monti di algen, nason i língua”, ki ta apoia Babilónia Grandi. — Apokalipse 17:15.

Babilónia Grandi é responsável pa mórti “di tudu kes ki matadu na téra.” (Apokalipse 18:24) Duránti stória di mundu, relijion falsu partisipa na géra i es insentiva terorismu. Tanbê, es ka inxina pesoas verdadi sobri Jeová, kel Deus di amor. (1 Juan 4:8) I pamodi kel-li, txeu algen móre.

Kuzê ki Deus ta atxa di Babilónia Grandi?

Pa Deus ‘pekadus di Babilónia Grandi dja djunta ti ki txiga séu’. (Apokalipse 18:4, 5) Deus sta xatiadu ku relijion falsu pamodi es ta konta mintira sobri el i es ta maltrata se povu.

Kuzê ki ta ben kontise ku Babilónia Grandi?

Bíblia ta fla ma ‘Deus dja julga’ Babilónia Grandi. (Apokalipse 18:20) Bíblia ta fla ma Deus ta ben kaba ku tudu relijion falsu. (Apokalipse 18:8) El ta ben poi un féra di kór brumedju, ki ta reprizenta tudu kes govérnu di mundu, ta volta kóntra tudu relijion falsu i ta kaba ku es. (Apokalipse 17:16, 17) “É si ki Babilónia, kel sidadi grandi, ta ben fulhadu pa baxu faxi i nunka más el ka ta atxadu.” (Apokalipse 18:21) É pur isu, ki Deus ta fla kes algen ki krê agrada-l “nhos sai di ses meiu,” nhos sipara di relijion falsu. — 2 Koríntius 6:14-17.