Kuzê ki é kel féra brumedju ki Apocalipse kapítlu 17 ta pâpia di el?
Respósta di Bíblia
Kel féra brumedju ki Apocalipse kapítlu 17 ta pâpia di el, é un organizason ki ten obijetivu di uni i reprizenta tudu nason na mundu interu. Antis éra Liga di Nasons, má oji é Organizason di Nasons Unidu.
Modi ki nu pode sabe kuzê ki é kel féra brumedju
El é un organizason pulítiku. Bíblia ta fla ma kel féra brumedju ten ‘seti kabésa’ i kes kabésa ta reprizenta ‘seti monti’ i ‘seti rei’ ô govérnus. (Apocalipse 17:9, 10) Na Bíblia, montis i animal ô féra pode reprizenta govérnus. — Jeremias 51:24, 25; Daniel 2:44, 45; 7:17, 23.
El ta reprizenta pulítika di kel mundu li. Kel féra brumedju ta parse ku kel otu féra di seti kabésa di Apocalipse kapítlu 13, ki ta reprizenta pulítika di kel mundu li. Kes dôs féra li ten seti kabésa, 10 txifri i nómi suju. (Apocalipse 13:1; 17:3) É ka pur akazu ki es ten kes kuza li igual. Nton kel féra brumedju é un imaji ô el ta reprizenta pulítika di kel mundu li. — Apocalipse 13:15.
Se puder ta ben di otus govérnu. Kel féra brumedju ‘ta sai di’ otus govérnu. Kel-li krê fla ma é pamodi kes govérnu ki el ta izisti. — Apocalipse 17:11, 17.
El sta ligadu ku relijion. Babilónia Grandi, ki é tudu kes relijion falsu na mundu, sta xintadu riba di kel féra brumedju. Kel-li ta mostra ma é kes relijion ki ta kontrola-l. — Apocalipse 17:3-5.
El ka ta da Deus ónra. Kel féra sta ‘xeiu di nómis suju’. — Apocalipse 17:3.
El ta fikaba un ténpu sen faze nada. Kel féra brumedju ta fikaba duránti un ténpu na ‘abismu’a ô sen faze nada, má dipôs el ta torna parseba. — Apocalipse 17:8.
Modi ki kes profesia li ta kunpri oji
Odja modi ki Organizason di Nasons Unidu i Liga di Nasons, kunpri kes profesia di Bíblia sobri kel féra brumedju.
El é un organizason pulítiku. Obijetivu di Organizason di Nasons Unidu é pa tudu kes ki ta apoia-l “ten mésmu direitu”. Di kel manera li, el ta apoia pulítika di mundu.b
El ta reprizenta pulítika di kel mundu li. Désdi anu di 2011, Organizason di Nasons Unidu ten 193 nason ki ta apoia-l. Pur isu, el ta fla ma el ta reprizenta kuazi tudu nason i pesoas di mundu.
Se puder ta ben di otus govérnu. Organizason di Nasons Unidu ta izisti pamodi kes país ki el ta reprizenta. É kes país li ki ta da-l kel puder i autoridadi ki el ten.
El sta ligadu ku relijion. Relijions sénpri apoia Organizason di Nasons Unidu i Liga di Nasons.c
El ka ta da Deus ónra. Organizason di Nasons Unidu fazedu “pa mante pas i suguransa” na mundu interu.d Sikrê kel-li ta parse un kuza dretu, má ku kel promésa li Organizason di Nasons Unidu ka sta ta da Deus ónra. Pamodi? Pamodi Deus fla ma é sô se Reinu ki ta ben traze pas i suguransa di verdadi. — Salmo 46:9; Daniel 2:44.
El ta fikaba un ténpu sen faze nada. Liga di Nasons, ki formadu un kuzinha dipôs di primeru géra na mundu interu, ku obijetivu di mante pas, ka konsigi inpidi pa kes país ka géra ku kunpanheru. El dexa di funsiona na anu di 1939, kantu kumesa kel sugundu géra na mundu interu. I na anu di 1945, dipôs ki sugundu géra na mundu interu kaba, kriadu Organizason di Nasons Unidu. Se obijetivu, manera di faze kuzas i modi ki el sta organizadu é kuazi igual ku kes di Liga di Nasons.
a Di akordu ku disionáriu Vine’s, palavra gregu traduzidu pa “abismu” krê fla “un kuza fundu ti dimás”. Na Bíblia, kel palavra li krê fla un lugar ô un situason ki algen ta sta sima prézu ô sen faze nada.
b Odja artigu 2 di karta di Organizason di Nasons Unidu.
c Pur izénplu, na anu di 1918, reprizentantis di txeu relijion protestanti na Mérka djunta i es fla ma “Liga di Nasons ta binha reprizentaba Reinu di Deus na Téra”. Na anu di 1965, reprizentantis di Igreja katóliku, protestanti, ortodoksu di orienti, budismu, induísmu, islamismu i judaísmu djunta na San Fransisku, pa mostra ma es ta apoiaba Organizason di Nasons Unidu i ora pa el. Alén di kel-li, na anu di 1979, Papa Juan Paulu Sugundu fla, ma se speransa é ma Organizason di Nasons Unidu “ta sérba kel lugar prinsipal pa pâpia di pas i di justisa”.
d Odja artigu 1 di karta di Organizason di Nasons Unidu.