Reinu dja sta ta governa!

1. Di kuzê ki nu pode ten sertéza i pamodi?

ÓRAS ki bu ta odja situason di mundu modi ki sta, é difísil kridita ma kuzas ta ben midjora. Famílias ka ta ama kunpanheru sima antis. Pesoas sta ta fika kada bês más violéntu i ta ama sô ses kabésa. I txeu algen ta atxa difísil kunfia na kes ki ten autoridadi. Má kel-li ta da-nu sertéza ma kuzas ta ben midjora. Pamodi? Pamodi pesoas sta ta aji sima Bíblia dja flaba na kel profesia sobri ‘ténpu di fin’. (2 Tim. 3:1-5) Kalker algen ki ta para pa odja kes kuza li ta kontise, ta da kónta ma kel profesia sobri ténpu di fin sta ta kunpri. I kel-li ta da-nu sertéza ma Jizus, ki é Rei di Reinu di Deus, dja sta ta governa. Má kel-li é sô un di kes txeu profesia sobri Reinu. Nos fé ta fika más fórti si nu studa alguns di kes profesia ki sta ta kunpri gósi.

2. Kuzê ki nu ta ben odja na kel studu li i pamodi? (Splika dizenhu na kapa.)

² Na kel studu li nu ta ben odja (1) un profesia ki ta djuda-nu ntende na ki ténpu ki Reinu di Deus kumesa ta governa, (2) profesias ki ta djuda-nu ntende ma Jizus bira Rei di Reinu di Deus na Séu i (3) profesias ki ta mostra modi ki inimigus di Reinu di Deus ta ben distruídu. Nu ta ben odja modi ki kel profesia li é sima pésas di un kebra-kabésa, ki óras ki es djuntadu es ta forma un imaji klaru ki ta djuda-nu ntende ma fin sta kuazi ta ben, sima Jeová promete.

MODI KI NU SABE MA JIZUS DJA KUMESA TA GOVERNA

3. Ki sertéza kel profesia ki nu ta atxa na Daniel 7:13, 14 ta da-nu sobri kel Rei di govérnu di Deus?

³ Kel profesia ki nu ta atxa na Daniel 7:13, 14 ta da-nu sertéza ma Jizus é kel midjór Rei pa governa Reinu di Deus. Algen di tudu nason ta fika kontenti na ‘sirbi-l’ i ninhun otu govérnu ka ta ben fika na se lugar. Otu profesia na livru di Daniel dja flaba ma Jizus ta kumesaba ta governa na fin di seti ténpu. Nu ta konsigi sabe na ki ténpu ki Jizus bira Rei?

4. Splika modi ki Daniel 4:10-17 ta djuda-nu ntende na ki anu ki Jizus ta kumesaba ta governa. (Tanbê odja nóta di rodapé.)

⁴ Lé Daniel 4:10-17. Kes ‘seti ténpu’ é 2.520 anu. Kel ténpu li kumesa na anu 607 A.J. kantu kes algen di Babilónia tra di puder kel últimu rei di Jiruzalen ki Jeová skodjeba. Kes seti ténpu tirmina na anu 1914 D.J., kantu Jizus kumesa ta governa. Jizus é ‘kel ki ten direitu legal’ di ser Rei na govérnu di Deus.b — Eze. 21:25-27.

5. Kal ki é un di kes manera ki kel profesia di ‘seti ténpu’ pode djuda-nu?

⁵ Modi ki kel profesia li ta djuda-nu? Ntende kel profesia di ‘seti ténpu’ ta da-nu sertéza ma Jeová ta ben kunpri se promésas na óra sértu. Jeová disidi na ki ténpu ki Jizus ta biraba Rei, i kantu kel ténpu txiga Jizus kumesa ta governa. Di mésmu manera, Jeová ta ben kunpri tudu kes otu profesia na óra sértu. Nton nu pode ten sertéza ma dia di Jeová ‘ka ta atraza!’ — Hab. 2:3.

MODI KI NU SABE MA JIZUS BIRA REI DI GOVÉRNU DI DEUS

6. (a) Kuzê ki nu sta ta odja ta kontise na Téra ki ta prova ma Jizus sta ta governa na Séu? (b) Modi ki Apocalipse 6:2-8 ta prova kel-li?

⁶ Kuazi na fin di se trabadju li na Téra, Jizus fla alguns kuza ki ta ben kontiseba ki ta djudaba se sigidoris sabe na ki ténpu ki el ta kumesaba ta governa na Séu. Alguns di kes kuza ki el fla é géra, fómi i tremor di téra. Tanbê el fla ma ta ben tinha duénsa ‘na un lugar tras di kel otu’. Koronavírus é un izénplu di kel-li. Kes kuza li ta faze párti di kel ki Bíblia ta txoma di ‘sinal’ di prezénsa di Kristu. (Mat. 24:3, 7; Luc. 21:7, 10, 11) Más di 60 anu dipôs ki Jizus móre i el resusitadu pa bai vive na Séu, el fla apóstlu Juan otus kuza ki ta ben kontiseba. (Lé Apocalipse 6:2-8.) Tudu kes kuza li sta ta kontise désdi 1914 kantu Jizus kumesa ta governa.

7. Pamodi ki kontise txeu kuza mariadu na Téra désdi ki Jizus bira Rei?

⁷ Pamodi ki kuzas na mundu piora kantu Jizus bira Rei? Apocalipse 6:2 ta fla un kuza inportanti. Primeru kuza ki Jizus faze kantu el bira Rei foi briga ku un algen. Ku kenha ki el briga? Ku Satanás i ku se dimónis. Sima sta na Apocalipse kapítlu 12, Satanás i se dimónis perde géra i es botadu pa Téra. Pamodi kel-li, Satanás kumesa ta diskonta se raiba na tudu algen li na Téra i kel-li traze txeu sufrimentu. — Apo. 12:7-12.

8. Pamodi ki nu ka ta fika preokupadu dimás ku kuzas mariadu ki sta ta kontise oji?

⁸ Modi ki kes profesia li pode djuda-nu? Kuzas ki sta kontise na mundu i konportamentu mariadu di pesoas ta mostra klaru ma Jizus dja bira Rei. Envês di nu fika preokupadu óras ki nu ta odja pesoas mau i ta pensa sô na ses kabésa, nu debe lenbra ma kes konportamentu li ta faze párti di kes profesia ki sta na Bíblia. Reinu dja sta ta governa! (Sal. 37:1) I sima Armajedon sta kada bês más pértu, nu pode spéra ma kuzas na mundu ta ben fika kada bês más piór. (Mar. 13:8; 2 Tim. 3:13) Nu ta fika kontenti pamodi nos Pai ki ta ama-nu ta djuda-nu ntende pamodi ki ta kontise txeu prubléma na mundu.

MODI KI INIMIGUS DI GOVÉRNU DI DEUS TA BEN DISTRUÍDU

9. Modi ki kel profesia di Daniel 2:28, 31-35 ta pâpia di kel últimu govérnu ki sta manda na mundu i ki ténpu ki el parse?

⁹ Lé Daniel 2:28, 31-35. Nu sta ta odja kel profesia li ta kunpri oji. Kel sonhu ki Nabukudunuzor tevi ta mostra kuzê ki ta ben kontiseba dipôs ki Jizus kumesaba ta governa ‘na fin di ténpu.’ Bíblia dja flaba ma kes inimigu di Jizus li na Téra ta inklui kel últimu govérnu ki sta manda na mundu. Pé di kel státua ki ten ‘un párti di féru i un párti di arjila’ ta reprizenta kel govérnu li ki dja sta ta governa. El parse duránti Primeru Géra na Mundu kantu Mérka ku Inglatéra djunta ku kunpanheru. Kel státua di sonhu di Nabukudunuzor tanbê ta mostra ma kel govérnu ki ta manda na mundu ten peloménus dôs kuza diferenti di kes otu govérnu ki dja izistiba antis.

10. (a) Kuzê ki profesia di Daniel dja flaba ki nu sta ta odja na govérnu di Mérka ku Inglatéra djuntadu? (b) Ki prigu ki nu debe ivita? (Odja kuadru “Kuidadu ku arjila!”)

¹⁰ Kel primeru diferénsa entri Mérka ku Inglatéra djuntadu i kes otu govérnu di kel vizon é kel-li: metal sima oru ku prata ka ta reprizenta-l. É féru ku arjila misturadu ki ta reprizenta-l. Arjila ta reprizenta algen na Téra ô ‘povu’. (Dan. 2:43) Oji nu sta ta odja klaru ma povu ten txeu forsa na eleison, kanpanha i manifestason, i kel-li ta inpidi kel govérnu li di faze kuzê ki el krê.

11. Pamodi ki nu pode ten sertéza ma gósi nu sta ta vive na ténpu di fin?

¹¹ Kel sugundu diferénsa é ki Mérka ku Inglatéra djuntadu ta reprizenta pé di kel státua uma grandi, i el é kel últimu govérnu ki ta manda na mundu ki Bíblia ta pâpia di el. Dipôs di el ka ta ben izisti más ninhun otu govérnu di ómi. I el ta ben distruídu na Armajedon óras ki govérnu di Deus ben kaba ku tudu govérnu di ómi.c — Apo. 16:13, 14, 16; 19:19, 20.

12. Ki otu próva ki sta na profesia di Daniel ta da-nu konsolu i speransa?

¹² Modi ki kel profesia li pode djuda-nu? Profesia di Daniel ta da-nu más próva ma nu sta ta vive na ténpu di fin. Dja ten más di 2.500 anu ki Daniel fla ma dipôs di Babilónia ta ben parseba kuatu govérnu ki ta ben afetaba povu di Deus txeu. Tanbê Daniel fla ma Mérka ku Inglatéra djuntadu, ta ben sérba kel últimu. Sabe di kel-li ta konsola-nu i ta da-nu speransa ma ka ta dura Reinu di Deus ta ben kaba ku tudu govérnu di ómi i el ta ben governa Téra interu. — Dan. 2:44.

13. Kenha ki é kel ‘oitavu rei’ i kes ‘10 rei’ ki Apocalipse 17:9-12 ta pâpia di el i modi ki kel profesia li kunpri?

¹³ Lé Apocalipse 17:9-12. Primeru Géra na Mundu faze txeu stragu, má kel-li kunpri otu profesia di Bíblia sobri ténpu di fin. Govérnus na mundu kumesa ta npenha pa traze pas na mundu interu. Nton, na janeru di anu 1920, es kria un Asosiason di Nasons, ki dipôs na otubru di 1945 bira ta txomadu Nasons Unidu. Kel organizason li ta txomadu di ‘oitavu rei.’ Má el ka ta manda na mundu. Se puder ta dipende di otus govérnu ki ta apoia-l. Bíblia ta txoma kes govérnu li di ‘10 rei’.

14-15. (a) Kuzê ki Apocalipse 17:3-5 ta fla sobri ‘Babilónia Grandi’? (b) Kuzê ki sta ta kontise oji ku relijion falsu?

¹⁴ Lé Apocalipse 17:3-5. Na kel vizon ki Deus da Juan, el odja un prostituta ki é ‘Babilónia Grandi’, ki ta reprizenta tudu relijion falsu na mundu. Modi ki kel vizon li sta ta kunpri? Dja ten txeu ténpu ki relijion falsu sta ta trabadja ku govérnus di mundu i ta apoia-s. Má ka ta dura, Jeová ta ben poi na ses korason ‘dizeju di faze kel ki sta na se pensamentu’. Kal ki ta ser rezultadu? Kes govérnu pulítiku li, ki é kes ‘10 rei’, ta ben ataka i distrui tudu relijion falsu. — Apo. 17:1, 2, 16, 17.

¹⁵ Modi ki nu sabe ma fin di Babilónia Grandi sta kuazi ta txiga? Un kuza ki ta djuda-nu responde kel pergunta li é lenbra ma kes agu di riu Eufratis ta protejeba un párti di sidadi di Babilónia di ténpu antigu. Livru di Apocalipse ta konpara kes milhon di algen ki ta apoia Babilónia Grandi ku ‘agu’ ki ta sirbi di proteson. (Apo. 17:15) Tanbê Apocalipse ta fla ma ‘se agu seka’. Kel-li ta mostra ma tudu relijion na mundu interu ta perde txeu di kes algen ki ta apoia-s. (Apo. 16:12) Oji nu sta ta odja kel profesia li ta kunpri pamodi txeu algen sta ta bandona relijion falsu i ta bai djobe respósta pa ses prubléma na otus lugar.

16. Modi ki ntende ki ténpu ki Nasons Unidu parse i ki Babilónia Grandi ta distruídu ta djuda-nu?

¹⁶ Modi ki kes profesia li pode djuda-nu? Dja ki Nasons Unidu parse i monti algen ka sta ta apoia relijion falsu más, kel-li ta prova ma nu sta ta vive na ténpu di fin. Nbóra txeu algen ka sta ta apoia Babilónia Grandi más, é ka kel-li ki ta ben distrui relijion falsu. El ta ben kabadu ku el di un manera diferenti. Sima dja nu odjaba antis, Jeová ta ben poi na korason di kes ‘10 rei’, ki ta reprizenta govérnus pulítiku i ki ta apoia Nasons Unidu, kel ‘dizeju di faze kel ki sta na se pensamentu’. Fin di relijion falsu ta ben dirapenti i el ta panha tudu algen di surpréza.d (Apo. 18:8-10) Distruison di Babilónia Grandi ta ben afeta mundu interu i ta ben traze txeu difikuldadi. Má povu di Deus ten peloménus dôs motivu pa fika kontenti. Relijion falsu, ki é inimigu di Deus, ta ben kabadu ku el pa tudu ténpu i ka ta dura nu ta ben fika livri di kel mundu mau li! — Luc. 21:28.

ODJA PA FUTURU KU KUNFIANSA

17-18. (a) Modi ki nu pode kontinua ta bira nos fé más fórti? (b) Kuzê ki nu ta ben odja na kel otu studu?

¹⁷ Daniel fla ma ‘konhisimentu di verdadi ta ben biraba txeu dimás.’ I é kel-li ki nu sta ta odja ta kontise! Nu ta ntende kes profesia ki sta ta kunpri. (Dan. 12:4, 9, 10) Odja-s ta kunpri tintin pa tintin ta dexa-nu dimiradu i ta pô-nu ku más ruspetu pa Deus i pa se Palavra. (Isa. 46:10; 55:11) Pur isu, kontinua ta studa Bíblia i djuda otus algen bira amigu di Jeová, asi bu fé ta bira más fórti. Jeová ta proteje tudu kes ki ta kunfia na el di tudu korason, i el ‘ta da-s pas ki ka ta kaba’. — Isa. 26:3.

¹⁸ Na kel otu studu nu ta ben odja profesias ki ta pâpia di povu di Deus na ténpu di fin. Tanbê nu ta ben prende ma kes profesia li ta prova ma nu sta ta vive na ténpu di fin. I nu ta ben odja ma nos Rei, Jizus Kristu, sta ta orienta povu di Deus.