Fidjus i redi sosial — Párti 2: Inxina bu fidju uza redi sosial ku suguransa

Txeu pai ku mai ka ta dexa ses fidju uza redi sosial, pamodi kes prigu ki ten. Má, si bu dexa bu fidju uza redi sosial, modi ki bu pode djuda-l ivita kes prigu di redi sosial i prende uza-l ku sabedoria?

Na kel artigu li

• Kuzê ki é más inportanti pa bu fidju

• Kuzê ki bu fidju ta xinti

• Modi ki bu fidju ta konporta na redi sosial

• Perguntas ki pode djuda nhos pâpia ku kunpanheru

Kuzê ki é más inportanti pa bu fidju

Kuzê ki bu meste sabe: Dja ki redi sosial pode vísia un algen, bu fidju meste di ajuda pa kontrola kantu ténpu ki el ta gasta na el.

Prinsípiu di Bíblia: “Nhos djobe dretu kuzê ki é más inportanti”. — Filipensis 1:10.

Pensa na kel-li: Bu fidju ta uza redi sosial na óra ki el devia sta ta durmi, ta faze trabadjus di skóla ô ta pasa ténpu djuntu ku família? Alguns piskiza ta mostra ma jóvens meste di uns 9 óra di sónu tudu dia. Má kes ki ta pasa txeu óra ta uza redi sosial ta durmi ménus di 7 óra pur dia.

Kuzê ki bu pode faze: Pâpia ku bu fidju sobri kuzê ki é más inportanti pa el. Tanbê, djuda-l ntende pamodi ki pasa ménus ténpu ta uza redi sosial ta mostra ma el ten sabedoria. Poi régras ikilibradu, sima ka uza aparelhus eletróniku na kuartu di noti. Bu obijetivu é djuda bu fidju dizenvolve kapasidadi di kontrola se kabésa. Kel-li é un kualidadi ki ta ben djuda-l txeu óras ki el ben bira un adultu. — 1 Coríntios 9:25.

Kuzê ki bu fidju ta xinti

Kuzê ki bu meste sabe: Óras ki jóvens ta odja kes fotu na redi sosial, ki es ta poi algun kuza na el pa fika más bunitu i fotus di kuzas interesanti ki ses amigu sta faze, es pode xinti es sô, preokupadu i diprimidu.

Prinsípiu di Bíblia: ‘Nhos larga invéja’. — 1 Pedro 2:1.

Pensa na kel-li: Redi sosial sta ta poi bu fidju ka xinti dretu ku se kabésa pamodi el sta ta konpara ku otus? Bu fidju ta xinti ma tudu algen ten un vida sábi, má el ta atxa ma se vida é nfadadu?

Kuzê ki bu pode faze: Mostra bu fidju pamodi ki é prigozu fika ta konpara se kabésa ku otus algen. Ka bu skese ma mininas pode fika más afetadu di ki mininus, pamodi es ta preokupa más ku amizadi i ku ses korpu. Bu pode fla bu fidju di vês en kuandu pa el para di uza redi sosial pa un ténpu. Un jóven ki txoma Jacob fla: “N fitxa nha kónta na redi sosial pa un ténpu. Kel-li djuda-m odja kuzê ki é más inportanti i muda manera ki N ta nkara nha kabésa i otus algen.”

Modi ki bu fidju ta konporta na redi sosial

Kuzê ki bu meste sabe: Uza redi sosial ta kustuma konparadu ku vive na frenti di un monti di algen ki sta odja tudu kuza ki bu sta ta faze. É normal pesoas ka ntende kunpanheru dretu i ten prublémas ku kunpanheru.

Prinsípiu di Bíblia: ‘Nhos larga tudu tipu di rankor, fúria, raiba, gritaria i palavras ki ta ofende. Nhos trata kunpanheru ku bondadi’. — Efésios 4:31, 32.

Pensa na kel-li: Redi sosial dja poi bu fidju ta pâpia mal di otus algen, ta ten prublémas ku otus algen ô ta fla kuzas ki ka ta mostra bondadi?

Kuzê ki bu pode faze: Inxina bu fidju ser idukadu na redi sosial. Un livrua ki ta pâpia sobri redi sosial fla: “Ta faze párti di nos trabadju inxina nos fidjus ma es ka debe maltrata otus algen, ka ta nporta si é na redi sosial ô nau.”

Lenbra ma nu pode vive sen redi sosial i ma é ka tudu mai ku pai ki ta dexa ses fidjus uza-l. Si bu dexa bu fidju uza redi sosial, bu debe ten sertéza ma el ta konsigi kontrola kantu ténpu ki el ta gasta na redi sosial, faze bons amizadi i ivita kuzas mariadu.