Fidjus i redi sosial — Párti 1: N debe dexa nha fidju uza redi sosial?

Un piskiza mostra ma 97 pursentu di jóven ta uza redi sosial. Bu fidju ta krê uza tanbê? Nton ta sérba bon odja alguns pontu inportanti.

Na kel artigu li

• Modi ki bu fidju ta bai uza se ténpu

• Modi ki bu fidju ta skodje se amigus

• Kuzê ki bu fidju ta xinti

• Modi ki bu fidju ta konporta na redi sosial

• Bu fidju meste di un redi sosial?

• Kuzê ki pai ku mai ta fla

Modi ki bu fidju ta bai uza se ténpu

“Un pájina na interneta fla ma redi sosial ta uza tekinolojia di un manera ki ta sta sénpri ta txoma atenson di algen. Es ta faze kel-li di un manera ki ta poi kes algen ki ta uza-l gasta más ténpu na redi sosial.”

“Óras ki N ta uza redi sosial N ta skese di óra. Kuza ki éra pa sérba alguns minutu ta bira txeu óra. Alvês é txeu difísil larga tilifóni i djobe algun kuza más inportanti pa faze.” — Lynne, ki ten 20 anu.

Pergunta bu kabésa: Nha fidju ta konsigi kontrolaba se kabésa i sigi kel régra ki N ta pô-l di kantu ténpu ki el debe uza redi sosial? Nha fidju é maduru pa kria se própi régras i sigi-s?

Prinsípiu di Bíblia: ‘Nhos mante txeu sienti pa nhos anda sima algen ki ten sabedoria, ta uza nhos ténpu di midjór manera ki nhos pode’. — Efésios 5:15, 16.

Modi ki bu fidju ta skodje se amigus

“Redi sosial” fazedu pa poi pesoas ta xinti ma es ten txeu amigu. Má txeu bês kes amizadi li é ka di verdadi.

“Txeu jóven ta atxa ma óras ki es ten txeu amigu na redi sosial i ki gosta di kuzas ki es ta poi, ta mostra ma kes algen li ta preokupa ku es, sikrê nen es ka konxe-s.” — Patrisia, ki ten 17 anu.

Pergunta bu kabésa: Nha fidju ta konsigi ntende ma ten txeu amigu na redi sosial é ka inportanti? El ta konsigi ranja amigus fóra di redi sosial?

Prinsípiu di Bíblia: ‘Un amigu di verdadi ta ama tudu óra i el é un irmon ki nase pa ténpu di frónta.’ — Provérbios 17:17.

Kuzê ki bu fidju ta xinti

Kes algen ki ta faze piskiza da kónta, ma óras ki un algen ta uza redi sosial txeu dimás normalmenti el ta xinti el sô, preokupadu i ti diprimidu.

“Óras ki bu ta odja fotu di kuzas ki bus amigu sta ta faze, i bu ka sta la, bu ta xinti tristi.” — Serena, ki ten 19 anu.

Pergunta bu kabésa: Nha fidju ta konsigi ivita konsentra sô na se kabésa, ivita konpiti ku otus ô el ta dexa pa kes kuza ki otus algen ta poi na redi sosial afeta-l?

Prinsípiu di Bíblia: ‘Ka nu bira orgulhozu, ta poi algen ta konpiti es ku es i ta inveja kunpanheru.’ — Gálatas 5:26.

Modi ki bu fidju ta konporta na redi sosial

Através di redi sosial, bu fidju pode sufri abuzu di otus algen, resebe mensájen ô vídiu sobri séksu ô odja pornografia. Sikrê bu fidju ka ten intenson di faze kes kuza li, el pode odja-s i kel-li pode afeta-l.

“N ta repara ma kes kuza ki ta podu na redi sosial pode parse normal, má es pode muda faxi pa un kuza negativu. Ten txeu konbérsu mariadu i múzikas ki ta insentiva-nu pa nu faze kuzas mariadu.” — Linda, ki ten 23 anu.

Pergunta bu kabésa: Nha fidju ta konsigi uza internet ku sabedoria? El ten koraji pa nega kes kuza mariadu?

Prinsípiu di Bíblia: ‘Konportamentu seksual mariadu ku tudu tipu di sujidadi i ganánsia ka debe nen limiadu na nhos meiu, nen konportamentu sen vergónha, nen konbérsu di disparati, nen piadas indisenti’. — Efésios 5:3, 4.

Bu fidju meste di un redi sosial?

Nu ka meste di redi sosial pa nu vive i nen pa nu sta filís. Txeu jóven ka ten redi sosial, nen es ka ta xinti falta di el. I kel-li ta inklui alguns ki tinha redi sosial, má ki dexa di uza-s.

“Dipôs ki N odja modi ki redi sosial prujudika nha irman más grandi ki mi, N disidi para di uza-l. Désdi ki N faze kel-li N sta más filís i N sta xinti ma N sta pruveta vida más midjór.” — Nathan, ki ten 17 anu.

Kuzê ki nu ta prende: Antis di dexa bu fidju uza redi sosial, djobe dretu si el ta konsigi uza-l ku limiti, si kes amizadi é bon pa el i si el ta konsigi ivita kes kuza mariadu.

Prinsípiu di Bíblia: ‘Ken ki é prudenti ta pensa antis di el da kada pasu.’ — Provérbios 14:15.