UN MUNDU XEIU DI PRUBLÉMA

4 | Ka bu perde speransa

PAMODI KI KEL-LI É INPORTANTI

Kes preokupason ki nu ta ten pamodi prublémas ki sta kontise na mundu pode afeta-nu na tudu sentidu. Txeu di kes algen ki fika afetadu pamodi kes kuza la, ka ta atxa ma situason ta midjora. Modi ki es ta reaji?

Alguns nen ka ta krê pensa na futuru.
Otus ta uza álkuol ô drógas pa tenta skese ses preokupason.
I otus ta atxa ma é midjór es móre di ki fika bibu. I es ta pergunta: “Pakê kontinua bibu?”

Kuzê ki bu debe sabe

Alguns di kes prubléma ki bu ta pasa pa el pode dura poku ténpu i es pode midjora di un óra pa kel otu.
Mésmu ki bu situason ka muda, ten kuzas ki bu pode faze pa djuda-u lida ku es.
Bíblia ta da-nu un speransa di verdadi. El ta garanti-nu ma un dia tudu nos prublémas ta ben rezolve.

Kuzê ki bu pode faze gósi

Bíblia ta fla: ‘Nunka ka nhos fika preokupadu dimás ku kuzas di kel otu dia, pamodi kel otu dia ta ten ses kuza pa preokupa ku el. Kada dia ta ten ses prubléma.’ — Mateus 6:34.

Vive un dia di kada bês. Ka bu dexa kes preokupason di manhan inpidi-u di faze kes kuza ki bu meste faze oji.

Fika ta pensa na kes kuza mariadu ki talvês pode kontise, sô ta pô-u ta fika más preokupadu i ta frakise bu speransa di un futuru midjór.

KUZÊ KI NU PODE FAZE — Kuzas ki pode djuda-nu

KONSENTRA NA KES KUZA PUZITIVU

Bíblia ta fla: ‘Pa algen ki sta frontadu, tudu dia é mariadu, má ken ki ten un korason kontenti, sénpri ten un méza xeiu.’ (Provérbios 15:15) Si bu konsentra dimás na prublémas, talvês bu ka ta konsigi odja ma ten un soluson. Má, un atitudi puzitivu pode djuda-u pensa na maneras ki bu pode lida ku kel situason.

Poi un limiti di kantu ténpu ki bu ta odja notísias.
Na fin di kada dia, pensa na dôs ô três kuza ki bu pode mostra gratidon.
Faze un lista di kuzê ki bu meste faze i poi na el sô kes kuza ki bu ta pode faze oji. Panha kes trabadju más grandi i dividi-s pa es fika pikinoti. Asi, na fin di dia ta ser más fásil odja rezultadus di sforsu ki bu faze.

IVITA FIKA BO SÔ

Bíblia ta fla: ‘Kenha ki ta krê fika el sô, sta dispreza sabedoria.’ (Provérbios 18:1) Bu ka ta pode sai di un braku fundu bo sô, má ku ajuda di un amigu bu pode konsigi.

Pidi ajuda di bu família ô di bus amigu.
Tanbê, djobe manera di djuda-s. Faze kuzas pa otus algen ta djuda-u ten un ideia ikilibradu sobri bus prubléma.
Si dja bu perde speransa i bu ta atxa ma ka bale péna kontinua ta vive, talvês bu meste djobe ajuda di un médiku. Alvês, xinti angustiadu dimás tudu óra, pode ser sinal di un prubléma di saúdi, sima depreson. Txeu algen djudadu pamodi es buska ajuda na médikus.a

a Nhos korda! ka ta rekumenda ninhun tipu di tratamentu di saúdi.

Bíblia ta da-nu un speransa di verdadi

Un sérvu di Deus na pasadu fla Deus kel-li na un orason: ‘Bu palavra é lánpida pa nha pé, i un lus pa nha kaminhu.’ (Salmo 119:105) Repara modi ki Bíblia, ki é Palavra di Deus, é si própi.

Na un noti sukuru, un lánpida ta djuda-nu odja na undi ki nu ta anda. Di mésmu manera, Bíblia ten bons konsedju ki pode djuda-nu sabe kuzê ki nu ta faze na un situason difísil.

Un lus pode límia nos kaminhu pa nu pode odja kuzê ki sta más pa frenti. Di mésmu manera, Bíblia tanbê pode djuda-nu odja kuzê ki ta ben kontise na futuru.

Bíblia é un livru sagradu ki ka ta sô konta stória di umanus désdi komésu, má tanbê, el ta da-nu un speransa di verdadi pa futuru. El ta responde kes pergunta li:

Modi?

Modi ki sufrimentu kumesa: Bíblia ta fla ma ‘pekadu entra na mundu pamodi un ómi, i mórti entra pamodi pekadu, di es manera mórti spadja pa mundu interu, pamodi tudu algen peka.’ — Romanos 5:12.

Pamodi?

Pamodi govérnus di ómi ka ta konsigi rezolve nos prublémas: Bíblia ta fla ma ‘ómi é ka kapás di gia se kabésa.’ (Jeremias 10:23) Si nu repara pa kuzas ki sta kontise na mundu, nu ta odja ma kel-li é verdadi.

Kuzê?

Kuzê ki Deus ta ben faze pa rezolve kes prubléma na mundu: Bíblia ta fla ma ‘el ta linpa di ses odju tudu lágua, i ka ta ten más mórti, nen ka ta ten más tristéza, nen txoru, nen dór’. — Apocalipse 21:4.