PERGUNTA 3
Modi ki N debe pâpia ku nha pai i ku nha mai?
KUZÊ KI BU TA FAZEBA?
Imajina kel situason li: É kuarta-fera di tardi. Jil, di 17 anu, dja kaba di ruma se kuartu, i gósi el sta ba xinta pa relaxa! El abri tilivizon i el stika na sofá.
Na kel óra se pai txiga ku róstu runhu.
“Jilson! Bu ka odja ma bu sta perde ténpu frénti tilivizon? É ka éra pa bu staba ta djuda bu irmon faze trabadju di kaza? Nunka bu ka ta faze kel ki bu ta mandadu!”
Jil resmunga: “Prontu, dja el kumesa!” I se pai obi.
Se pai txiga más pértu i fla-l: “Kuzê ki bu fla?”
Jil da folgu kansadu i el fla ku róstu runhu: “É ka nada papá.”
Se pai xâtia ku el i fla-l: “Ka bu pâpia ku mi si!”
Si bo éra Jil, kuzê ki bu ta fazeba pa ivitaba kel situason li?
PARA I BU PENSA!
Pâpia ku bu pai i ku bu mai é sima konduzi un karu. Si bu atxa kaminhu tapadu, bu ta djobe otu kaminhu.
PUR IZÉNPLU
Un minina ki txoma Leia fla: “N ta atxa ma é difísil pâpia ku nha pai. Alvês N ta sta ta pâpia ku el manenti, un bokadu el ta djobe-m i el ta fla-m: ‘Diskulpa-m, é ku mi ki bu sta ta pâpia?’”
TEN TRÊS KONSEDJU KI NU PODE DA LEIA.
Grita ku se pai.
Leia grita: “Ó ómi di Deus, obi kuzê ki N sta fla-u!”
Ka pâpia ku se pai más.
Leia ta rezolve dizisti di pâpia ku se pai sobri se prubléma.
Spéra óra sértu, pa torna pâpia sobri kel asuntu.
Leia ta pâpia ku se pai frénti-frénti na otu óra ô el ta skrebe se pai un karta sobri se prubléma.
Di kes 3 konsedju li, kal ki bu ta daba Leia?
PENSA NA KEL-LI: Pai di Leia staba distraídu – i nen el ka da kónta ma Leia staba ku algun prubléma. Nton si Leia obi ku Konsedju 1, se pai pode nen ka ntende pamodi ki el sta grita. Grita difisilmenti ta poi se pai fika ku gana di pâpia ku el i tanbê ta mostra falta di ruspetu pa se pai. (Efésios 6:2 ) Nton, kel konsedju li ka ta djuda ningen.
Óras ki bu atxa un kaminhu tapadu, bu ta djobe otu kaminhu. Tanbê bu meste djobe un manera di pâpia ku bu pai i ku bu mai, ki nhos ka ta ten prubléma
Talvês Konsedju 2 pode parse más sinplis, má é ka midjór soluson. Pamodi? Leia meste pâpia ku se pai pa djuda-l rezolve se prubléma. I si el dizisti di pâpia ku se pai, modi ki el ta pode djuda-l? Nton, fika kaladu é ka soluson.
I Konsedju 3? Si Leia skodje otu óra pa el pâpia di se prubléma, é sima si el ka ta dexa nada inpidi-l di pâpia ku se pai. I si el skodje skrebe se pai un karta, pode ser ki na kel óra Leia pode xinti más midjór.
Skrebe karta, tanbê pode djuda-l fla se pai tudu kel ki el sta ta xinti. Óras ki se pai lé kel karta el ta ntende kuzê ki Leia krê flaba el, asi el ta konsigi djuda-l. Bu ka ta atxa ma konsedju 3 ta djuda es tudu dôs, Leia ku se pai? Si bu pâpia sobri bu prubléma frénti-frénti ô através di karta, bu sta ta sigi un konsedju di Bíblia ki ta fla pa nu ‘npenha pa kuzas ki ta traze pas’. – Romanos 14:19.
Kuzê más ki Leia pode faze?
Pensa na un otu konsedju i na kal ki pode ser rezultadu?
TOMA KUDADU PA BU KA POI BU PAI KU BU MAI PENSA MARIADU
Lenbra ma alvês bu ta fla un kuza, má bu pai ku bu mai pode ntende otu.
IZÉNPLU:
Bu pai ku bu mai pode repara ma bu ka sta kontenti, es pode pergunta-u pamodi ki bu tene róstu runhu. Bu ta fla-s: “N ka krê pâpia sobri kel asuntu li.”
Bu pai ku bu mai pode ntende ma bu sta ta pensa: “N ka ta kúnfia na nhos. N ta prifiri konta nhas amigu nhas prubléma, má anhos nau.”
Imajina ki bu sta pasa pa un prubléma difísil i bu pai ku bu mai fla ma es krê djuda-u. Si bu fla-s: “Ka nhos preokupa, N sabe kuzê ki N debe faze.”
Kuzê ki bu ta atxa ma bu pai ku bu mai pode pensa?
Kal ki é midjór respósta ki bu pode daba?