Bu ta lenbra?

Bu lé tudu artigu di Sentinéla di es anu li? Nton, tenta responde kes pergunta li:

Kuzê ki ta pô-nu ta da Jeová glória?

Nu ta faze kel-li pamodi nu ten grandi ruspetu pa Jeová i nu ta ama-l txeu. Tanbê nu ta da-l glória pamodi nu krê pa otus algen konxe-l. — w25.01, p. 3.

Si un algen ofende-nu, modi ki nu pode púrdua más txeu?

Envês di iginora nos sentimentu, nu ta sforsa pa nu ka guarda rankor, i kel-li ta djuda-nu ka dexa magua afeta manera ki nu ta trata otus algen. — w25.02, pp. 15-16.

Pamodi ki disiplu Markus é un bon izénplu pa irmons jóven?

Markus staba prontu pa seta un diziginason pa sirbi otus algen. Enbóra talvês Markus fika maguadu i diziludidu pamodi un situason, el ka dizisti. El bira txeu amigu di Paulu i di otus irmon maduru. — w25.04, p. 27.

Kuzê ki Jizus krê flaba kantu el ora: “N pô-s ta konxe bu nómi”? (Juan 17:26)

Ses disiplu dja sabia ma nómi di Deus é Jeová. Má Jizus staba ta pô-s ta konxe Kel algen ki ten kel nómi ki é Jeová. Kel-li ta inklui Se vontadi, kuzas ki El ta faze i Se kualidadis. — w25.05, pp. 20-21.

Kuzê ki nu ta rekonhese si nos é umildi?

Nu ta rekonhese ma nu ka sabe tudu kuza. Pur izénplu, nu ka sabe ki ténpu ki fin di kel mundu li ta ben ô modi ki Jeová pode aji na kel ténpu. Nen nu ka sabe kuzê ki ta ben kontise manhan ô ti ki pontu Jeová konxe-nu. — w25.06, pp. 15-18.

Modi ki un artigu ô un diskursu pa públiku pode djuda-nu?

Nu pode pensa na kes pergunta li: ‘Ki próvas el sta ta uza pa konvense kes algen ki sta ta mostra interesi na kes verdadi di Bíblia? El uza algun ilustrason ki N pode uza óras ki N ta inxina kes verdadi la pa otu algen? Ken ki pode sta interesadu na kel asuntu li?’ — w25.07, p. 19.

Kuzê ki N pode prende ku manera ki Jeová púrdua Davidi?

Enbóra Davidi faze pekadus gravi, kantu el rapende di korason, Jeová purdua-l. (1 Reis 9:4, 5) Óras ki Jeová ta púrdua nos pekadu, el ka ta lenbra más di es. Kel-li krê fla ma el ka ta kastiga-nu pamodi kes éru ki nu faze na pasadu i nen el ka ta uza kes éru kóntra nos na futuru. — w25.08, p. 17.

Si nos studanti di Bíblia ka sta ta intende un kuza, kuzê ki nu pode faze?

Si el ka sta ta intende un kuza dipôs ki dja nu tenta inxina-l kuzê ki Bíblia ta fla, nu ka meste kontinua ta pâpia sobri kel asuntu. É midjór nu kontinua studu i nu ta torna pâpia sobri kel asuntu na otu óra. — w25.09, p. 24.

Bíblia ta fla ma pekadu ten ‘puder di ingana’. (Ebr. 3:13) Modi ki el ta faze kel-li?

Pekadu pode pô-nu ta faze kuzas mariadu. Tanbê el pode pô-nu ta ten dúvidas si Jeová ta ama-nu. — w25.10, p. 16.

Ki três kuza pode djuda-nu ora di manera ki ta pô-nu ta bira más amigu di Jeová?

(1) Nu pode pensa na kes kualidadi di Jeová. (2) Nu pode pensa na kes kuza ki nu sta ta pasa pa es i ora sobri es, sima óras ki nu meste púrdua un algen. (3) Nu debe faze orason sen présa, asi nu ta konsigi fla Jeová más dretu modi ki nu sta xinti. — w25.10, pp. 19-20.

Modi ki nu pode djuda kes irmon di idadi?

Nu pode txoma i vizita kes irmon di idadi. Tanbê nu pode bai djuntu ku es pa dotor ô nu pode trabadja djuntu ku es na pregason di maneras diferenti. — w25.11, pp. 6-7.

Ki prinsípius di Bíblia pode djuda un kazal onra Jeová na di dia ses kazamentu?

Obi ku kes lei di govérnu. Sforsa pa kel serimónia i fésta di kazamentu mostra kes kualidadi di frutu di spritu santu di Deus. Bisti ropa modéstu i nega kes kustumu ki ka sta di akordu ku Bíblia. Nhos pâpia klaru i ku ruspetu óras ki nhos ta faze planu pa nhos kazamentu. — w25.12, pp. 21-24.