Irmons di idadi, nhos ten txeu valor pa kongregason

Talvês, bo tanbê, dja bu ka ta konsigi faze txeu kuza ki bu ta fazeba kantu bo éra jóven. Enbóra dja bu ten txeu anu ta sirbi Jeová di manera fiel, óras ki bu ta konpara kel ki bu ta fazeba antis pa Jeová ku kel ki bu ta faze gósi, bu pode xinti dizanimadu. Si kel-li sta ta kontise ku bo, kuzê ki pode djuda-u ten alegria?

KUZÊ KI JEOVÁ TA SPERA DI BO?

Faze kel pergunta li: ‘Kuzê ki Jeová ta spera di mi?’ Bu pode atxa konsolu na kes palavra ki sta na Deuteronómiu 6:5, ki ta fla: “Bu debe ama Jeová, bu Deus, di tudu bu korason, di tudu bu alma i di tudu bu forsa.”

Di akordu ku kel versiklu li, Jeová ta spera pa bu sirbi-l di tudu bu korason, alma i forsa. Kel-li pode djuda-u evita konpara bo mê ku otus algen, ô ti mésmu konpara kel ki bu ta faze gósi ku kel ki bu ta pode fazeba antis.

Pensa na kel-li: kantu bo éra jóven kuzê ki bu ta fazeba pa Jeová? Talvês bu da Jeová bu midjór, di akordu ku bu situason na kel ténpu. Kuzê ki bu ta pode da Jeová gósi? Talvês bu sta ta faze bu midjór di akordu ku kel situason ki bu sta na el gósi, kel-li krê fla kel ki bu ta pode faze gósi. Si bu pensa di kel manera li, bu ta da kónta ma kel ki bu sta ta faze gósi é igual ku kel ki bu faze pa Jeová na pasadu. Bu faze bu midjór na pasadu i bu sta ta faze bu midjór gósi.

KUZÊ KI BU PRENDE NA VIDA PODE DJUDA OTUS ALGEN

Envês di atxa ma bu ka ta pode faze txeu kuza pamodi bu idadi, pensa na kes txeu oportunidadi ki bu ten pa djuda otus algen. Gósi ki dja bu sta di idadi, bu pode faze alguns kuza ki bu ka ta pode fazeba kantu bo éra jóven. Pur izénplu, bu pode faze kel-li:

Konta otus algen bus spiriénsia. Odja kuzê ki Bíblia ta fla na kes versiklu li:

Rei Davidi: ‘Ami éra jóven i gósi N sta algen grandi, má nunka N ka odja un algen justu bandonadu, nen se fidjus ta djobe pon.’ — Sal. 37:25.

Juzué: “Nhos odja! N sta kuazi ta móre, i nhos sabe dretu, di tudu nhos korason i di tudu nhos alma, ma di tudu kes bon promésa ki Jeová, nhos Deus, faze nhos, ka ten ninhun palavra na es ki fadja. Tudu es kunpri pa nhos. Ka ten un di es ki fadja.” — Juz. 23:14.

Talvês dja bu fla kuzas sima kes-li. Davidi i Juzué pâpia di kuzas ki kontise na ses vida. Pamodi kes sérvu fiel di Jeová li fla kuzas ki es odja i ki es obi duránti txeu anu, kuzê ki es fla ta djuda-nu mutu más txeu.

Si dja bu ten txeu anu ta sirbi Jeová, bo tanbê bu pode pâpia ku otus sobri kes kuza ki bu odja Jeová ta faze pa bo i pa otus algen. Bu ta lenbra di algun bês ki bu odja Jeová ta bensua se povu di manera spesial? Si sin, pâpia ku otus algen sobri kel-li! Óras ki bu ta konta otus algen bu spiriénsia, bu ta fika más animadu. Tanbê óras ki bu ta pâpia ku otus algen sobri kes spiriénsia ki bu tevi na sirvisu pa Jeová, es pode fika inkorajadu. — Rom. 1:11, 12.

Un otu manera ki bu pode inkoraja otus algen é óras ki bu ta sisti runion na Salon di Reinu, sénpri ki bu ta pode. Óras ki bu ta faze kel-li, bu pode inkoraja bus irmon ku irmans i bu pode xinti inkorajadu tanbê. Connie, ki dja nu papiaba di el antis, fla: “Sisti runion na Salon di Reinu sta ta djuda-m pa N ka fika dizanimadu. Ka ta da pa N fika dizanimadu ku tantu amor ki N ta resebe na Salon di Reinu. N ta tenta mostra gratidon pa irmons óras ki N ta da-s prezenti sinplis. N ta sforsa pa N kontinua ta partisipa na atividadis spritual djuntu ku nhas irmon ku irmans.”

JEOVÁ TA DA VALOR PA BU SIRVISU FIEL

Bíblia sta xeiu di izénplu di pesoas ki pamodi ses limitason, es ka ta pode fazeba kel ki es ta gostaba, má Jeová ta amaba es. Odja izénplu di Simion, un israelita ki dja staba algen di idadi kantu Jizus nase. Óras ki Simion ta baba pa ténplu, talvês el ta odjaba ómis ki inda staba jóven ta faze trabadjus inportanti na ténplu. Má i Simion? Talvês el ta pensaba ma pamodi se idadi, el tinha poku valor pa Jeová. Má Jeová ta odjaba kuzas di manera diferenti. Pa Jeová, Simion éra un ómi “justu ki ta ruspetaba lei di Deus”, i el abensua-l ku priviléjiu di odja Jizus kantu el éra bebé. Jeová ti mésmu uza Simion pa faze un profesia sobri Jizus ma el ta biraba kel Misías ki staba pa ben! (Luk. 2:25-35) Jeová ka konsentra na kes limitason ki Simion tinha pamodi se idadi. Ta fika klaru ma “spritu santu staba riba di el” i Jeová ta konsentraba na kel fé fórti ki el tinha.

Bo tanbê, bu pode ten serteza ma Jeová ta da valor pa bu sirvisu fiel pa el, sikrê ten txeu kuza ki bu ka ta pode faze. Pa Jeová un sakrifisiu “ta setadu ku alegria si kel algen da di akordu ku kel ki el ten, ka di akordu ku kel ki el ka ten.” — 2 Kor. 8:12.

Pur isu, konsentra na kel ki bu ta pode faze. Pur izénplu, pensa na maneras diferenti ki bu pode prega, sikrê bu ta pode pasa poku ténpu ta prega. Tanbê bu pode inkoraja bus irmon ku irmans óras ki bu ta txoma-s ô skrebe-s un karta. Óras ki un algen sima bo, ki sta ta sirbi Jeová dja ten txeu anu, ta faze kuzas sinplis ki ta mostra amor, kel-li pode inkoraja nos irmons ku irmans txeu.

Sikrê ku limitason bu pode faze txeu pa Jeová. Odja spiriénsia di un irman na Áfrika, na kuadru “El salva se vida”.

Lenbra ma bu sta ta sirbi Jeová dja ten txeu anu i bu sta kontinua ta ser lial pa el. Bu izénplu pode inkoraja otus algen txeu. Bo é un izénplu di algen ki aguenta firmi i bu pode ten serteza ma ‘Deus é ka injustu pa skese di bu óbra i di amor ki bu mostra pa se nómi, pamodi bu sirbi kes santu i bu kontinua ta sirbi-s.’ — Ebr. 6:10.

KONTINUA OKUPADU TA DJUDA OTUS ALGEN

Studus ta mostra ma txeu ómi ku mudjer di idadi ki ta sta okupadu ta djuda otus ten un saúdi midjór, es ta pensa más dretu i es ta vive más txeu.

É klaru ki faze kuzas dretu pa djuda otus ka ta ba kaba ku tudu kes prubléma pamodi bedjisa. É sô Reinu di Deus ki ta ben faze kel-li, óras ki el ben kaba ku kuzê ki ta pô-nu ta bira bédju i ta móre, ki é pekadu ki nu erda di Adon. — Rom. 5:12.

Má mésmu gósi, bu sirvisu pa Jeová ta inklui djuda otus algen konxe-l. Kel-li ta bira bu speransa más fórti i ti pode midjora bu saúdi. Irmons di idadi, favor, ka nhos skese ma Jeová ta da valor pa nhos sirvisu pa el i kongregason tanbê ta da valor pa nhos izénplu di fé.