Perguntas ki leitoris ta faze

Ka ta dura ki “pensamentu” Jeová ta ben poi na korason di govérnus?

Sobri komésu di grandi tribulason, Apokalipse 17:16, 17 ta fla: “Kes 10 txifri ki bu odja i kel féra ta ben ôdia kel prostituta. Es ta ben toma-l tudu kuza ki el ten i es ta dexa-l nu. Es ta kume se karni i es ta kema-l tudu na lumi. Pamodi Deus pô-s na korason kel dizeju di faze kel ki sta na se pensamentu, sin, pa es kunpri kel mésmu pensamentu ki es ten di da féra ses reinu”. Na pasadu, nos publikason ta flaba ma kel “pensamentu” ki Jeová ta ben poi na korason di govérnus é di distrui relijion falsu.

Má, meste fazedu un mudansa na kel intendimentu li. Kel “pensamentu” ki Jeová ta ben poi na korason di kes govérnu é di da “féra ses reinu.” Pa nu intende modi ki kel profesia li ta ben kunpri, nu ta ben responde alguns pergunta.

Di kenha ki kel profesia li sta ta pâpia di el? “Kel prostituta” ki tanbê ta txomadu di “Babilónia Grandi” ta reprizenta tudu relijion falsu. Kel “féra kor brumedju” ta reprizenta Nasons Unidu ki kriadu na anu di 1919 pa poi pas na mundu. Antis el éra txomadu di Liga di Nasons. (Apo. 17:3-5) “Kes 10 txifri” ta reprizenta tudu kes govérnu ki ta apoia kel féra di kor brumedju.

Ki tipu di amizadi kel prostituta ten ku kel féra di kor brumedju? Kel prostituta sta “xintadu riba” di kel féra. Kel-li krê fla ma el ta apoia-l i el ta tenta kontrola-l.

Kuzê ki ta ben kontise ku kel prostituta? Kel féra djuntu ku kes 10 txifri ki ta apoia-l, ta ben “ôdia kel prostituta”. Es ta ben xinti tantu ôdiu di el, ki es ta ben toma-l tudu ses rikéza i es ta ben mostra tudu algen modi ki el é mau. I es ta ben distrui-l, sima Jeová dja flaba ma ta ben kontiseba. (Apo. 17:1; 18:8) Kel-li ta ben ser fin di tudu relijion falsu. Má, antis di kel-li kontise, Jeová ta ben poi govérnus ta faze un kuza ki nunka ka kontiseba antis.

Kuzê ki Jeová ta ben poi kes govérnu ta faze? El ta ben poi na korason di kes govérnu “se pensamentu,” ki é “da féra ses puder i autoridadi.” Kel féra di kor brumedju ta reprizenta Nasons Unidu. (Apo. 17:13) Pensa na kuzê ki kel-li krê fla. Kes govérnu di ómi ta ben disidi di es pa es da ses puder i autoridadi pa kel féra? Nau! Kel profesia ta mostra ma é própi Deus ki ta ben pô-s ta faze kel-li. (Pro. 21:1; konpara ku Isaías 44:28.) Kel mudansa li ta ben kontise poku-poku? Nau! Kel-li ta ben kontise dirapenti. Dipôs, kel féra ta uza puder ki el resebe pa kunpri kel julgamentu di Jeová kóntra tudu relijion falsu. El ta distrui-s pa tudu ténpu.

Nton, kuzê ki nu pode spera ma ta ben kontise? Nu ka pode spera odja notísias ta fla ma govérnus ta ben da Nasons Unidu más puder poku-poku. Kuzê ki nu pode spera é ma dirapenti Jeová ta ben poi tudu kes govérnu ta da ses puder pa Nasons Unidu. Óras ki kel-li kontise, nu ta sabe ma grandi tribulason sta kuazi ta kumesa. Pur isu, “nu fika kordadu i nu mante sienti” pamodi ka ta dura kes mudansa li ta ben kontise dirapenti! — 1 Tes. 5:6.