Naq tqasikʼ li naʼlebʼ li jwal wank xwankil saʼ li qayuʼam, tento tqatzʼil rix «bʼar wank li rajom li Jehobʼa» ut xyuʼaminkil (Efes. 5:17). Naq naqasikʼ ebʼ li naʼlebʼ li wank saʼ li Santil Hu, yooko xsikʼbʼal kʼaru naxkʼoxla li Yos chirix li naʼlebʼ aʼan. Naq naqayuʼami ebʼ li naʼlebʼ aʼin, naru naq us li tqasikʼ xbʼaanunkil. «Li Maaʼus», aʼ laj Tza, twulaq raj chiru rilbʼal naq laatzʼaq qu chi xbʼaanunkil li xnaʼlebʼ li ruuchichʼochʼ ut naq maakʼaʼaq qahoonal re kʼanjelak chiru li Yos (1 Juan 5:19). Naru naq saʼ junpaat taaxik qachʼool chirix li tumin, li tzolok malaj li kʼanjel ut inkʼaʼ tqasikʼ xkʼebʼal xkomon qakʼanjel chiru li Jehobʼa. Wi tqakʼul raj aʼin, aweʼ tixkʼutbʼesi naq yooko chi kʼoxlak joʼ li ruuchichʼochʼ. Yaal naq moko maak ta xbʼaanunkil ebʼ li naʼlebʼ aʼin, abʼan maajunwa tqakʼe xbʼeenwa saʼ li qayuʼam. w24.03 24 raqal 16, 17

Saʼ li raqal aʼin naqataw wiibʼ xnimal ru naʼlebʼ: 1) li tiikebʼ xchʼool nekeʼxnumsi chʼaʼajkilal ut 2) li Jehobʼa naxkolebʼ. Jun li naʼlebʼ li naxbʼaanu li Jehobʼa aʼan qatenqʼankil chi xkʼulubʼankil chanru li qayuʼam anaqwan. Yaal naq li Jehobʼa naxye qe naq wi naqaloqʼoni ru sahaq saʼ qachʼool, abʼan inkʼaʼ naraj xyeebʼal naq maakʼaʼaq qachʼaʼajkilal anaqwan (Is. 66:14). Li Yos naraj naq tqakʼojobʼ qachʼool chirix li oybʼenihom li naxyeechiʼi qe; aʼan li naraj choʼq qe (2 Cor. 4:​16-18). Abʼan, nokooxtenqʼa chi kʼanjelak chiru wulaj wulaj (Lam. 3:​22-24). Kʼaru naqatzol chirix ebʼ li eetalil li wank saʼ li Santil Hu ut saʼebʼ li qakutan? Wank sut tqakʼul li chʼaʼajkilal chi maakʼaʼ saʼ qachʼool. Abʼan, wi naqakʼojobʼ qachʼool rikʼin li Jehobʼa, junelik tooxtenqʼa (Sal. 55:23). w23.04 14, 15 raqal 3, 4

Naru naqatzol naabʼal rikʼin laj José ut li xMaría. Aʼanebʼ junelik xeʼabʼink chiruhebʼ li wankebʼ xwankil usta wank sut chʼaʼaj xbʼaanunkil (Luc. 2:​1-6). Jun eetalil, naq ak naxkʼam bʼeleebʼ po wank saʼ yuʼam li xMaría kichʼaʼajkoʼk chiru abʼink. Li awabʼej re Roma laj César Augusto kixye naq t-ajlaaq li tenamit. Re xpaabʼankil li chaqʼrabʼ aʼin, laj José ut li xMaría tento teʼxik Belén. Aʼin naraj xyeebʼal naq tento teʼbʼihajiq 150 kilómetro saʼ jun li bʼe li jwal xiikʼ. Choʼq re li xMaría chʼaʼaj xbʼaanunkil li bʼihaaj aʼin. Maare xeʼok xkʼaʼuxl chirix kʼaru tixkʼul li kʼuulaʼal ut li xMaría. Ut wi tyoʼlaaq li kʼuulaʼal naq yookebʼ chi xik? Li kʼuulaʼal li tyoʼlaaq rikʼin li xMaría aʼan li Mesiiy! Ma kixkʼoxla naq aʼan jun xyaalal naq tixqʼet ribʼ chiru li chaqʼrabʼ? Laj José ut li xMaría inkʼaʼ xeʼroksi ebʼ li naʼlebʼ aʼin re xqʼetbʼal li chaqʼrabʼ. Ut saʼ xkʼabʼaʼ naq xeʼabʼink li Jehobʼa kirosobʼtesihebʼ: li xMaría kiwulak Belén, kaw ribʼ li kʼuulaʼal naq kiyoʼlaak ut chi joʼkan kitzʼaqlok ru jun li propesiiy (Miq. 5:2). w23.10 8 raqal 9; 9 raqal 11, 12