Bansangu ya Ntete

19 Na nima, Nahashi ntotila ya bantu ya Amoni fwaka, mpi mwana na yandi kumaka ntotila na kisika na yandi.+ 2 Ebuna Davidi tubaka nde: “Mono ta monisila Anuni mwana ya Nahashi zola ya kwikama+ sambu tata na yandi monisilaka mono zola ya kwikama.” Yo yina Davidi tindaka binati-nsangu sambu bo kwenda kulembika yandi sambu na lufwa ya tata na yandi. Kansi ntangu bansadi ya Davidi kumaka na insi ya bantu ya Amoni+ sambu na kulembika Anuni, 3 bamfumu ya bantu ya Amoni tubilaka Anuni nde: “Keti nge ke yindula nde Davidi ke pesa tata na nge lukumu na mutindu yandi me tinda bantu sambu na kulembika nge? Keti bansadi na yandi me kwisa ve kisika na nge sambu na kutala mbote-mbote, kubwisa nge, mpi kutala insi na mayele?” 4 Yo yina Anuni bakaka bansadi ya Davidi mpi zengaka bo mandefo,+ yandi zengaka bilele na bo na kati-kati na nsi ya luketo* na bo, ebuna yandi songaka bo na kuvutuka. 5 Ntangu bo songaka Davidi mambu ya bantu yina, na mbala mosi yandi tindaka bantu ya nkaka na kukutana ti bo, sambu bo pesaka bantu yina nsoni mingi kibeni; ebuna ntotila songaka bo nde: “Beno bikala na Yeriko+ tii kuna mandefo na beno ta yela diaka, ebuna beno kwisa kuvutuka.”

6 Na nima, bantu ya Amoni monaka nde bo kumaka kima ya nsudi ya mbi sambu na Davidi, yo yina Anuni mpi bantu ya Amoni tindaka bantu ti batalanta* 1 000 ya arza sambu na kudefa bapusu-pusu mpi bantu yina ke tambusaka bampunda na Mezopotamia,* na Arami-maaka, mpi na Soba.+ 7 Yo yina bo defaka bapusu-pusu 32 000 kumosi ti ntotila ya Maaka mpi bantu na yandi. Na nima, bo kwisaka mpi salaka camp na ntwala ya Medeba.+ Bantu ya Amoni katukaka na bambanza na bo, bo vukanaka, mpi bo basikaka sambu na bitumba.

8 Ntangu Davidi waka diambu yai, yandi tindaka Yoabi+ ti basoda yonso, mpi basoda na yandi ya kuluta ngolo.+ 9 Bantu ya Amoni basikaka mpi yilamaka sambu na bitumba na munoko ya mbanza, kansi bantotila yina kwisaka vandaka bo mosi na nseke.

10 Ntangu Yoabi monaka nde bo vandaka kunwanisa yandi na ntwala mpi na nima, yandi solaka ndambu ya basoda ya kuluta mbote ya Izraele mpi tulaka bo na ndonga ya bitumba sambu bo kutana ti bantu ya Siria.+ 11 Yandi tulaka bantu yina bikalaka na nsi ya kiyeka* ya mpangi na yandi Abishai,+ sambu na kutula bo na ndonga ya bitumba sambu bo kutana ti bantu ya Amoni. 12 Ebuna yandi tubaka nde: “Kana bantu ya Siria+ kuluta mono na ngolo, nge fwete kwisa kusadisa mono; kansi kana bantu ya Amoni kuluta nge na ngolo, mono ta kwisa kusadisa nge. 13 Beto fwete vanda ngolo mpi kikesa+ sambu na bantu na beto mpi sambu na bambanza ya Nzambi na beto, ebuna Yehowa ta sala mambu yina kele mbote na meso na yandi.”

14 Ebuna Yoabi ti bantu na yandi pusanaka sambu na kunwana ti bantu ya Siria, mpi bo tinaka na ntwala na yandi.+ 15 Ntangu bantu ya Amoni monaka nde bantu ya Siria me tina, bo mpi tinaka mpangi na yandi Abishai mpi bo kotaka na mbanza. Na nima, Yoabi kwisaka na Yeruzalemi.

16 Ntangu bantu ya Siria monaka nde Izraele me bedisa bo, bo tindaka binati-nsangu sambu na kubinga bantu ya Siria yina vandaka na ntoto yina kele pene-pene ya Nzadi,*+ mpi Shofaki mfumu ya basoda ya Adadezere vandaka kutwadisa bo.+

17 Ntangu bo songaka Davidi mambu yina, na mbala mosi yandi vukisaka Izraele ya mvimba, sabukaka Yordani, kwisaka kisika bo vandaka, mpi yandi yilamaka sambu na kunwana ti bo. Davidi yilamaka sambu na bitumba sambu na kukutana ti bantu ya Siria, mpi bo nwanaka ti yandi.+ 18 Kansi bantu ya Siria tinaka Izraele; ebuna Davidi fwaka bantu 7 000 ya ke nataka bapusu-pusu ti basoda 40 000 ya Siria ya ke tambulaka na makulu, mpi yandi fwaka Shofaki mfumu ya basoda na bo. 19 Ntangu bansadi ya Adadezere monaka nde Izraele+ me bedisa bo, bo salaka ngemba ti Davidi kukonda kusukinina mpi bo kumaka bantu na yandi;+ bantu ya Siria zolaka diaka ve kusadisa bantu ya Amoni.