Bansangu ya Zole

13 Na mvula ya 18 ya ntotila Yeroboami, Abiya kumaka ntotila ya Yuda.+ 2 Yandi yalaka bamvula tatu na Yeruzalemi. Zina ya mama na yandi Mikaya+ mwana ya Uriele muntu ya Gibea.+ Bitumba vandaka na kati ya Abiya ti Yeroboami.+

3 Ebuna Abiya kwendaka na bitumba ti basoda ya ngolo 400 000 ya me zaba bitumba mbote.*+ Mpi Yeroboami yilamaka sambu na kunwana ti yandi; Yeroboami nataka basoda 800 000 ya ngolo ya me zaba bitumba mbote.* 4 Abiya telamaka na Ngumba ya Semarayimi, yina kele na ntoto ya bangumba ya Efrayimi, mpi tubaka nde: “Beno wa mono, O Yeroboami mpi Izraele ya mvimba. 5 Keti beno me zaba ve nde Yehowa Nzambi ya Izraele pesaka Davidi kimfumu na Izraele kimakulu,+ yandi ti bana na yandi,+ na nzila ya kuwakana ya mungwa?*+ 6 Kansi Yeroboami+ mwana ya Nebati, nsadi ya Salomo mwana ya Davidi, telamaka mpi kolamaka na ntwala ya mfumu na yandi.+ 7 Ebuna bamolo, bantu ya kukonda mfunu landaka kuvukana ti yandi. Mpi bo lutaka Rehoboami mwana ya Salomo na ngolo ntangu yandi vandaka leke mpi kikesa ve, ebuna yandi kukaka ve kunwana ti bo.

8 Ntangu yai beno ke yindula nde beno ta kuka kunwanisa kimfumu ya Yehowa yina kele na maboko ya bana ya Davidi, sambu beno kele kimvuka ya nene ya bantu mpi beno kele ti bana ya bangombe ya wolo yina Yeroboami salaka sambu yo vanda banzambi na beno.+ 9 Keti beno me kulaka ve banganga-nzambi ya Yehowa,+ bana ya Aroni, ti Balevi, mpi keti beno me tulaka ve banganga-nzambi na beno mosi bonso bantu ya bansi ya-nkaka?+ Konso muntu yina ke kwisa kunata* mwana-ngombe mpi mameme ya babakala nsambwadi lenda kuma nganga-nzambi ya bima yina kele ve banzambi. 10 Kansi beto, Yehowa kele Nzambi na beto,+ mpi beto me yambulaka yandi ve; banganga-nzambi na beto, bana ya Aroni, ke sadila Yehowa, mpi Balevi ke sadisa bo na kisalu. 11 Bo ke yokilaka Yehowa makabu ya kuyoka konso suka mpi konso nkokila+ kumosi ti ndumbu ya nsudi ya kitoko,+ mampa ya kutetika*+ kele na mesa ya wolo ya kukonda kuvukisa ti kima ya nkaka, mpi bo ke pedisa kima ya kutudila minda ya wolo+ ti minda na yo konso nkokila,+ sambu beto ke lungisa kisalu na beto na ntwala ya Yehowa Nzambi na beto; kansi beno, beno me yambulaka yandi. 12 Ntangu yai tala! Nzambi ya kieleka kele ti beto, yandi ke twadisa beto; banganga-nzambi na yandi mpi bampungi ya bo ke bulaka sambu na kusonga nde beto kele na bitumba ti beno kele awa. O bantu ya Izraele, beno nwana ve ti Yehowa Nzambi ya ba-nkaka na beno, sambu beno ta nunga ve.”+

13 Kansi Yeroboami tindaka bantu bo bumbana sambu na kubasikila bo na nima, yo yina bo vandaka na ntwala ya bantu ya Yuda mpi bantu yina bumbanaka vandaka na nima na bo. 14 Ntangu bantu ya Yuda balukaka, bo monaka nde bo fwete nwana bitumba na ntwala mpi na nima. Yo yina bo yantikaka kudidila Yehowa,+ mpi banganga-nzambi vandaka kubula bampungi ngolo. 15 Bantu ya Yuda yantikaka kutula milolo ya bitumba, ebuna ntangu bo tulaka milolo ya bitumba, Nzambi ya kieleka bedisaka Yeroboami ti Izraele ya mvimba na ntwala ya Abiya mpi Yuda. 16 Bantu ya Izraele tinaka na ntwala ya bantu ya Yuda, mpi Nzambi pesaka bo na maboko na bo. 17 Abiya ti bantu na yandi fwaka bantu ya Izraele mingi kibeni, mpi bantu ya Izraele landaka kubwa mpi kufwa, babakala 500 000 ya me zaba bitumba mbote.* 18 Na mutindu yina, bo kulumusaka bantu ya Izraele na ntangu yina, kansi bantu ya Yuda lutaka bo na ngolo sambu bo tulaka ntima* na Yehowa Nzambi ya ba-nkaka na bo.+ 19 Abiya landaka kukudikisa Yeroboami mpi botulaka yandi bambanza yai: Betele+ ti babwala yina kele na nziunga na yo, Yeshana ti babwala yina kele na nziunga na yo, mpi Efrayini+ ti babwala yina kele na nziunga na yo. 20 Mpi Yeroboami vutukilaka diaka ve ngolo na yandi na ntangu ya Abiya; ebuna Yehowa bulaka yandi mpi yandi fwaka.+

21 Kansi Abiya kumaka ngolo mingi. Na nima yandi kwelaka bankento 14,+ mpi yandi butaka bana-babakala to 22 ti bana-bankento 16. 22 Mpi disolo ya luzingu ya Abiya yina me bikala, bisalu na yandi mpi bangogo na yandi, bo me sonikaka yo na masonama* ya mbikudi Ido.+