Ezekiele
30 Ndinga ya Yehowa kwisilaka mono diaka nde: 2 “Mwana ya muntu, bikula mpi tuba nde, ‘Yehowa Mfumu ya Kuluta Nene me tuba nde:
“Beno dila nde, ‘A mawa, kilumbu ke kwisa!’
3 Sambu kilumbu me finama, ee, kilumbu ya Yehowa me finama.+
Yo ta vanda kilumbu mosi ya matuti,+ ntangu ya bo me tulaka sambu na makanda.+
4 Mbele ya bitumba ta kwisi- la Ezipte, ebuna boma ya ngolo ta simba Etiopia ntangu bantu yina bo ta fwa ta bwa na Ezipte;
Bo ta baka kimvwama na yo mpi ta buka bafondasio na yo.+
5 Etiopia,+ Puti,+ Ludi, ti bantu ya mutindu na mutindu,*
Mpi Kubi, kumosi ti bana ya insi ya kuwakana,*
Bo yonso ta bwa na mbele ya bitumba.”’
6 Yehowa me tuba nde:
‘Bantu ya ke sadisaka Ezipte mpi ta bwa,
Ebuna bo ta bwisa luyalu na yo ya lulendo.’+
“‘Katuka na Migdole+ tii na Siene,+ bo ta bwa na mbele ya bitumba na insi,’ Yehowa Mfumu ya Kuluta Nene muntu me tuba. 7 ‘Bo ta kumisa yo mayumbu kuluta bansi yina me bikalaka mayumbu, mpi bambanza na yo mosi ta kuma bambanza ya kubeba kuluta bambanza ya kubeba.+ 8 Ebuna bo ta zaba nde mono kele Yehowa ntangu mono ta tula tiya na Ezipte mpi ntangu bo ta fwa banduku na yo yonso. 9 Na kilumbu yina, mono ta tinda binati-nsangu na bamaswa sambu na kusala na mpila nde Etiopia yina ke kuditudila ntima kutekita; boma ya ngolo ta simba bo na kilumbu yina ke kwisa na zulu ya Ezipte, sambu yo ta kwisa kibeni.’
10 “Yehowa Mfumu ya Kuluta Nene me tuba nde: ‘Mono ta sukisa bimvuka ya nene ya bantu ya Ezipte na nsadisa ya diboko ya Nebukadenezare* ntotila ya Babilone.+ 11 Bo ta kwisa kunata yandi ti basoda na yandi, makanda ya kuluta nku,+ sambu na kufwa insi yina. Bo ta basisa bambele na bo ya bitumba sambu na kunwanisa Ezipte mpi ta fulusa insi yina ti bantu ya bo ta fwa.+ 12 Mono ta kumisa tu-bamasa ya Nile+ ntoto ya kuyuma mpi ta teka insi na maboko ya bantu ya mbi. Mono ta sala nde insi mpi bima yonso ya kele na kati kubikala mayumbu na maboko ya banzenza.+ Mono mosi Yehowa, muntu me tuba.’
13 “Yehowa Mfumu ya Kuluta Nene me tuba nde: ‘Mono ta fwa mpi biteki ya nzanzi* mpi ta tula nsuka na banzambi ya kukonda mfunu ya Nofi.*+ Yo ta vanda diaka ve ti mfumu yina kele muntu ya insi ya Ezipte, mpi mono ta tula boma na insi ya Ezipte.+ 14 Mono ta kumisa Patrosi mayumbu,+ ta tula tiya na Soani, mpi ta pesa No* ndola.+ 15 Mono ta wila Sini makasi, kisika ya ngolo ya lutaninu ya Ezipte, mpi mono ta fwa bantu ya No. 16 Mono ta tula tiya na Ezipte; ebuna boma ta simba Sini, bo ta tobula-tobula No, mpi bo ta nwanisa Nofi* na kati-kati ya ntangu! 17 Baleke-babakala ya Oni* mpi ya Pibeseti ta bwa na mbele ya bitumba, ebuna bambanza yina ta kwenda na kimpika. 18 Na Tapanesi, mwini ta kuma ndombe ntangu mono ta buka banti ya vangu ya Ezipte kuna.+ Ngolo na yandi ya lulendo ta kuma na nsuka,+ matuti ta fika yandi, mpi babwala na yandi ta kwenda na kimpika.+ 19 Mono ta pesa Ezipte ndola, ebuna bo ta zaba nde mono kele Yehowa.’”
20 Na mvula ya 11, na ngonda ya ntete, na kilumbu ya nsambwadi ya ngonda, ndinga ya Yehowa kwisilaka mono nde: 21 “Mwana ya muntu, mono me buka diboko ya Farao ntotila ya Ezipte; bo ta kanga yo ve sambu na kubelula yo mpi bo ta tula yo ve bande sambu na kukumisa yo ngolo mingi sambu na kubaka mbele ya bitumba.”
22 “Yo yina Yehowa Mfumu ya Kuluta Nene me tuba nde: ‘Mono ke nwanisa Farao ntotila ya Ezipte,+ mono ta buka maboko na yandi, yina kele ngolo ti yina me bukanaka,+ ebuna mono ta sala nde mbele ya bitumba kukatuka na diboko na yandi mpi kubwa.+ 23 Na nima, mono ta panza bantu ya Ezipte na kati ya makanda mpi na kati ya bansi.+ 24 Mono ta kumisa maboko* ya ntotila ya Babilone ngolo+ mpi mono ta tula mbele na mono ya bitumba na diboko na yandi,+ ebuna mono ta buka maboko ya Farao, mpi yandi ta dila ngolo na ntima na ntwala na yandi* bonso muntu mosi ya ke fwa. 25 Mono ta kumisa maboko ya ntotila ya Babilone ngolo, kansi maboko ya Farao ta lemba; ebuna bo ta zaba nde mono kele Yehowa ntangu mono ta tula mbele na mono ya bitumba na diboko ya ntotila ya Babilone mpi ntangu yandi ta sadila yo sambu na kunwanisa insi ya Ezipte.+ 26 Mono ta panza bantu ya Ezipte na kati ya makanda mpi na kati ya bansi,+ ebuna bo ta zaba nde mono kele Yehowa.’”