Ezekiele
29 Na mvula ya kumi, na ngonda ya kumi, na kilumbu ya 12 ya ngonda, ndinga ya Yehowa kwisilaka mono nde: 2 “Mwana ya muntu, balula luse na nge na ndambu ya Farao ntotila ya Ezipte, ebuna bikula mambu ya mbi sambu na yandi mpi sambu na Ezipte ya mvimba.+ 3 Tuba mambu yai: ‘Yehowa Mfumu ya Kuluta Nene me tuba nde:
“Mono ke nwanisa nge, Farao ntotila ya Ezipte,+
Mbisi ya nene ya boma ya me lala na kati ya bamasa ya Nile* na yandi,+
Yina me tuba nde, ‘Nzadi ya Nile na mono kele ya mono.
Mono salaka yo sambu na mono mosi.’+
4 Kansi mono ta tula bandobo na bambwanga na nge mpi ta sala nde bambisi ya Nile na nge kukangama na bibala na nge.
Mono ta basisa nge na Nile na nge ti bambisi yonso ya Nile yina me kangama na bibala na nge.
5 Mono ta yambula nge na ntoto ya zelo na zelo, nge ti bambisi yonso ya Nile na nge.
Nge ta bwa na nseke, mpi bo ta vukisa nge ve, bo ta tula nge ve kisika mosi.+
Mono ta pesa nge bonso madia na bambisi ya makasi ya ntoto mpi na bandeke ya zulu.+
6 Ebuna bantu yonso ya ke zingaka na Ezipte ta zaba nde mono kele Yehowa,
Sambu bo lendaka kusadisa diaka ve nzo ya Izraele, sambu bo vandaka kaka kitini ya dititi.*+
7 Ntangu bo simbaka diboko na nge, nge tolukaka,
Mpi nge salaka nde dipeka na bo kulwala.
8 “‘Yo yina, Yehowa Mfumu ya Kuluta Nene me tuba nde: “Tala! Mono ke nata mbele ya bitumba na zulu na nge,+ mpi mono ta katula muntu ti mbisi na kati na nge. 9 Insi ya Ezipte ta kuma ntoto ya mpamba mpi kisika ya kubeba;+ ebuna bo ta zaba nde mono kele Yehowa, sambu nge* me tuba nde, ‘Nzadi ya Nile kele ya mono; mono muntu salaka yo.’+ 10 Yo yina mono ke telamina nge ti Nile na nge, mpi mono ta kumisa insi ya Ezipte insi mosi ya kubeba mpi ya kuyuma,+ ntoto ya mpamba yina bantu ta zingaka ve, katuka na Migdole+ tii na Siene+ tii na ndilu ya Etiopia. 11 Bantu to bitwisi ta luta ve na makulu na kati na yo,+ mpi bantu ta zinga ve na kati na yo bamvula 40. 12 Mono ta kumisa insi ya Ezipte insi ya ta bikala mpamba na kati ya bansi, mpi bambanza na yo ta bikala bambanza ya kuluta mpamba bamvula 40 na kati ya bambanza;+ ebuna mono ta panza bantu ya Ezipte na kati ya makanda mpi na kati ya bansi.”+
13 “‘Yehowa Mfumu ya Kuluta Nene me tuba nde: “Na nima ya bamvula 40 mono ta katula bantu ya Ezipte na kati ya bantu bisika bo panzanaka, ta vukisa bo mpi ta vutula bo;+ 14 mono ta vutula bampika ya Ezipte na insi ya Patrosi,+ na insi yina bo katukaka, mpi kuna bo ta kuma kimfumu mosi ya kukonda mfunu. 15 Ezipte ta kuma na nsi kibeni ya bimfumu ya nkaka mpi ta yala diaka ve makanda ya nkaka,+ ebuna mono ta kumisa bo fioti kibeni na mpila nde bo ta kuka ve kuyala makanda ya nkaka.+ 16 Yo ta vanda diaka ve ata fioti kima yina nzo ya Izraele ta tudila ntima,+ kansi yo ta yibusaka bo kaka kifu na bo mutindu bo kwendaka kulomba lusadisu na bantu ya Ezipte. Ebuna bo ta zaba nde mono kele Yehowa Mfumu ya Kuluta Nene.”’”
17 Ntangu yai, na mvula ya 27, na ngonda ya ntete, na kilumbu ya ntete ya ngonda, ndinga ya Yehowa kwisilaka mono nde: 18 “Mwana ya muntu, ntotila Nebukadenezare*+ ya Babilone sadisaka basoda na yandi kisalu ya ngolo sambu na kunwanisa Tire.+ Konso ntu kumaka dibandi, mpi konso dipeka kulukaka bampusu. Kansi yandi ti basoda na yandi bakaka ve lufutu sambu na kisalu ya ngolo yina yandi salaka na Tire.
19 “Yo yina, Yehowa Mfumu ya Kuluta Nene me tuba nde, ‘Tala! Mono ke pesa insi ya Ezipte na ntotila Nebukadenezare* ya Babilone,+ mpi yandi ta kwenda ti kimvwama na yo mpi ta baka na kati na yo bima mingi ya kubotula mpi ya kuyiba; ebuna yo ta kuma lufutu sambu na basoda na yandi.’
20 “‘Sambu na kufuta yandi na kisalu ya ngolo yina yandi salaka mutindu yandi nwanisaka yandi,* mono ta pesa yandi insi ya Ezipte sambu bo salaka mambu sambu na mono,’+ Yehowa Mfumu ya Kuluta Nene muntu me tuba.
21 “Na kilumbu yina, mono ta sala nde kibongo mosi kubasika sambu na nzo ya Izraele,*+ mpi mono ta pesa nge dibaku ya kutuba na kati na bo; ebuna bo ta zaba nde mono kele Yehowa.”