BIDILU
א [Aleph]*
1 Mbanza yina vandaka ya kufuluka ti bantu+ me vanda ntangu yai yandi mosi kibeni!
Mbanza yina vandaka ti bantu mingi kuluta makanda+ ya nkaka me kuma bonso mufwidi ya nkento kibeni!
Mbanza yina vandaka ntotila-nkento na kati ya baprovense* me kuma mpika kibeni!+
ב [Beth]
2 Yandi ke dila mingi na mpimpa,+ mpi mansanga me fuluka na matama na yandi.
Ata muntu mosi ve na kati ya bantu yonso yina ke zolaka yandi kele pana sambu na kulembika yandi.+
Banduku na yandi yonso me yekula yandi;+ bo me kuma bambeni na yandi.
ג [Gimel ]
3 Bo me nata Yuda na insi ya nzenza+ na bampasi mpi na kimpika ya ngolo.+
Yandi fwete zinga na kati ya makanda;+ yandi ke mona ve kisika ya kupema.
Bantu yonso yina ke bangikaka yandi me kanga yandi na mpasi na yandi.
ד [Daleth]
4 Banzila yina ke kwenda na Sioni ke dila, sambu muntu mosi ve ke kwisa na nkinsi.+
Bakielo na yandi yonso me bikala mpamba;+ banganga-nzambi na yandi ke dila.
Bamwense na yandi* kele na mawa, mpi yandi kele na mpasi ya ngolo.
ה [He]
5 Bambeni na yandi kele ntangu yai mfumu* na yandi; bambeni na yandi ke kudiyangisa ve.+
Yehowa me pesa yandi mawa sambu na mambu na yandi mingi ya mbi.+
Bana na yandi me kwenda na kimpika na ntwala ya mbeni.+
ו [Waw]
6 Lukumu yonso ya mwana-nkento ya Sioni+ me katuka.
Bamfumu na yandi kele bonso bamvudi yina me mona ve matiti,
Mpi bo ke tambula ya kulemba na ntwala ya muntu yina ke landa bo.
ז [Zayin]
7 Na bilumbu yina yandi kele na mpasi mpi me konda nzo, Yeruzalemi ke yibuka
Bima yonso ya ntalu yina yandi vandaka na yo na bilumbu ya ntama.+
Ntangu bantu na yandi bwaka na maboko ya mbeni mpi yandi vandaka ve ti muntu ya kusadisa yandi,+
ח [Heth]
8 Yeruzalemi me sumuka ngolo.+
Yo yina yandi me kuma kima ya mbi kibeni.
Bantu yonso yina vandaka kupesa yandi lukumu ke mona yandi ntangu yai bonso kima ya mpamba, sambu bo me mona kinkonga na yandi.+
Yandi ke dila+ mpi ke baluka na nsoni.
ט [Teth]
9 Mvindu na yandi kele na bansongi ya lele na yandi.
Yandi yindulaka ve makwisa na yandi.+
Kubwa na yandi vandaka ya kuyituka; muntu ya kulembika yandi kele ve.
O Yehowa, tala mpasi na mono, sambu mbeni me kudikumisa.+
י [Yod ]
10 Mbeni na yandi me tula maboko na bimvwama+ na yandi yonso.
Sambu yandi me mona makanda ke kota na kisika na yandi ya santu,+
Bantu yina nge tubaka nde bo fwete kota ve na dibundu na nge.
כ [Kaph]
11 Bantu na yandi yonso ke dila; bo ke sosa dimpa.+
Bo me pesa bima na bo ya ntalu sambu na madia, kaka sambu na kubikala na luzingu.*
O Yehowa, tala mpi mona nde mono me kuma bonso nkento* ya kukonda mfunu.
ל [Lamed ]
12 Keti yo kele diambu ya mpamba sambu na beno yonso yina ke luta na nzila?
Beno tala mpi beno mona!
Keti kele ti mpasi yina kele bonso mpasi yina bo pesaka mono,
Yina Yehowa salaka nde mono mona na kilumbu ya makasi na yandi ya ngolo?+
מ [Mem]
13 Kuna na zulu yandi me tinda tiya na mikwa na mono,+ mpi yandi ke tula yo mosi-mosi na nsi na yandi.
Yandi me yalumuna bukondi sambu na makulu na mono; yandi me pusa mono na kupesa mukongo.
Yandi me kumisa mono nkento yina me bikala yandi mosi.
Mono ke bela kilumbu ya mvimba.
נ [Nun]
14 Bo me kanga mambu na mono ya mbi bonso vangu, bo me kanga yo na diboko na yandi.
Bo me tula yo na nkingu na mono, mpi ngolo na mono me mana.
Yehowa me pesa mono na maboko ya bantu yina mono lenda nwana ve ti bo.+
ס [Samekh]
15 Yehowa me losa bantu yonso ya ngolo yina kele na kati na mono.+
Yandi me binga kimvuka mosi ya bantu sambu bo bedisa baleke na mono ya babakala.+
Yehowa me niata mwana-nkento ya mwense ya Yuda na kikamuninu ya vinu.+
ע [Ayin]
16 Mono ke dila sambu na mambu yai;+ meso na mono me fuluka ti mansanga.
Sambu konso muntu yina lendaka kulembika mono to kupesa mono* kikesa me tina mono.
Bana na mono me bikala bo mosi, sambu mbeni me nunga.
פ [Pe]
17 Sioni me tandula maboko na yandi;+ muntu ya kulembika yandi kele ve.
Yehowa me songa bambeni ya Yakobi yonso yina kele na nziunga na yandi na kunwanisa yandi.+
Yeruzalemi me kuma kima ya mbi kibeni+ sambu na bo.
צ [Tsade]
18 Yehowa kele muntu ya lunungu,+ sambu mono me kolama+ na bansiku* na yandi.
Beno bantu yonso, beno wa mpi beno tala mpasi na mono.
Bamwense na mono* mpi bana na mono ya babakala me kwenda na kimpika.+
ק [Qoph]
19 Mono bingaka bantu yina ke zolaka mono, kansi bo yekulaka mono.+
Na mbanza, banganga-nzambi na mono mpi bankuluntu na mono me fwa,
Ntangu bo vandaka kusosa madia sambu bo bikala na luzingu.*+
ר [Resh]
20 Tala, O Yehowa, sambu mono kele na mpasi ya ngolo.
Kati* na mono me kuma kisaka-saka.
Ntima na mono me baluka na kati na mono, sambu mono kolamaka ngolo.+
Na nganda mbele ya bitumba me bikisa mono kukonda bana;+ na kati ya nzo yo kele bonso lufwa.
ש [Shin]
21 Bantu me wa kudila na mono; muntu ya kulembika mono kele ve.
Bambeni na mono yonso me wa nsangu ya mpasi na mono.
Bo kele na kiese, sambu nge salaka yo.+
Kansi nge ta nata kilumbu yina nge tubilaka,+ ntangu bo ta kuma bonso mono.+
ת [Taw]
22 Bika nde mambi na bo yonso kuvanda na ntwala na nge, mpi sadila bo mambu na nku,+
Kaka mutindu nge sadilaka mono mambu na nku sambu na mambu na mono yonso ya mbi.
Sambu kudila na mono kele mingi, mpi ntima na mono ke bela.
א [Aleph]
2 Yehowa me fika kibeni mwana-nkento ya Sioni na dituti ya makasi na yandi!
Katuka na zulu, yandi me bwisa kitoko ya Izraele na ntoto.+
Yandi me yibuka ve kazune na yandi + na kilumbu ya makasi na yandi.
ב [Beth]
2 Yehowa me mina bisika yonso ya kuzinga ya Yakobi kukonda mawa.
Na makasi na yandi, yandi me bwisa bisika ya ngolo ya mwana-nkento ya Yuda.+
Yandi me bwisa kimfumu+ ti bamfumu na yandi+ na ntoto mpi me vweza bo.
ג [Gimel ]
3 Na makasi yonso, yandi me zenga ngolo yonso* ya Izraele.
Yandi vutulaka diboko na yandi ya kitata na nima ntangu mbeni kumaka pene-pene,+
Mpi na Yakobi, yandi landaka kupela bonso tiya yina ke yoka bima yonso ya kele na nziunga na yo.+
ד [Daleth]
4 Yandi me konika* munduki na yandi ya tolo-tolo bonso mbeni; diboko na yandi ya kitata kele ya kuyilama bonso mbeni;+
Yandi landaka kufwa bantu yonso yina vandaka kitoko na meso na beto.+
Mpi yandi monisaka makasi na yandi na tenta ya mwana-nkento ya Sioni+ bonso tiya.+
ה [He]
5 Yehowa me kuma bonso mbeni;+
Yandi me mina Izraele.
Yandi me mina banzo-zulu na yandi yonso;
Yandi me bwisa bisika na yandi yonso ya ngolo.
Mpi yandi ke sala nde bidilu ti mawa ya mwana-nkento ya Yuda kukuma mingi.
ו [Waw]
6 Yandi ke sadila kisasa na yandi mambu na nku,+ bonso kamwa-nzo yina kele na masamba.
Yandi me sukisa* nkinsi na yandi.+
Yehowa me sala nde bantu kuvila nkinsi mpi kisabatu na Sioni,
Mpi na makasi na yandi ya ngolo, yandi ke zitisa ve ntotila mpi nganga-nzambi.+
ז [Zayin]
7 Yehowa me losa mesa-kimenga na yandi;
Yandi me vweza kisika na yandi ya santu.+
Yandi me pesa bibaka ya banzo-zulu na yandi na maboko ya mbeni.+
Bo me tombula bandinga na nzo ya Yehowa,+ bonso na kilumbu ya nkinsi.
ח [Heth]
8 Yehowa me baka lukanu ya kubwisa kibaka ya mwana-nkento ya Sioni.+
Yandi me tandula nsinga ya kutesila.+
Yandi me kanga ve diboko na yandi sambu na kufwa.*
Mpi yandi ke sala nde lupangu mpi kibaka kudila.
Yonso zole me lemba.
ט [Teth]
9 Bakielo na yandi me dinda na ntoto.+
Yandi me fwa banti na yandi ya kukangila bakielo mpi me zenga yo.
Ntotila na yandi mpi bamfumu na yandi kele na kati ya makanda.+
Nsiku* kele ve; ata bambikudi na yandi ke mona ve mbona-meso yina ke katuka na Yehowa.+
י [Yod ]
10 Bankuluntu ya mwana-nkento ya Sioni me vanda pima na ntoto.+
Bo ke kudilosila putulu na ba-ntu mpi bo me lwata basaki.+
Bamwense ya Yeruzalemi me niekisa ba-ntu na bo na ntoto.
כ [Kaph]
11 Meso na mono me lemba kubasisa mansanga.+
Kati* na mono me kuma kisaka-saka.
Dizafu* na mono me bwa na ntoto, sambu mwana-nkento ya* bantu na mono me bwa,+
Sambu bana ti bana-fioti ke bwa ngambu na babala-bala ya nene ya bwala.+
ל [Lamed ]
12 Bo ke landa kuyula bamama na bo nde, “Wapi mbuma mpi vinu?”+
Ntangu bo ke bwa ngambu bonso muntu yina bo me lwadisa na babala-bala ya nene ya mbanza,
Ntangu bo* ke fwa malembe-malembe na maboko ya bamama na bo.
מ [Mem]
13 Inki mono lenda sadila bonso mbangi,
To ti inki mono lenda fwanisa nge, O mwana-nkento ya Yeruzalemi?
Ti inki mono lenda fwanisa nge, sambu na kulembika nge, O mwana-nkento ya mwense ya Sioni?
Sambu kubukana na nge kele nene bonso nzadi-mungwa.+ Nani lenda belula nge?+
נ [Nun]
14 Bambona-meso yina bambikudi na nge monaka sambu na nge vandaka ya luvunu mpi ya mpamba,+
Mpi bo monisaka ve kifu na nge sambu na kukatula kimpika na nge,+
Kansi bo landaka kumona mambu+ ya luvunu mpi ya kukusa sambu na nge.
ס [Samekh]
15 Bantu yonso yina ke luta na nzila ke budila nge maboko+ sambu na kuvweza nge.
Bo ke budila mwana-nkento ya Yeruzalemi mwita ti kuyituka+ mpi bo ke nikisa ba-ntu na bo sambu na yandi, bo ke tuba nde:
“Keti yai mbanza yina bo vandaka kutuba sambu na yo nde, ‘Yo kele ti kitoko ya kukuka, kiese ya ntoto ya mvimba’?”+
פ [Pe]
16 Bambeni na nge yonso me kangudila nge munoko.
Bo ke budila nge mwita mpi ke kwetikisa meno mpi ke tuba nde: “Beto me mina yandi.+
Yai kilumbu yina beto vandaka kuvingila!+ Yo me kwisa, mpi beto me mona yo!”+
ע [Ayin]
17 Yehowa me sala mambu yina yandi kanaka;+ yandi me lungisa mambu yina yandi tubaka,+
Mambu yina yandi tubaka tuka ntama.+
Yandi me bwisa kukonda mawa.+
Yandi me bika nde mbeni kuyangalala sambu na nge; yandi me tombula ngolo* ya bambeni na nge.
צ [Tsade]
18 Bantima na bo ke didila Yehowa, O kibaka ya mwana-nkento ya Sioni.
Bika mansanga kukulumuka bonso masa mpimpa ti mwini.
Kupema ve, kubika ve nde disu na nge* kupema.
ק [Qoph]
19 Telama! Dila na mpimpa, na luyantiku ya ntangu ya kukengila.
Basisa mambu yina kele na ntima na nge bonso masa na ntwala ya luse ya Yehowa.
Tombudila yandi maboko na nge sambu na luzingu* ya bana na nge,
Yina ke bwa ngambu sambu na nzala na konso kinkonko* ya bala-bala.+
ר [Resh]
20 Mona, O Yehowa, mpi tala muntu yina nge me sadila mambu na nku kibeni.
Keti bankento fwete landa kudia bana* na bo mosi, bana+ yina bo mosi butaka,
To keti bo fwete fwa banganga-nzambi mpi bambikudi na kisika ya santu ya Yehowa?+
ש [Shin]
21 Leke ya bakala mpi mununu me lala ya kufwa na ntoto na babala-bala.+
Bamwense na mono* mpi bana na mono ya babakala me fwa na mbele ya bitumba.+
Nge me fwa bo na kilumbu ya makasi na nge; nge me fwa bo kukonda mawa.+
ת [Taw]
22 Bonso na kilumbu ya nkinsi,+ nge ke binga boma ya ngolo na bandambu yonso.
Na kilumbu ya makasi ya Yehowa, muntu mosi ve tinaka to gulukaka;+
Mbeni na mono manisaka+ bantu yina mono butaka* mpi sansaka.
א [Aleph]
3 Mono kele muntu yina me mona mpasi sambu na nti ya makasi na yandi.
2 Yandi me kula mono mpi me sala nde mono tambula na mpimpa, kansi na nsemo ve.+
3 Ya kieleka, diboko na yandi ke nwanisa mono mbala na mbala kilumbu ya mvimba.+
ב [Beth]
4 Yandi me yumisa nsuni na mono mpi mpusu na mono;
Yandi me buka mikwa na mono.
5 Yandi me ziunga mono; yandi me ziunga mono ti ndikila+ ya bululu mpi mpasi.
6 Yandi me pusa mono na kuvanda na bisika ya mpimpa, bonso bantu yina me fwaka ntama.
ג [Gimel ]
7 Yandi me tunga kibaka na nziunga na mono, yo yina mono lenda tina ve;
Yandi me kanga mono ti miniololo ya kwivre ya kizitu.+
8 Mpi ntangu mono ke boka kukonda kivuvu sambu na kulomba lusadisu, yandi ke buya* kisambu na mono.+
9 Yandi me kanga banzila na mono ti matadi ya bo me zenga;
Yandi me kumisa banzila na mono nioka-nioka.+
ד [Daleth]
10 Yandi me bumbana sambu na kukanga mono bonso urse, bonso ntambu yina me bumbana.+
11 Yandi me katula mono na banzila mpi yandi me zenga mono bitini-bitini;*
Yandi me bikisa mono mono mosi.+
12 Yandi me konika* munduki na yandi ya tolo-tolo, mpi yandi me tula mono bonso kima yina yandi ke kana kulosila tolo-tolo.
ה [He]
13 Yandi me tobula bapiku na mono ti batolo-tolo* ya lupaya na yandi.
14 Bantu yonso me kuma kuseka-seka mono, mpi mono me kuma ntu-diambu ya bankunga na bo kilumbu ya mvimba.
15 Yandi me fulusa mono ti bima ya ndudi mpi yandi me fulusa mono ti nti ya bululu.+
ו [Waw]
17 Nge me buya kupesa mono ngemba; mono me vila mambu ya mbote.
18 Yo yina mono ke tuba nde: “Nkembo na mono me mana, mpi kima ya mono ke vingila na Yehowa me vila.”
ז [Zayin]
19 Yibuka mpasi na mono mpi mutindu mono me konda nzo,+ nti ya bululu mpi ndikila ya ndudi.+
20 Ya kieleka, nge* ta yibuka mpi nge ta kwisa kusadisa mono.+
21 Mono ke yibuka yo na ntima na mono; yo yina mono ta monisa kikalulu ya kuvingila.+
ח [Heth]
22 Kana beto me mana ve,+ yo kele sambu na zola ya kwikama ya Yehowa,
Sambu mawa na yandi ke sukaka ve.+
23 Yo ke kumaka ya mpa konso suka;+ kwikama na nge kele mingi.+
24 “Yehowa kele dikabu na mono,”+ mono muntu me tuba,* “yo yina mono ta monisa kikalulu ya kuvingila yandi.”+
ט [Teth]
25 Yehowa kele mbote na muntu yina ke tulaka kivuvu na yandi,+ na muntu* yina ke landa kusosa yandi.+
26 Yo kele mbote na kuvingila na pima*+ luguluku ya ke katukaka na Yehowa.+
27 Yo kele mbote nde muntu kunata vangu na kileki na yandi.+
י [Yod ]
28 Bika yandi vanda yandi mosi mpi yandi vanda pima ntangu yandi ke tula yo na zulu na yandi.+
29 Bika yandi tula munoko na yandi na mfututu kibeni;+ mbala ya nkaka kivuvu lenda vanda.+
30 Bika yandi pesa ditama na yandi na muntu yina ke bula yandi; bika bo finga yandi mingi.
כ [Kaph]
31 Sambu Yehowa ta losa beto ve kimakulu.+
32 Ata yandi me pesa beto mawa, yandi ta wila beto mpi mawa na kutadila zola na yandi ya kwikama ya mingi.+
33 Sambu kumonisa bana ya bantu mpasi+ to kupesa bo mawa ke vandaka ve na ntima na yandi.
ל [Lamed ]
34 Kuniata bantu yonso ya boloko ya nsi-ntoto+ na nsi ya makulu ya muntu,
35 Kuyimina muntu lunungu na ntwala ya Muntu ya Kuluta Zulu,+
36 Kukusa muntu ntangu bo ke sambisa yandi
—Yehowa ke ndimaka ve mambu yai.
מ [Mem]
37 Ebuna, nani lenda tuba mpi kusala nde yo salama kana Yehowa me tuba ve?
38 Na munoko ya Muntu ya Kuluta Zulu,
Mambu ya mbi mpi mambu ya mbote ke basikaka ve nzila mosi.
39 Sambu na nki muntu yina kele na luzingu fwete bokuta sambu na mbuma yina yandi ke buka sambu na disumu na yandi?+
נ [Nun]
40 Bika beto tadila mpi beto fimpa banzila na beto,+ mpi bika beto vutukila Yehowa.+
41 Bika beto tombula bantima na beto ti maboko na beto na Nzambi kuna na zulu:+
42 “Beto me sala mambu ya mbi mpi me kolama,+ mpi nge me lolula beto ve.+
ס [Samekh]
43 Na makasi yonso, nge me kanga nzila sambu beto pusana ve;+
Nge me landa beto mpi nge me fwa beto kukonda mawa.+
44 Nge me kanga nzila ti dituti sambu beto pusana ve na nge, sambu kisambu na beto kuluta ve.+
45 Nge me kumisa beto bima ya bo me losaka mpi mvindu na kati ya bantu.”
פ [Pe]
46 Bambeni na beto yonso ke kangudila beto+ minoko na bo.
47 Boma ya ngolo mpi mitambu me kuma dikabu na beto,+ kubeba mpi kubwa.+
48 Bamasa ke kulumuka na meso na mono sambu na kubwa ya mwana-nkento ya bantu na mono.+
ע [Ayin]
49 Meso na mono ke dila kukonda kuyambula, kukonda kupema,+
50 Tii kuna Yehowa ta tala na nsi mpi ta mona katuka na zulu.+
51 Meso na mono me natila mono* mawa sambu na bana-bankento yonso ya mbanza na mono.+
צ [Tsade]
52 Bambeni na mono me zomba mono kukonda kikuma bonso ndeke.
53 Bo me sukisa luzingu na mono na dibulu; bo landaka kulosila mono matadi.
54 Bamasa me luta na zulu ya ntu na mono, mpi mono tubaka nde: “Mono me suka!”
ק [Qoph]
55 O Yehowa, mono bingaka zina na nge katuka na nsi ya dibulu.+
56 Wa ndinga na mono; kukanga ve dikutu na nge na kudila na mono sambu na kulomba lusadisu, sambu nge lembika mono.
57 Na kilumbu yina mono bingaka nge, nge kwisaka pene-pene. Nge tubaka nde: “Kuwa boma ve.”
ר [Resh]
58 Nge me samba diambu na mono,* O Yehowa, nge me sumba diaka luzingu na mono.+
59 O Yehowa, nge me mona mbi yina bo me sala mono; mono ke bondila nge, sambisa mambu na mono mbote.+
60 Nge me mona mambu na bo yonso ya kuvutula mbi, mayele na bo yonso ya mbi sambu na kunwanisa mono.
ש [Sin] to [Shin]
61 Nge me wa masota na bo, O Yehowa, mambu na bo yonso ya mbi ya bo ke kana kusala mono,+
62 Mambu ya munoko ya bantu yina ke niokula mono mpi mambu yina bo ke tuba na nsi-nsi kilumbu ya mvimba sambu na kunwanisa mono.
63 Tala bo; ata bo me vanda ata bo me telama, bo ke seka mono na bankunga na bo!
ת [Taw]
64 O Yehowa, nge ta futa bo na kutadila bisalu na bo.
65 Nge ta kumisa bo ntima-ngolo, kusinga yina nge me singa bo.
66 Nge ta landa bo na makasi na nge mpi nge ta fwa bo na nsi ya zulu ya Yehowa.
א [Aleph]
4 Wolo yina ke sema me beba kibeni, wolo ya mbote!+
Matadi ya santu+ me panzana kibeni na konso kinkonko ya bala-bala!*+
ב [Beth]
2 Kansi, bana ya Sioni yina vandaka na mfunu, yina bo vandaka kufwanisa ti* wolo ya bunkete,
Bo ke tadila bo kibeni bonso mabungu,
Kisalu ya maboko ya muwumbi!
ג [Gimel ]
3 Ata bambwa ya nseke ke nwisaka bana na yo mabele,
Kansi mwana-nkento ya bantu na mono me kuma nku,+ bonso ba-otrishi na ntoto-makanga.+
ד [Daleth]
4 Ludimi ya mwana yina ke nwa mabele me kangama na kitini ya zulu ya kati ya munoko na yandi sambu na nzala ya masa.
Bana ke lomba dimpa,+ kansi muntu mosi ve ke pesa bo ata dimpa mosi.+
ה [He]
5 Bantu yina vandaka kudia madia ya kitoko me lala nzala* na babala-bala.+
Bantu yina vandaka kulwata bilele ya ntalu*+ ntangu bo vandaka kusansa bo, bo me lala na bita ya putulu ya tiya.
ו [Waw]
6 Ndola* ya mwana-nkento ya bantu na mono kele nene kuluta ndola sambu na disumu ya Sodome,+
Yina bo bwisaka na mbala mosi, mpi muntu mosi ve sadisaka yandi.+
ז [Zayin]
7 Banazire+ na yandi vandaka bunkete kuluta mvula ya mpembe,* mpembe kuluta miliki.*
Bo vandaka mbwaki kuluta bakorayi; bo vandaka bonso basafire ya bo me ngengisa.
ח [Heth]
8 Luse na bo me kuma ndombe kuluta makala;*
Bantu ke zaba bo ve na babala-bala.
Mpusu na bo me yuma na zulu ya mikwa na bo;+ yo me kuma bonso nti ya kuyuma.
ט [Teth]
9 Bantu yina fwaka na mbele ya bitumba kele mbote kuluta bantu yina fwaka na nzala,+
Bayina me lemba, yina bo me tobula sambu bo me konda madia ya ke katuka na bilanga.
י [Yod ]
10 Maboko ya bankento yina ke fwilaka bantu nkenda me lamba bana na bo mosi.+
Bana yina me kuma madia na bo na ntangu ya kubwa ya mwana-nkento ya bantu na mono.+
כ [Kaph]
11 Yehowa me monisa nganzi na yandi;
Yandi me monisa makasi na yandi ya ngolo.+
Yandi ke pedisa tiya na Sioni mpi yo ke yoka bafondasio na yandi.+
ל [Lamed ]
12 Bantotila ya ntoto mpi bantu yonso ya ntoto yina ke butaka ndimaka ve
Nde muntu yina ke nwanisa beto mpi mbeni ta kota na bakielo ya Yeruzalemi.+
מ [Mem]
13 Yo vandaka sambu na masumu ya bambikudi na yandi, bifu ya banganga-nzambi na yandi,+
Yina tiamunaka menga ya bantu ya lunungu na kati na yandi.+
נ [Nun]
14 Bo me yungana na babala-bala bonso bifwa-meso.+
Bo me kudikumisa mvindu na menga,+
Yo yina muntu mosi ve lenda simba bilele na bo.
ס [Samekh]
15 “Beno katuka! Beno bantu ya mvindu!” bo ke tubila bo na ndinga ya ngolo. “Beno katuka! Beno katuka! Beno simba beto ve!”
Sambu bo me konda banzo mpi bo ke yungana-yungana.
Bantu me tuba na kati ya makanda nde: “Bo lenda bikala ve awa ti beto.*+
פ [Pe]
16 Luse ya Yehowa me panza bo;+
Yandi ta tala bo diaka ve ti disu ya mbote.
Bantu ta zitisa ve banganga-nzambi,+ mpi bo ta monisila ve bankuluntu ntima ya mbote.”+
ע [Ayin]
17 Ata ntangu yai meso na beto me lemba sambu beto ke sosa lusadisu kansi mpamba.+
Beto talaka mpi beto sosaka lusadisu na dikanda yina lenda gulusa beto ve.+
צ [Tsade]
18 Bo me zomba konso kitambi+ na beto, yo yina beto kele ve na mpila ya kutambula na babala-bala na beto ya nene.
Nsuka na beto me finama; bilumbu na beto me suka, sambu nsuka na beto me lunga.
ק [Qoph]
19 Bantu yina ke landa beto kele ntinu kuluta bango-zulu ya zulu.+
Bo landaka beto na bangumba; bo bumbanaka na ntoto-makanga sambu na kusala beto mbi.
ר [Resh]
20 Mpema ya bambombo na beto, muntu yina Yehowa me tulaka mafuta,+ bo me kanga yandi na dibulu na bo ya nene,+
Muntu yina beto tubaka sambu na yandi nde: “Beto ta zinga na kivudi na yandi na kati ya makanda.”
ש [Sin]
21 Yangalala mpi wa kiese, O mwana-nkento ya Edomi,+ nge muntu yina ke zingaka na insi ya Usi.
Kansi dikopa yina ta luta+ mpi na nge, ebuna nge ta lawuka mpi ta songa kinkonga na nge.+
ת [Taw]
22 O mwana-nkento ya Sioni, ndola sambu na kifu na nge me kuma na nsuka na yo.
Yandi ta nata nge diaka ve+ na insi ya nkaka.
Kansi yandi ta tula dikebi na kifu na nge, O mwana-nkento ya Edomi.
Yandi ta basisa masumu na nge+ na mpenza.
5 O Yehowa, yibuka mambu yina me bwila beto.
Tala mpi mona nsoni na beto.+
2 Bo me pesa dikabu na beto na banzenza mpi banzo na beto na bantu ya insi ya nkaka.+
3 Beto me kuma bana-nsiona yina me konda tata; bamama na beto kele bonso mifwidi.+
4 Beto fwete futa sambu na kunwa masa na beto+ mosi, mpi beto fwete pesa mbongo sambu na bankuni na beto mosi.
5 Bantu yina ke landa beto kele na nkingu na beto;
Beto me lemba, kansi bo me pesa beto ve ntangu ya kupema.+
6 Beto me tandudila Ezipte+ mpi Asiria+ maboko na beto, sambu beto baka mampa ya kufwana sambu na kudia.
7 Ba-nkaka na beto yina salaka masumu kele diaka ve, kansi beto fwete nata bifu na bo.
8 Ntangu yai bansadi ke yala beto; muntu ya kukatula beto na maboko na bo kele ve.
9 Beto ke tula luzingu*+ na beto na kigonsa sambu na kunata mampa na beto, sambu na mbele ya bitumba ya ntoto-makanga.
10 Mpusu na beto me kuma tiya bonso fulu ya tiya, sambu na nzala ya ngolo.+
11 Bo me pesa bankento nsoni* na Sioni, bamwense na bambanza ya Yuda.+
12 Bo me kangisa bamfumu nsinga na nkingu na maboko na bo,+ mpi bo me zitisa ve bankuluntu.+
13 Baleke ya babakala ke nata kima ya kunikila bambuma na maboko, mpi bana-babakala me bula sakuba na nsi ya bizitu ya bankuni.
14 Bankuluntu me katuka na kielo ya mbanza;+ baleke ya babakala ke bula diaka ve miziki na bo.+
15 Kiese me katuka na ntima na beto; makinu na beto me kuma mawa.+
16 Mpu ya kimfumu me katuka na ntu na beto mpi me bwa. Mawa na beto, sambu beto me sala masumu!
17 Ntima na beto ke bela+ sambu na yo,
Mpi meso na beto me bwa mpimpa+ sambu na mambu yai,
18 Sambu na Ngumba ya Sioni, yina me bikala mpamba;+ mikengi ke tambula-tambula kuna ntangu yai.
19 Kansi nge, O Yehowa, nge me vanda na kiti ya kimfumu kimakulu.
Kiti na nge ya kimfumu kele tii na bandonga yonso ya bantu yina ta kwisa.+
20 Sambu na nki nge me vila beto kimakulu mpi nge me yambula beto ntangu mingi mutindu yai?+
21 Vutula beto na nge, O Yehowa, ebuna beto ta vutukila nge na luzolo yonso.+
Kumisa bilumbu na beto ya mpa bonso na ntangu ya ntama.+
22 Kansi nge me losaka beto kibeni.
Nge ke wila beto kaka makasi ya ngolo.+
Kapu 1 tii 4 kele bankunga ya mawa ya bo me sonika na kulanda alfabe ya Kiebreo.
To “ya badistrike yina vandaka na nsi ya luyalu.”
To “Baleke na yandi ya bankento.”
Na kisina, “ntu.”
To “waka kiese.”
To “na kuvutula moyo.”
Bo ke tubila Yeruzalemi bonso nde yo kele muntu.
To “moyo na mono.”
Na kisina, “munoko.”
To “Bana na mono ya bankento.”
To “bo vutula moyo.”
Na kisina, “Misopo.”
Na kisina, “konso kibongo.”
Na kisina, “me niata.”
To “me bebisa.”
Na kisina, “kumina.”
To “Malongi.”
Na kisina, “Misopo.”
To “Foie.”
Kutuba ya kifwani, ziku yo ke monisa mawa mpi kuditula na kisika ya muntu.
To “moyo na bo.”
Na kisina, “kibongo.”
Na kisina, “mwana-nkento ya disu na nge.”
To “mioyo.”
Na kisina, “na ntu ya babala-bala yonso.”
To “mbuma.”
To “Bana na mono ya bankento.”
To “basisaka na mavimpi ya mbote.”
To “ke kanga nzila na; ke kanga.”
To mbala ya nkaka, “me sala nde mono lala kukonda kunikana.”
Na kisina, “me niata.”
Na kisina, “bana.”
To “moyo na nge.”
To “moyo na mono me tuba.”
To “moyo.”
To “na kuvingila ti kukanga-ntima yonso.”
To “moyo na mono.”
To “mambu ya moyo na mono.”
Na kisina, “na ntu ya babala-bala yonso.”
To “yina vandaka na mfunu kibeni bonso.”
Na kisina, “me bikala mpamba.”
Na kisina, “ya mbwaki mingi.”
Na kisina, “Kifu.”
To “neige.”
To “mabele.”
Na kisina, “mudidi.”
To “lenda zinga ve awa bonso banzenza.”
To “moyo.”
To “me ladisa bankento na kingolo-ngolo.”