Nge Lenda Tomisa Mayele na Nge ya Kusimba Mambu
YEHOWA NZAMBI kusalaka bantu ti butomfu ya kele na ngolo ya kusimba mpi kuyibuka mambu. Yandi salaka yo sambu yo vanda kibumbilu yina bo lenda baka mambu yankaka na kati na yo kukonda kuvidisa mambu yina kuvandaka muna ntete. Mutindu butomfu mesalamaka kewakana ti lukanu yina Nzambi kevandaka na yo nde bantu kuzinga mvula na mvula.—Nk. 139:14; Yoa. 17:3.
Kansi nge lenda mona nde nge kekuka ve kuyibuka mambu mingi ya nge simbaka na ntu. Yo kekwisa ve na ntangu nge kele na mfunu na yo. Inki nge lenda sala sambu na kutomisa mayele na nge ya kusimba mambu?
Mona Mambu ya Nge Ketanga Mfunu
Kutula dikebi na mambu ya nge ketanga kele dyambu ya mfunu sambu na kutomisa mayele ya kusimba mambu. Kana beto yedisa kikalulu ya kutala mbote, ya kutula dikebi na bantu yankaka mpi na mambu yina kesalama na nzyunga na beto, yo tabenda mabanza na beto. Ebuna yo tavanda ve mpasi nde beto tula dikebi ya mutindu mosi na ntangu beto ketanga to kewa kima mosi ya mfunu mingi.
Yo kesalamaka mbala mingi nde muntu mosi kukuka ve na kuyibuka bazina ya bantu. Kansi, sambu na beto Bakristu, beto zaba nde bantu kele mfunu mingi, yo vanda bampangi na beto Bakristu, bantu yina beto kelongaka, to bankaka ya beto kesalaka na bo mambu ya mfunu ya luzingu. Inki kima lenda sadisa beto na kuyibuka bazina yina beto fwete vila ve? Ntumwa Polo kutangaka bazina kuluta 26 ya bantu yina kuvandaka na dibundu mosi ya yandi sonikilaka. Dikebi ya yandi vandaka kutudila bo kemonana na mpila yandi zabaka ve kaka bazina na bo, kansi yandi tubilaka mpi mambu ya kyeleka yina vandaka kutala mingi na kati na bo. (Roma 16:3-16) Bankengi-ntambudi mingi ya Bambangi ya Yehowa ya ntangu yai kesalaka ngolo na kusimba mpi kuyibuka bazina, ata bo kesobaka mabundu konso mposo. Inki kima kesadisaka bo? Bo kesukininaka ve na kusadila mbala mingi zina ya muntu ntangu bo mekutana na yandi mbala ya ntete. Bo kesalaka ngolo na kuvukisa zina ti luse ya muntu. Na nima, bo kelutisaka ntangu ti bantu mingi na kisalu ya bilanga mpi ntangu bo kedyaka kisika mosi. Kana nge kutana ti muntu mosi, keti nge tayibuka zina na yandi? Yantika ntete na kuvanda na kikuma ya mbote ya kuyibukila zina na yandi; na nima meka kusadila bangindu ya kele awa na zulu.
Kuyibuka mambu ya nge ketanga kele mpi mfunu. Inki kima lenda sadisa nge na kuyibuka mambu kukonda mpasi? Yo kelombaka kumona kima yango mfunu mpi kubakisa yo. Nge fwete mona mambu ya nge ketanga mfunu sambu nge tudila yo dikebi mingi. Nge tasimba ve ata dyambu mosi kana bangindu na nge kele kisika yankaka na ntangu nge kemeka kutanga. Mutindu ya kubakisa mambu kekumaka mbote ntangu nge kewakanisa mambu ya nge ketanga ti bima yina nge mezaba mbote to ti nzayilu yina nge kele na yo dezia. Kudiyula mutindu yai: ‘Inki mutindu mpi nki ntangu mono lenda sadila mambu yai ya mono ketanga na luzingu na mono? Inki mutindu mono lenda sadila yo sambu na kusadisa bantu yankaka?’ Mutindu ya kubakisa mambu kekumaka mbote dyaka kana nge ketanga kimvuka ya bangogo kansi ngogo mosi-mosi ve. Yo tasadisa nge na kubakisa kukonda mpasi bangindu mpi kuzaba bangindu ya kuluta mfunu, ebuna yo tavanda mpasi ve na kuyibuka.
Baka Ntangu ya Kuvutukila Mambu
Bantu ya mayele na yina metala kulonga bantu ketubilaka mingi mfunu ya kuvutukila mambu. Na kulonguka mosi ya yandi salaka, profesere ya nzo-nkanda mosi ya nene kumonisaka nde munuta mosi ya muntu kelutisa na kuvutukila mambu tasadisa yandi na kusimba mambu mingi dyaka. Yo yina, na nima ya kumanisa kutanga na nge, to na nima ya kutanga kitini ya mwa nda, vutukila bangindu ya mfunu na mabanza sambu nge simba yo mbote na ntu na nge. Yindula nki mutindu nge lenda tendula na bangogo na nge mosi mambu yonso ya mpa ya nge melonguka. Kana nge kevutukila kukonda kusukinina dibanza ya mpa ya nge metanga, yo tasadisa nge na kubaka ntangu ya kufwana ya lenda sadisa nge na kusimba dyambu yango.
Ebuna na mwa bilumbu yina talanda, sosa okazio ya kuvutukila mambu yina nge tangaka na kuzabisaka yo na bantu yankaka. Nge lenda sala yo na muntu mosi ya dibuta na nge, na mpangi mosi na dibundu, na nduku ya kisalu, na mwana nzo-nkanda na beno, na muntu ya kezingaka penepene na beno, to na muntu mosi ya nge mekutana ti yandi na kisalu ya kusamuna. Kuvutukila ve kaka mambu ya mfunu, kansi pesa mpi mabanza ya Masonuku yina kewakana ti mambu yango. Kana nge kesala mpidina nge tabakila yo mambote, sambu yo tasadisa nge na kusimba mambu ya mfunu na ntu, mpi yo tasadisa bantu yankaka na kubakila yo mambote.
Yindulula Mambu ya Mfunu
Katula kuvutukila mambu yina nge metanga mpi kuzabisa yo na bantu yankaka, nge tamona nde kuyindulula mambu ya mfunu yina nge melonguka kele mfunu mingi. Bansoniki ya Biblia Asafi ti Davidi kusalaka mutindu yina. Asafi kutubaka nde: “Mono ta vilaka ve bisalu na nge ya nene, mono ta vila ve mambu ya kuyituka ya nge salaka. Mambu yonso ya nge salaka, mono fweti yindula yo kaka.” (Nk. 77:12, 13) Davidi mpi kusonikaka mutindu mosi nde: “Mpimpa yonso mono ke yindula nge kaka,” mpi “Mono ke yindula bilumbu me luta, mono ke yindula mambu yonso ya nge salaka.” (Nk. 63:7; 143:5) Keti nge kesalaka yo?
Kutula mabanza kisika mosi na mudindu mutindu yai kesadisa nge na kuyindula mambu yina Yehowa mesalaka, bikalulu na yandi, ti mitindu yandi memonisaka luzolo na yandi, mpi yo tasadisa nge mingi na kusimba mambu. Kana nge kesadila ngindu yai, yo takotisa mpenza mambu ya mfunu na ntima na nge. Yo tatomisa kimuntu na nge ya kati. Mambu yina nge kesimba tavanda ve ya zuluzulu kansi yo tavanda bangindu ya kekatuka mpenza na ntima na nge.—Nk. 119:16.
Kisalu ya Mpeve ya Nzambi
Ntangu beto kesosaka kuyibuka bakyeleka yina metala bisalu ya Yehowa mpi mambu yina Yezu Kristu kutubaka, beto kesalaka yo ve kaka beto mosi. Na mpimpa na ntwala ya lufwa na yandi, Yezu kuzabisaka balongoki na yandi nde: “Mono me tubila beno mambu yai ntangu mono kele kaka ti beno. [Kansi nsadisi, mpeve santu, NW] yina Tata Nzambi ta tinda na zina na mono; yandi ta longaka beno mambu yonso, yandi ta songaka mpi beno diaka mambu yai yonso ya mono me tubila beno.” (Yoa. 14:25, 26) Matayo ti Yoane vandaka na kati ya bantu yina. Keti mpeve santu kumonisaka mpenza nde yo vandaka nsadisi sambu na bo? Ee! Kiteso ya bamvula nana na nima, Matayo kumanisaka kusonika disolo ya mvimba ya luzingu ya Kristu, yandi tubilaka mpi mambu ya mfunu, mu mbandu Disolo na Zulu ya Ngumba ti kidimbu ya kuvanda ya Kristu mpi nsuka ya mambu ya nsi-ntoto. Bamvula makumi sambanu na tanu na nima ya lufwa ya Yezu, ntumwa Yoane kusonikaka Evanzile na yandi, ti mambu yina Yezu kutubaka na mpimpa ya nsuka yina bantumwa kulutisaka ti Mfumu kumosi na ntwala ya lufwa na yandi. Ntembe kele ve nde Matayo ti Yoane kuyibukaka mambu yina Yezu kutubaka ti yina yandi salaka ntangu bo vandaka ti yandi, kansi mpeve santu kusalaka kisalu ya nene na mpila nde bo vila ve mambu ya mfunu yina Yehowa kuzolaka nde bo sonika na Ndinga na yandi.
Keti mpeve santu kesalaka bonso nsadisi na bansadi ya Nzambi bubu yai? Ee! Ya kyeleka, mpeve santu ketulaka ve na mabanza na beto mambu yina beto melongukaka ve, kansi yo kesalaka bonso nsadisi na mutindu yo keyibusaka beto mambu ya mfunu yina beto longukaka na bilumbu meluta. (Luka 11:13; 1 Yoa. 5:14) Na nima, kana mfunu mekuma mingi, yo kepusaka mabanza na beto na ‘kuvila ve mambu yina baprofete vandaka kutuba ntama mpi nsiku ya Mfumu Yesu yina kele Ngulusi na beto.’—2 Pie. 3:1, 2.
‘Nge Fwete Vila Ve’
Yehowa vandaka kukebisa bantu ya Izraele mbala na mbala nde: ‘Nge fwete vila ve.’ Yo kezola kutuba ve nde yandi zolaka nde bo yibuka mambu yonso kukonda kuvila ata kima mosi. Kansi, yo lombaka ve nde bo kudipesa mpenza na kulanda mambu ya luzingu na bo mosi na mpila nde bo tula mambu ya Yehowa na nima. Yo lombaka nde bo vila ve mutindu Yehowa kugulusaka bo ntangu wanzyo na yandi kufwaka bana ya ntete ya bantu ya Ezipte mpi mutindu Yehowa kukangulaka Nzadi-Mungwa ya Mbwaki mpi kukangisaka yo na nima, sambu na kudindisa Farao ti basoda na yandi na masa. Yo lombaka nde bantu ya Izraele kuyibuka nde Nzambi kupesaka bo Nsiku na yandi na Ngumba ya Sinai mpi nde yandi twadisaka bo na kati ya ntoto ya zelo na zelo tii na Ntoto ya Lusilu. Yo lombaka nde bo vila ve, disongidila bo yibuka mambu yina fwete landa na kuvanda na bupusi ya ngolo na luzingu na bo ya konso kilumbu.—Kul. 4:9, 10; 8:10-18; Kub. 12:24-27.
Beto mpi fwete sala ngolo sambu beto vila ve. Ntangu beto kenwana ti bampasi ya luzingu, beto kele na mfunu ya kuyibuka Yehowa, kukonda kuvila Nzambi ya nki mutindu yandi kele mpi zola yina yandi monisaka na mpila yandi pesaka beto dikabu ya Mwana na yandi, yina kupesaka nkudulu sambu na masumu na beto na mpila nde beto lenda vanda na luzingu ya kukuka kimakulu. (Nk. 103:2, 8; 106:7, 13; Yoa. 3:16; Roma 6:23) Kutanga Biblia mbala na mbala, kupesa bamvutu na balukutakanu ya dibundu, mpi kusala kisalu ya kusamuna tasadisa beto na kuvila ve bakyeleka yai ya kitoko na mabanza na beto.
Kana nge mekuma na ntwala ya mambu yina kelomba nde nge baka badesizio ya nene to ya fyoti, yibuka bakyeleka yina, mpi bika nde yo twadisa bangindu na nge. Kuvila ve. Sosa lutwadisu na Yehowa. Na kifulu ya kutadila mambu na kinsuni to kutula ntima na mawi ya ntima na nge ya kukonda kukuka, kudiyula nde: ‘Inki ndongisila to minsiku yina kele na Ndinga ya Nzambi mono fwete tadila na desizio na mono?’ (Bing. 3:5-7; 28:26) Nge lenda yibuka ve mambu yina nge metangaka ve to ya nge mewaka ntete ve. Kansi, mutindu nzayilu na nge ya sikisiki ti zola ya Yehowa kekuma kaka mingi, kibumbilu ya nzayilu yina mpeve ya Nzambi lenda sadisa nge na kuyibuka takuma mingi, ebuna zola na nge ya Yehowa ya kekuma kaka mingi tapusa nge na kusala mambu yina kewakana ti yo.