NGIUFULA 5

Mu Ta Sala Nki Kana Bo Ke Sosila Mu na Nzo-Nkanda?

SA NA NKI YO KE MFUNU

Mutindu nge ke sala mambu lenda tomisa to kubebisa yo.

NGE ZOLAKA KUSALA NKI?

Yindula diambu yai: Thomas ke zola ve kukwenda na klase bubu. To mbasi. To kilumbu ya nkaka. Yo yantikaka bangonda tatu me luta ntangu bana ya klase na bo panzaka bansangu ya mbi sambu na yandi. Na nima bo pesaka yandi ba surnom. Bantangu ya nkaka, muntu mosi vandaka kupusa ba cachier ya Thomas sambu yo bwa mpi kusala bonso nde yo me salama na kidiba, to muntu mosi na kimvuka yina vandaka na nima na yandi vandaka kupusa yandi ngolo, mpi kana yandi baluka, yandi vandaka kuzaba ve nani me pusa yandi. Mazono, masokisa yango kumaka ngolo kibeni ntangu bo bangisaka Thomas na Internet . . .

Kana nge vandaka Thomas, nge zolaka kusala nki?

YINDULA FIOTI!

Nge me konda ve ngolo ata fioti! Na kutuba ya mbote, nge lenda nwanisa muntu ya ke sosila nge kukonda kusadila makofi. Inki mutindu?

KUSALA KIMA VE. Biblia ke tuba nde: “Zoba ke basisaka mawi na yandi yonso, kansi muntu ya mayele ke yalaka yo na pima yonso.” (Bingana 29:11) Kana nge bikala pima—ata na nganda mpamba—bantu yina ke sosila nge lenda lemba ka bo nitu.
KUVUTULA VE MBI. Biblia ke tuba nde: “Beno vutula mbi sambu na mbi ata na muntu mosi ve.” (Baroma 12:17) Kusosa kuvutula mbi ta bebisa mambu mingi kuluta.
KUDISOSILA VE MAVWANGA. Biblia ke tuba nde: “Muntu ya mayele ke monaka kigonsa mpi ke bumbanaka.” (Bingana 22:3) Na kiteso ya me fwana, tina bantu yina lenda natila nge mavwanga mpi tina mambu to bisika yina lenda sala nde bantu kusosila nge.
SALA MAMBU YINA BO KE YINDULA VE. Biblia ke tuba nde: “Mvutu ya pima ke manisaka nganzi.” (Bingana 15:1) Nge lenda meka nkutu kusekisa bo. Mu mbandu, kana muntu ya ke sosila nge ke tuba nde nge kele nene mingi, nge lenda nikisa mapeka mpi kutuba nde, “Mu ke yindula mu fwe konda fioti!”
KWENDA KA NGE. Nora yina kele ti bamvula 19 ke tuba nde: “Pima ke monisaka nde nge kele mbuta mpi nde nge ke ngolo kuluta muntu yina ke yangisa nge. Yo ke monisaka kudiyala—kikalulu yina muntu ya ke sosila nge me konda.”—2 Timoteo 2:24.
KUDITUDILA NTIMA MINGI. Mbala mingi bantu yina ke sosilaka bankaka ke bakisaka bantu yina ke vandaka ti bangindu ya mbi sambu na bo mosi mpi yina lenda sala ve ata kima mosi kana bo sosila bo. Kansi, bantu mingi ya ke sosila nge ta yambula nge kana bo mona nde nge ke pesa bo ve nzila ya kuyala nge.
SONGA MUNTU YA NKAKA. Longi mosi ya ntama ke tuba nde: “Mu ke siamisaka konso muntu yina bo ke sosila na kusonga yo na bantu ya nkaka. Yo kele diambu ya mbote ya kusala, mpi yo lenda buyisa bantu yina na kusosila muntu ya nkaka.”

Leke mosi ya bakala ke nwana ti masokisa ti kutula ntima — Kuditudila ntima ta pesa nge ngolo yina muntu ya ke sosila nge kele ve ti yo

KETI NGE ZABAKA YO?

Katula kunwanisa nge na nitu, bo lenda sosila nge mpi na:

Bangogo. “Mu lenda vila ve ata fioti bazina yina bo pesaka mu to mambu yonso yina bo vandaka kusonga mu. Bo pusaka mu na kudimona nde mu ke na mfunu ve mpi mu ke mpamba, mpi nde muntu mosi ve ke zolaka mu. Yo zolaka kuvanda mbote nde bo tula mu musapi na disu.”—Celine, bamvula 20.
Kutula nge na kingenga. “Bana ya klase na beto yantikaka kutina mu. Na midi, bo vandaka kusala bonso nde kisika kele ve na mesa na bo sambu mu vanda ve mesa mosi ti bo. Mvula ya mvimba, mu vandaka kudila mpi kudia ka mu mosi.”—Haley, bamvula 18.
Kusosila nge na Internet. “Nge lenda bula kaka bangogo fioti na clavier ya ordinatere sambu na kubebisa lukumu ya muntu—to nkutu luzingu na yandi ya mvimba. Yo lenda monana bonso nde mu me yika mungwa ti pidipidi, kansi yo lenda salama!”—Daniel, bamvula 14.

**BANGIUFULA YA ME TALA MASOKISA**
MASONGA TO LUVUNU	BAMVUTU
1 Kusosila bantu me yantikaka ve bubu.	1 Masonga. Mu mbandu, Biblia ke tubila Banefilime—kimvuka yina zina na bo ke tendula “Bantu Yina Ke Bwisaka Bantu ya Nkaka.”—Kuyantika 6:4.
2 Kusosila bankaka kele kaka bonso kusakana. Yo ke kwa yo mbi ve.	2 Luvunu. Kusosila bantu me pusaka baleke mingi na kudifwa.
3 Mutindu ya mbote ya kusukisa muntu yina ke sosila nge kele kuvutula mbi na mbi.	3 Luvunu. Mbala mingi, bantu yina ke sosilaka bankaka ke vandaka ngolo kuluta bantu yina bo ke sosila, yo yina kumeka kuvutula mbi kele kukonda mfunu.
4 Kana nge me mona bo ke sosila muntu mosi, yo ke mbote nde nge sala ve ata kima mosi.	4 Luvunu. Na mbandu yai, muntu ya me sala mbi ve yina ke tala kaka ke vandaka ve. Kana nge me mona bo ke sosila muntu kansi nge tuba kima ve, nge lenda sadisa sambu diambu yina kukuma nene na kisika ya kuyidika yo.
5 Ata yandi ke kudisonga, mbala mingi muntu yina ke sosila bankaka ke vandaka ti baketi-keti.	5 Masonga. Ata bantu ya nkaka ya ke sosilaka bantu ke kudisongaka, mingi na kati na bo ke vandaka na baketi-keti yo yina bo ke vwezaka bantu sambu bo kudiwa mbote.
6 Muntu ya ke sosilaka bankaka lenda soba.	6 Masonga. Kana bo kusadisa bo, bo lenda soba mutindu bo ke yindulaka mpi ke salaka mambu.