Bau Kelongamaka Na Yehowa Tuka Ntama Tii Bubu Yai
“Yehowa mepesaka mono ludimi ya bantu ya kulongama.”—YEZAYA 50:4, NW.
YEHOWA NZAMBI kevandaka kaka Longi tuka yandi kukumaka Tata. Na nsungi mosi ya ntangu na nima ya mbendumuka ya bana na yandi ya nkaka, yandi kuyidikaka mwana ya nzo-nkanda ya yandi kuzolaka, Mwana na yandi ya ntete, sambu na kisalu mosi na zulu ya ntoto. (Bingana 8:30) Yezaya na kapu 50, na mutindu ya mbikudulu, kemonisa mwana ya nzo-nkanda yina na kutubaka nde: “Nkwa Kimfumu Yehowa yandi mosi mepesaka mono ludimi ya bantu ya kulongama, sambu mono zaba kupesa mvutu na bantu ya kulemba.” (Yezaya 50:4, NW) Bonso mbutu ya kusadilaka malongi ya Tata na yandi na zulu ya ntoto, Yezu kuvandaka nto ya ndembikilu na bayina yonso kuvandaka ‘me lemba [ti] kilo ya nene.’—Matayo 11:28-30.
2 Yezu kusalaka bisalu mingi ya bidimbu ya nene na mvunkama ya ntete. Yandi kukangulaka meso ya bifwa-meso, nkutu mpi yandi kutelemisaka bafwa, kansi yandi kuzabanaka ntetentete na bantu ya ntangu na yandi bonso longi. Balandi na yandi ti bambeni na yandi vandaka kubinga yandi buna. (Matayo 8:19; 9:11; 12:38; 19:16; Yoane 3:2) Yezu kubakaka ve lukumu na yina yandi vandaka kulonga kansi, na mbatalala yonso, yandi kundimaka nde: “Malongi yai ya mono ke pesaka beno kele ya mono ve, kansi yo ke katukaka na muntu yina tindaka mono.” “Mono ke tubaka kaka mambu yina ya Tata longaka mono.”—Yoane 7:16; 8:28; 12:49.
Mbandu ya Mbote ya Ngwisana Longi—Mwana ya Nzo-nkanda
3 Longi ya mbote ketulaka dikebi na yandi, ya kansansa ya mbote, mpi ya zola sambu na bana ya nzo-nkanda na yandi. Yezaya kapu 50 kemonisa nde Yehowa kele ti dikebi ya mutindu yina na bayina yandi kelongaka. Mbikudulu ketuba nde: “Konso suka yandi ke tedimisa mono, yandi ke benda mono makutu sambu mono kuwa mbote-mbote nki yandi ke zola kulonga mono.” (Yezaya 50:4) Ntubilu yai awa kemonisa longi mosi ya ketedimisaka bana ya nzo-nkanda na yandi na sukasuka sambu na kulonga bau. Na kutendulaka nsadilu ya mbikudulu yai, ntendudi ya Biblia mosi kutubaka nde: “Ngindu kele nde, yau lombamaka Ngulusi kuvanda . . . muntu yina kuvandaka na mpila ya kutuba, na nzo-nkanda ya Nzambi; mpi yau lombamaka nde yandi kuvanda ya kukuka na kupesa malongi ya Nzambi na bankaka. . . . Yau lombamaka nde Mesya kuvanda ya kukuka mbotembote, na malongi ya Nzambi, na kuvanda longi ya bantu.”
4 Kyeleka kele nde, bana ya nzo-nkanda kendimaka malongi ya longi na bau. Inki mutindu Yezu kubakaka malongi ya Tata na yandi? Mvutu na yandi kuvandaka na kuwakana ti mambu ya beto ketanga na Yezaya 50:5 nde: “Mfumu Nzambi me pesa mono mayele, ebuna mono me tula ntembe ve, mono me vutuka mpi nima ve.” Ee, Yezu kuvandaka na mpusa ya ngolo ya kulonguka. Bonso mpila ya bau ketubaka, yandi tulaka makutu. Ya kuluta dyaka, yandi kuvandaka na luzolo ya mbote ya kusala yonso yina Tata na yandi lombaka yandi. Yandi vandaka nkolami ve; kansi, yandi kutubaka nde: “Kulanda luzolo na mono ve, kansi luzolo na nge.”—Luka 22:42.
5 Mbikudulu kemonisa nde Mwana kuzabisamaka na yina metadila malanda ya kusala luzolo ya Nzambi. Yau kemonika na yina muntu ya kulongamaka kutubaka nde: “Mono ke pesa nima na mono na bayina ke bula mono, mono ke pesa matama na bayina ke tumuna mono mandefo; mono ke bumba ilungi na mono ve na bayina ke bula mono ti kulosila mono mate.” (Yezaya 50:6) Mutindu mbikudulu kemonisa, bau pesaka Yezu mpasi ya lufwa na zulu ya ntoto. Ntumwa Matayo kusonikaka nde: “Ntangu yai bo kulosilaka yandi mate, . . . Bantu ya nkaka bulaka yandi bambata.” (Matayo 26:67) Mambu yai kusalamaka na maboko ya bantwadisi ya mabundu na mpimpa ya Pake ya mvu 33 T.B. Kilumbu ya kulanda, Yezu kupesaka mukongo na bankwa fimbu, mutindu basoda ya Roma kubulaka yandi nkatu nkenda na ntwala ya kukangisa yandi na nti sambu yandi kufwa.—Yoane 19:1-3, 16-23.
6 Mwana, ya kulongama mbotembote na ntwala, kukatulaka ntima ve ata fyoti na Longi na yandi. Yau kemonana na mambu ya yandi ketuba na nima na kutadilaka mbikudulu: “Kansi mafingu na bo ke sala mono kima ve, sambu Mfumu Nzambi ke sadisa mono.” (Yezaya 50:7) Kutula ntima na lusadisu ya Longi na yandi kupesaka Yezu nsendo ya mbalu. Tata na yandi tombulaka yandi, na kusakumunaka yandi na kupesa yandi kiyeka ya nene ya kele na zulu ya bansadi ya nkaka ya Nzambi. (Filipi 2:5-11) Balusakumunu ya nene mebumbama sambu na beto mpi kana na bulemfu yonso beto mendima malongi ya Yehowa mpi “me vutuka nima ve.” Bika beto kutala mutindu malongi mebongisamaka tuka ntama tii bubu yai.
Manaka ya Nene ya Ndongolo
7 Mutindu beto meyita kutuba, Yehowa kusadilaka Mumonisi na Yandi na ntoto, Yezu Kristu, sambu na kulonga malongi ya Nzambi na mvunkama ya ntete. (Yoane 16:27, 28) Mbala na mbala, Yezu vandaka kumonisa Ndinga ya Nzambi bonso mfumu ya malongi na yandi, na kumonisaka mbandu na bayina yandi kulongaka. (Matayo 4:4, 7, 10; 21:13; 26:24, 31) Na nima, malongi ya Yehowa kulandaka na nsadisa ya kisalu ya bantu ya kulongama ya mutindu yina. Yibuka nde Yezu kutumaka bau nde: “Beno kwenda kukumisa bantu yonso balongoki na mono . . . beno longa bo mpi na kulanda mambu yonso ya mono vandaka kusonga beno na kusala.” (Matayo 28:19, 20, beto bantu metengimisa bisono.) Ntangu bau kumisaka bantu balongoki , bau kukitukaka kitini ya “fami ya Nzambi . . . Dibundu ya Nzambi ya moyo.” (1 Timoteo 3:15) Bau mpi kubongisamaka na mabundu ya kingenga, kisika bau vandaka kulongama na Yehowa. (Bisalu 14:23; 15:41; 16:5; 1 Korinto 11:16) Keti malongi ya Nzambi na mutindu yina kulandaka tii bubu yai?
8 Ya kyeleka, yau kulandaka! Bilumbu tatu na ntwala ya lufwa na yandi, Yezu yitaka kutuba nde na ntwala ya nsuka ya ngidika ya bima yai, yau kulombamaka nde kisalu mosi ya nene ya kusamuna kusalama. Yandi kutubaka nde: “Bo ta longaka Nsangu yai ya Mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo. Ebuna na nima, nsuka ya ntoto ta kwisa.” Yezu landaka na kutendula kisadilu ya tatwadisa manaka yina ya kusamuna ti kulonga na nza ya mvimba. Yandi kutubilaka “[mpika ya kwikama mpi ya mayele, NW]” yina lombamaka kuvanda nzila to kisadilu sambu na kupesa bansadi na Yandi madya ya kimpeve. (Matayo 24:14, 45-47) Yehowa Nzambi kesadilaka “mpika” yina sambu na kukengila mambu ya Kimfumu na ntoto ya mvimba.
9 Bubu yai, mpika ya kwikama mpi ya mayele metungama na ndambu ya mebikala ya bamvingidi-difwa ya Kimfumu. Bayai kele Bakristu ya kupakulama, ndambu ya mebikalaka ya 144000, bayina “kele bantu ya Kristu” mpi ndambu ya “nkuna ya Abrahami.” (Galatia 3:16, 29 NW; Kusonga 14:1-3) Inki mutindu nge lenda kuzaba mpika ya kwikama mpi ya mayele? Ntetentete na kisalu ya bau kesala mpi na kundima na bau ya Ndinga ya Nzambi, Biblia.
10 Yehowa kesadilaka “mpika” yai bonso kisadilu na yandi ya kulongila bantu bubu yai. Bayina ya kele na kalasi ya mpika kubakaka zina ya Bambangi ya Yehowa na 1931. Tuka ntangu yina mafunda mevukanaka na bau mpi mendimaka zina yina mpi kevukanaka na kusamuna Kimfumu ya Nzambi. Zulunalu Nzozulu ya Nkengi Kesamunaka Kimfumu ya Yehowa, kele kisadilu ya ntete ya “mpika” kesadilaka na kisalu ya kulonga. Kansi mikanda ya nkaka kesadilamaka, bonso mikanda, tumikanda, batrakiti, ti zulunalu Réveillez-vous!.
11 Dyaka, “mpika” keyidikaka banzo-nkanda ya mpila na mpila. Na kati na yau, Nzo-nkanda ya Biblia ya Galaad, yina kele ndongolo ya ngonda tanu ya kebongisaka bansadi ya batoko sambu na kisalu ya misionere na bansi ya nzenza, mpi ndongolo ya Nzo-nkanda ya Ndongolo ya Kisalu ya bangonda zole, yina kelongaka bankuluntu ti bansadi ya kisalu yina mekwelaka ntete ve sambu na bisalu ya sipesiale ya teokratiki. Ya nkaka kele Nzo-nkanda ya Kisalu ya Kimfumu, na kati na yau bankuluntu ti bansadi ya kisalu kelongamaka nsungi na nsungi, sambu na mikumba na bau na kati ya dibundu, mpi Nzo-nkanda ya Kisalu ya Bapasudi-nzila, yina kebongisaka bansamuni ya ntangu yonso na kuvanda ngolo na kisalu na bau ya kusamuna.
12 Kitini ya nkaka ya manaka ya ndongolo kele balukutakanu tanu ya konso mposo yina kesalamaka na kati ya kiteso ya mabundu kuluta 75500 ya bantu ya Yehowa na ntoto ya mvimba. Keti nge kebakaka mambote ya balukutakanu yai na kiteso ya kuluta mingi? Na kutulaka dikebi na nge na malongi ya kepesama, keti nge kemonisaka nde nge kekwikilaka mpenza nde nge kele, na mpila ya kutuba, na nzo-nkanda ya Nzambi? Keti kuyela na nge na kimpeve kemonisa pwelele na bankaka nde nge kele na “ludimi ya bantu ya kulongama”?—Yezaya 50:4, NW; 1 Timoteo 4:15, 16.
Bau Kelongama na Balukutakanu ya Dibundu
13 Yehowa kelongaka bantu na yandi ntetentete na nsadisa ya kulonguka ya Biblia ya konso mposo, na kusadilaka Nzozulu ya Nkengi bonso kisadilu ya kulongila. Keti nge ketadilaka balukutakanu yai bonso kisika ya nge lenda kulongama na Yehowa? Ata nkutu Yezaya 50:4 ketadila ntete Yezu, yau lenda kutadila mpi bayina yonso ya kendima ngidika ya Nzambi na kuzwa “ludimi ya bantu ya kulongama.” Mutindu mosi ya nge lenda kusonga nde nge ketondaka mbalu ya Nzozulu ya Nkengi kele kutanga konso nimero kaka na nima ya ntangu ya nge kezwa yau. Ebuna, na ntangu ya kulonguka ya Nzozulu ya Nkengi na dibundu, nge lenda songa ntonda na nge na Yehowa na kuvandaka pana, ye mpi na kubongamaka na kuta kimbangi ya kivuvu na nge na ntwala ya bantu yonso.—Baebreo 10:23.
14 Keti nge kendimaka nde na bamvutu na nge na balukutakanu, nge lenda kubaka kabu na manaka ya nene ya ndongolo ya Yehowa? Ntembe kele ve, kupesa bamvutu na balukutakanu kele mutindu mosi ya mfunu ya beto lenda kupusana na “zola mpi na bisalu ya mbote.” (Baebreo 10:24, 25, NW) Keti bana mpi lenda kubaka kabu na manaka yai ya ndongolo? Ee, bau lenda. Bamvutu ya mebasika na ntima ya baleke kesyamisaka mbala mingi bambuta. Na bantangu ya nkaka, bantu ya mpa na balukutakanu na beto kepusamaka na bamvutu ya bana na kutula dikebi ya mbote na kyeleka ya Biblia. Baleke ya nkaka kekunaka kikalulu ya kutanga bamvutu na bau mbala mosi na paragrafe to kutubulula mvutu ya mbuta kesongaka bau na dikutu. Kansi, yau kepesaka nsyamisa mingi kana bamvutu na bau kele ya kubongisa mbotembote. Bamvutu ya mutindu yina kepesaka lukumu na Longi na beto ya Nene mpi kekumisaka manaka na yandi ya ndongolo.—Yezaya 30:20, 21.
15 Yau kele kyese mingi na kumonaka bana kezola kubaka kabu na kukembila Nzambi na beto. Yezu kundimaka bangogo ya lukembilu ya kubasikaka na bana. (Matayo 21:15, 16) Nkuluntu mosi ya Mukristu ketuba nde: “Ntangu mono kuvandaka mwana, mono vandaka kuzola kupesa mvutu na kulonguka ya Nzozulu ya Nkengi. Na nima ya kusadisa mono na kubongisa mvutu, tata na mono vandaka kulomba nde mono kutubulula yau kiteso ya mbala nsambwadi.” Kana mpila kele na ntangu ya kulonguka na beno ya dibuta, beno bibuti lenda kusadisa bana na beno na kubongisa bamvutu na bangogo na bau mosi na baparagrafe ya kuponama ya Nzozulu ya Nkengi. Sadisa bau na kubakisa dibaku ya nene ya bau kele na yau ya kubaka kabu na manaka ya ndongolo ya Yehowa
16 Malongi ya balukutakanu ya nkaka mpi fwete kupesama dikebi ya mbote, na bayina kebaka dibaku ya kulonga yau ti bayina kewidikila yau. Tuka kiteso ya bamvula kuluta 50 bubu yai, Yehowa kesadilaka Nzo-nkanda ya Kisalu ya Teokrasi ya konso mposo na kulonga mafunda ya babakala ti bankento sambu na kusamuna nsangu ya Kimfumu mbotembote. Bayina ya kevukanaka ti kikesa yonso na dibundu lenda kusonika bazina, ata bantu yina mpi ya mebanda sesepi na kukwisa na balukutakanu, kaka kana bau ketwadisa luzingu na bau na mutindu mosi ya kewakana ti minsiku ya Bukristu.
17 Kitini ya nkaka ya ntama ya manaka ya ndongolo kele Lukutakanu ya Bantu Yonso. Mutindu zina na yau kemonisa, lukutakanu yai kuvandaka sambu na kuzabisa malongi ya lufulu ya Biblia na bantu yina kele Bambangi ve. Yau yina, muntu ya kesala disolo fwete kumonisa mambu na mutindu nde yau kubakisama na bantu yina kewa nsangu na mbala ya ntete. Yau kelomba kutendula bangogo bonso “mameme ya nkaka,” “bampangi,” mpi “bayina mebikalaka,” bongogo ya bantu yina kele Bambangi ve lenda ve kubakisa. Sambu bantu ya kevandaka na Lukutakanu ya Bantu Yonso lenda kuvanda ti balukwikilu to bikalulu ya kewakana ve ti Masonuku—kansi ya kendimama na kimvuka ya bantu ya bubu yai—mutubi fwete kumonisa ntangu yonso ntubilu ya mayele na kusawula ve balukwikilu to bikalulu ya mutindu yina.—Fwanisa ti 1 Korinto 9:19-23.
18 Kulonguka Mukanda ya Dibundu kele lukutakanu mosi na kati na yau mikanda ya mebongisama na lutwadisu ya mpika ya kwikama mpi ya mayele kelongukamaka kumosi ti Biblia. Mukanda Révélation: le grand dénouement est proche! kele yina kelongukama na bansi mingi bubu yai. Lukutakanu ya Kisalu mesalamaka sambu na kusadisa bantu ya Yehowa na kubaka kabu ya kufwana na kusamuna nsangu ya mbote ya Kimfumu ti kukumisa bantu balongoki.—Matayo 28:19,20; Marko 13:10.
Bau Kelongamaka na Balukutakanu ya Nene
19 Na nsungi mosi ya bamvu kuluta nkama mosi, ‘mpika ya kwikama’ mebongisaka balukutakanu ya nene ti ya fyoti sambu na kulongama mpi kusyamisama ya sipesiale ya Bakristu ya kyeleka. Ntangu yai, balukutakanu tatu ya kuluta nene ya mutindu yina kesalamaka konso mvula. Kele ti lukutakanu ya kilumbu mosi yina kesalamaka na kimvuka ya mabundu yina kele na nzyunga mosi. Na mvula mosi, konso nzyunga mpi kevandaka ti mvukana ya bilumbu zole ya kebingamaka nde lukutakanu ya nzyunga. Na kuyika, kele ti mvukana ya mebingama lukutakanu ya distrike, ya kevukisaka ntalu mosi ya banzyunga. Na bamvula ya nkaka, yau lenda kuvanda ti balukutakanu ya bansi mingi. Bamvukana ya kuluta nene yai ti Bambangi ya banzenza ya kekatukaka na bansi mingi kesyamisaka mpenza lukwikilu ya bantu ya Yehowa!—Fwanisa ti Kulonga 16:16.
20 Na 1922, ntangu kiteso ya bantu 10000 kukutanaka na Cedar Point, Ohio, U.S.A., bawi kupusamaka na nsyamisa ya mutubi: “Yai kele kilumbu ya bilumbu yonso. Tala, Ntotila keyala! Beno kele bamwangi-nsangu na yandi. Yau yina samuna, samuna, samuna, Ntotila ti kimfumu na yandi.” Balukutakanu ya kuluta nene ya mutindu yina ketubilaka mingimingi kisalu ya kusamuna. Mu mbandu, na lukutakanu ya bansi mingi ya New York City na 1953, luzayisu kupesamaka sambu na kutulama ya manaka mosi ya lusadisu sambu na kisalu ya nzo na nzo na mabundu yonso. Kutulama na yau kuvandaka ti mbutu mosi ya mbote na kisalu ya kusamuna Kimfumu na bansi mingi.
Bau Melongama na Nzambi Sambu na Kulonga
21 Ya kyeleka, Yehowa kele ti manaka ya ndongolo ya kuluta kitoko na zulu ya ntoto bubu yai! Bayina yonso kebaka luta na yau lenda kulongama na Nzambi, ee, lenda kuvanda na kati ya bayina kupesamaka “ludimi ya bantu ya kulongama.” Dibaku ya inki mutindu ya kuvanda, na mpila ya kutuba, na nzo-nkanda ya Nzambi! Kansi, na kundimaka dibaku yai, beto lenda kuvila ve lukanu na yau. Yehowa kulongaka Yezu na mpila nde yandi lendaka kulonga bankaka, ye Yezu kulongaka balongoki na yandi na mpila nde bau lendaka kusala kisalu yina mosi mutindu yandi vandaka kusala kansi nkutu na kiteso mosi ya kuluta nene. Mutindu mosi, beto kelongama na manaka ya nene ya ndongolo ya Yehowa sambu na kulonga bankaka.—Yoane 6:45; 14:12; 2 Korinto 5:20, 21; 6:1; 2 Timoteo 2:2.
22 Keti nge ketuba, mutindu Moize kutubaka nde: “Mono zaba kutuba mbote ve na meso ya bantu mingi,” to mutindu Yeremia kutubaka nde: “Mono zaba kutuba ve, mono kele ka mono mwana”? Yehowa tasadisa nge mutindu yandi kusadisaka bau. Yandi kusongaka Moize nde: “Mono muntu ta sadisa nge na kutuba, mono muntu ta songa nge mambu ya nge ta tuba.” Ye na Yeremia yandi kusongaka yandi nde: “Kutina bo boma ve . . . mono ta keba nge.” (Kubasika 4:10-12; Yeremia 1:6-8) Ntangu bantwadisi ya mabundu zolaka kukangisa balongoki na yandi munoko, Yezu kutubaka nde: “Kana bo vanda pima, matadi ta tuba na ndinga ya ngolo.” (Luka 19:40) Kansi matadi kutubaka ve na ntangu yina, yau mpi kele na mfunu ya kusala buna ve bubu yai sambu Yehowa kele na kusadila ludimi ya bantu na yandi ya melongama na kumwanga nsangu ya Kimfumu na yandi.
[Study Questions]
1, 2. (a) Sambu na inki Yehowa kuyidikaka mwana ya nzo-nkanda ya yandi kuzolaka, ye mbutu kuvandaka inki? (b) Inki mutindu Yezu kundimaka nto ya malongi na yandi?
3. Inki mutindu mbikudulu ya Yezaya kemonisa dikebi ya Yehowa sambu na bayina yandi kelongaka?
4. Inki mutindu Yezu kupesaka mvutu na malongi ya Tata na yandi?
5. (a) Inki kemonisa nde Yezu yitaka kuzaba na ntwala bampasi ya yandi fwanaka kubaka na zulu ya ntoto? (b) Inki mutindu mbikudulu ya Yezaya 50:6 kulungamaka?
6. Inki kemonisa nde Yezu kukatulaka ve ntima na Longi na yandi, ye sendo kupesamaka inki mutindu na kutula ntima na yandi?
7. Inki mutindu Yehowa kulandaka malongi na yandi na zulu ya ntoto?
8. Inki mutindu Yezu kumonisaka nde kisalu ya kusamuna lombamaka kutwadisama na zulu ya ntoto na ntwala nsuka kukwisa?
9. Banani mesalaka mpika ya kwikama mpi ya mayele?
10. Inki bisadilu kalasi ya mpika ya kwikama mpi ya mayele kesalaka sambu na kuyedisa malongi ya Yehowa?
11. Inki banzo-nkanda “mpika” mebongisaka, ye inki kevandaka lukanu ya mosi na mosi na banzo-nkanda yai?
12. Inki kele kitini ya konso mposo ya manaka ya ndongolo?
13. (a) Inki kele mutindu mosi ya mbote ya Yehowa kelongilaka bantu na yandi bubu yai? (b) Inki mutindu beto lenda kusonga ntonda na beto sambu na Nzozulu ya Nkengi?
14. (a) Sambu na inki kupesa mvutu na balukutakanu kevandaka dibaku ya mfunu? (b) Inki mutindu mvutu ya baleke kevandaka na nsyamisa?
15. Inki bibuti lenda kusala sambu na kusadisa bana na kupesa bamvutu na mutindu mosi ya mbote?
16. Nzo-nkanda ya Kisalu ya Teokrasi kevandaka na inki mambote, ye nani lenda kusonikisa zina?
17. (a) Sambu na inki lukanu ya Lukutakanu ya Bantu Yonso kutulamaka? (b) Inki mambu batubi ya disolo ya bantu yonso fwete kutula na ntu?
18. Inki kele balukutakanu ya nkaka ya konso mposo, ye yau kesadilaka inki lukanu?
19. Inki bamvukana ya kuluta nene “mpika” keyidikaka konso mvula?
20. Inki ketubamaka mingimingi na bamvukana ya kuluta nene ya Bambangi ya Yehowa?
21. Inki dibaku beto kezola kundima, nkatu kuvila lukanu na yau?
22. (a) Inki mpasi Moize ti Yeremia kuvandaka na yau, kansi inki mutindu yau kuyilamaka? (b) Inki kundima beto lenda kuvanda na yau nde Nzambi tasadisa sambu kisalu ya kusamuna Kimfumu kusalama?
[Caption on page 1]
[Bangyufula]
[Caption on page 27]
[Ntendula ya Bifwanisu ya lutiti 27]
Bamvutu ya mebasika na ntima ya bana kesyamisaka mbala mingi bambuta
[Caption on page 1]
Keti Nge lenda Kuvutula Mvutu?
◻ Inki mbandu ya mbote ya ngwisana Longi—Mwana ya nzo-nkanda metendulama na Yezaya kapu 50?
◻ Inki mutindu Yehowa melandisa manaka ya nene ya ndongolo?
◻ Inki kele mwa bitini ya manaka ya ndongolo ya Yehowa?
◻ Sambu na inki yau kele dibaku ya nene na kubaka kabu na manaka ya ndongolo ya Yehowa?