Bangyufula Ya Batangi
Inki longoki Yakobo zolaka kutuba ntangu yandi kutubaka nde: “Bampangi na mono, mbote ve bantu mingi na kati na beno . . . kukuma balongi ya Dibundu, sambu beno zaba nde beto balongi Nzambi ta sambisa beto ngolo kuluta bantu ya nkaka”?—Yakobo 3:1.
Yau kele kyeleka nde Yakobo vandaka ve kumanisa kikesa ya Bakristu na kulonga kyeleka na bantu ya nkaka. Na Matayo 28:19, 20, Yezu kutumaka balongoki na yandi na “kukumisa bantu yonso balonguki . . . beno longa bo mpi na kulanda mambu yonso ya mono vandaka kusonga beno.” Yau yina, Bakristu yonso fwete kuvanda balongi. Ntumwa Polo kulongisilaka Bakristu Baebreo sambu bau vandaka mekuma ntete ve balongi. Yandi kusonikaka nde: “Bubu yai beno zolaka kuvanda balongi, sambu beno yantikaka na kulonguka katuka ntama. Kansi yo kele kaka mfunu na kulonga beno diaka mambu ya ntete-ntete kele na nsangu ya Nzambi.”—Baebreo 5:12.
Ebuna, inki Yakobo vandaka kutubila? Yandi vandaka kutubila bayina ya kele ti mikumba ya kulonga ya kuswaswana na kati ya dibundu. Na Efezo 4:11, beto ketanga nde: “Yandi [Yezu Kristu Mfumu ya dibundu] tulaka bantu ya nkaka bantumwa, bantu ya nkaka baprofete, bantu ya nkaka baevanzeliste, bantu ya nkaka bapastere, bantu ya nkaka mpi balongi.” Kuvandaka ti mikumba ya kilongi ya kuswaswana na kati ya mabundu ya mvunkama ya ntete mutindu yau kele bubu yai. Mu mbandu, Nto-Kimvuka kemonisa “mpika ya kwikama mpi ya meyele” mpi mukumba na yau ya kuswaswana kele ya kukengila malongi ya dibundu ya inza ya mvimba. (Matayo 24:45, NW) Bankengi-ntambudi ti bankuluntu ya mabundu kele mpi ti mikumba ya kulonga ya kuswaswana.
Keti Yakobo vandaka kusonga babakala ya kukuka nde bau fwete kubuya kisalu ya kulonga sambu na kutina kusambisa ya ngolo ya Nzambi? Buna ve ata fyoti. Kisalu ya nkuluntu kele dibaku ya nene, mutindu yau kemonana na 1 Timoteo 3:1, yina ketuba nde: “Kana muntu ke zola kuvanda [nkuluntu, NW] ya Dibundu, zaba nde yandi me sola kisalu mosi ya mbote.” Mosi na kati ya malombo sambu na kupona muntu bonso nkuluntu ya dibundu kele nde muntu “fweti zaba kulonga.” (1 Timoteo 3:2) Yakobo vandaka ve kutuba mambu ya kuswaswana ti bangogo ya kupemama ya Polo.
Kansi, yau kemonana nde na mvunkama ya ntete ya T.B., bankaka vandaka kudikumisa bau mosi balongi, ata nkutu bau kuvandaka ve ya kukuka to ya kusolama. Yau fwete kuvanda nde bau vandaka kumona bonso nde kele ti lukumu na kisalu yina, ye bau kuvandaka na mpusa ya nkembo na bau mosi. (Fwanisa ti Marko 12:38-40; 1 Timoteo 5:17.) Ntumwa Yoane kutangaka zina ya Diotrefesi, yina ‘vandaka kuzola kuvanda mutwadisi, yandi ke buya Yoane.’ (3 Yoane 9) Mukanda ya ntete ya Timoteo 1:7 ketubila bantu ya nkaka yina ‘zola[ka na ku]vanda balongi ya Bansiku ya Nzambi, kansi bo ke bakisa ve nki mambu bo ketuba ti nki mambu bo kelonga bantu na ngolo nde bo fweti sala yo.’ Bangogo ya Yakobo 3:1 ketadila ntetentete babakala yina ya kele na nzala ya kukuma balongi kansi ya kele ti bikuma ya mbi. Bantu ya mutindu yina lenda kusala mameme mbi mbotembote ye sambu na yau, bau lenda kusambisama ngolo.—Roma 2:17-21; 14:12.
Yakobo 3:1 kele mpi ngibusa ya mbote sambu na bayina ya kele ya kukuka mpi ya kesalaka bonso balongi. Sambu mingi mepesamaka na bau, mingi mpi talombama na bau. (Luka 12:48) Yezu kutubaka nde: “Na Kilumbu yina ya Nzambi ta sambisa bantu, bo ta samba sambu na konso mambu yina ya mpamba-mpamba ya bo vandaka kutuba.” (Matayo 12:36) Mambu yai kele mpenza ya kyeleka sambu na bantu yina kele ti ndinga ya bupusi mingi, bankuluntu ya kusolama.
Bankuluntu tasambisama sambu na mutindu ya bau ketadilaka mameme ya Yehowa. (Baebreo 13:17) Mambu ya bau ketubaka ketadilaka luzingu ya bantu. Yau yina, nkuluntu fwete kusala keba na kukuna ve dibanza na yandi mosi to kupesa mameme mpasi mutindu Bafarize vandaka kusala. Yandi fwete kusala ngolo na kumonisa zola ya mudindu ya kiteso mosi ti yina ya Yezu kumonisaka. Na mambu yonso ya kulonga, mingimingi na mambu ya kusambisa, nkuluntu fwete kutesa bangogo na yandi, yandi fwete kusadila ve konso mambu yina kekwisila yandi na nsongi ya ludimi, to kupesa kaka ngindu na yandi mosi. Na kudikotisaka kibeni na kati ya malongi ya Yehowa, Ndinga na yandi, mpi lutwadisu na yandi na nsadisa ya organizasio na yandi, ngungudi tabaka balusakumunu ya mbalu ya Nzambi, kansi “kusambisa ya ngolo” ve.