Mutindu Bankengi-ntambudi Kesalaka Bonso Bakapita Ya Kwikama

“Na kiteso ya dikabu yina konso muntu bakaka, beno sadila yau na kusadilaka bamosi ti bankaka bonso bakapita ya mbote ya lemvo ya Nzambi yina kemonisamaka na mitindu mingi.”​—⁠1 PIERE 4:​10, NW.

YEHOWA kesadilaka Bakristu yonso ya kwikama bonso bakapita. Mbala mingi kapita kevandaka nsadi yina kevandaka na mukumba ya nzo. Yandi lenda mpi kutwadisa bisalu ya kinkita ya mfumu na yandi. (Luka 16:​1-3; Galatia 4:​1, 2) Yezu bingaka kimvuka ya bapakulami na yandi ya kwikama na zulu ya ntoto nde “kapita ya kwikama.” (NW) Na kapita yai, yandi pesaka “bima na yandi yonso,” na kati na yau bisalu yina metala kusamuna Kimfumu.​—⁠Luka 12:​42-44; Matayo 24:​14, 45.

² Ntumwa Piere kutubaka nde Bakristu yonso kele bakapita ya lemvo ya Nzambi yina beto mefwana ve na kubaka mpi yina memonisamaka na mitindu mingi. Konso Mukristu kele ti kisika yina yandi lenda lungisa kisalu ya kikapita ya kwikama. (1 Piere 4:10) Bankuluntu Bakristu yina mesolamaka kele bakapita, mpi na kati na bau kele ti bankengi-ntambudi. (Tito 1:⁠7) Inki mutindu bankuluntu bantambudi yai fwete tadilama? Inki bankadilu ti balukanu bau fwete vanda na yau? Mpi inki mutindu bau lenda kulungisa kisalu ya kuluta mbote?

Ntonda Sambu na Kisalu na Bau

³ Na kusonikilaka nkengi-ntambudi mosi ti nkento na yandi, bankwelani zole ya Bakristu kutubaka nde: “Beto kezola kumonisa ntonda na beto sambu na ntangu yonso ti zola ya beno pesaka beto. Bonso dibuta, beto bakaka mpenza mambote na nsyamisa mpi ndongisila na beno yonso. Beto kezaba nde beto fwete landa na kuyela na kimpeve, kansi ti lusadisu ya Yehowa mpi ti bampangi ya babakala mpi ya bankento bonso beno, bampasi kekuma petepete mpenza.” Bantubilu bonso yai kevandaka mbala na mbala sambu bankengi-ntambudi kemonisaka mpusa na konso muntu na kati ya bankundi bankwikidi, kaka mutindu kapita ya mbote kesungiminaka bampusa ya nzo na yandi. Bamosi kele mitubi ya mbote mpenza. Bamingi kele ngolo na kisalu ya kusamuna, kansi bankaka mezabanaka sambu na tiya ti nkenda na bau. Na kuyedisaka mpi na kusadilaka makabu ya mutindu yina na kusadila bantu yankaka, na kikuma ya mbote bankengi-ntambudi lenda kubingama nde “bakapita ya mbote.”

⁴ Ntumwa Polo kusonikaka nde: “Dyambu ya kesosamaka na bakapita kele nde muntu kuvanda ya kwikama.” (1 Korinto 4:​2, NW) Kusadila bankundi Bakristu na dibundu yankaka konso mposo kele dibaku mosi kaka mpi ya kyese. Ata mpila yina, yau kele mpi mukumba ya kilo. Ebuna, inki mutindu bankengi lenda lungisa kikapita na bau na kwikama mpi mbotembote?

Kulungisa Kikapita na Bau Mbotembote

⁵ Kutula ntima na Yehowa na kati ya kisambu kele mfunu kana bankengi-ntambudi kezola kuvanda bakapita ya mbote. Sambu na manaka na bau mpi mikumba mingi, bantangu yankaka bau lenda kudiwa nde kizitu melutana. (Fwanisa ti 2 Korinto 5:⁠4.) Na yau, bau kele na mfunu ya kusala na kuwakana ti nkunga yai ya Davidi, muyimbi-bankunga: “Bikila Mfumu Nzambi kilo na nge, yandi ta sadisa nge; yandi ta bika ve muntu ya mbote bo bwisa yandi.” (Nkunga 55:23) Bangogo ya Davidi yai kele mpi ya kulembika: “Beno pesa Mfumu Nzambi lukumu; yandi muntu ke bakaka kilo na beto konso kilumbu.”​—⁠Nkunga 68:⁠20.

⁶ Na wapi Polo bakaka kikesa sambu na kusungimina mikumba na yandi ya kimpeve? Yandi sonikaka nde: “Mono me lunga kusala mambu yonso na ngolo [ya muntu yina] ke pesaka mono [ngolo].” (Filipi 4:13) Ee, Yehowa Nzambi vandaka Nto ya ngolo ya Polo. Mutindu mosi, Piere pesaka ndongisila nde: “Muntu yina ke sadilaka bantu ya nkaka, yandi fweti sala ti ngolo yina ya Nzambi ke pesaka yandi, na mpila nde, na mambu yonso, bantu kupesa lukumu na Nzambi na zina ya Yesu Kristo.” (1 Piere 4:11) Mpangi-bakala mosi yina vandaka nkengi-ntambudi bamvula mingi tubilaka mingi mfunu ya kutula ntima na Nzambi, na kutubaka nde: “Ntangu yonso tula ntima na Yehowa sambu na kubongisa makambu, mpi sosa lusadisu ya organizasio na yandi.”

⁷ Nkengi-ntambudi ya mbote kele ti mfunu ya bukatikati. Bonso Bakristu yankaka, yandi kesalaka ngolo na “[kuzikisa] mambu yina ya kuluta mfunu.” (Filipi 1:10)a Ntangu bankuluntu ya dibundu kele ti bangyufula na yina metala dikambu mosi, yau kele mayele sambu na bau na kusolula yau ti nkengi ya nzyunga yina mekwisa kutala dibundu. (Bingana 11:14; 15:22) Ngatu, bamboninu ya bukatikati ti ndongisila na yandi ya Masonuku tamonana mpenza mfunu mutindu bankuluntu kelanda na kubongisa dikambu na nima ya yandi tabikisa dibundu. Yau kemonana nde na ngindu ya mutindu mosi, Polo tubilaka Timoteo nde: “Mambu yina ya nge waka na mono ntangu mono vandaka kulonga na meso ya bantu mingi, longa yo mpi na bantu yina ya nge lenda tula ntima, bayina me lunga mpi na kulonga yo na bantu ya nkaka.”​—⁠2 Timoteo 2:⁠2.

⁸ Kulonguka Masonuku, kusosa, mpi kuyindulula melombama sambu na kupesa ndongisila ya mbote. (Bingana 15:28) Nkengi ya distrike mosi tubaka nde: “Na ntangu ya kukutana ti bankuluntu, beto fwete banga ve na kundima nde beto kezaba ve mvutu ya ngyufula mosi.” Kusala kikesa sambu na kubaka “mabanza ya Kristo” na dikambu mosi kepesaka nzila na kupesa ndongisila yina kele na lufulu na Biblia mpi yina tasadisa bankaka na kulanda luzolo ya Nzambi. (1 Korinto 2:16) Ntangu yankaka, nkengi-ntambudi tavanda na mfunu ya kusonikila La Société Watch Tower sambu na lutwadisu. Na konso dyambu yina, lukwikilu na Yehowa mpi zola sambu na kyeleka kele kibeni mfunu kuluta mutindu na beto ya kudimonisa na bankaka to na ntubilu ya kitoko. Na kisika ya kukwisa ti “kutuba ya kitoko to ya mayele,” Polo yantikaka kisalu na yandi na Korinto “na kikesa ve, . . . [na] kutekita mpenza na boma.” Keti dyambu yai monisaka yandi bonso muntu ya mpamba? Ve, kansi yau sadisaka bantu ya Korinto na kuvanda ti lukwikilu, “na mayele ya bantu ve, kansi na ngolo ya Nzambi.”​—⁠1 Korinto 2:​1-5, NW.

Bankadilu Yankaka ya Mfunu

⁹ Kuditula na kisika ya muntu yankaka kesadisaka bankengi-ntambudi na kuzwa bambutu ya mbote. Piere longisilaka Bakristu yonso na ‘kumonisa zola ya bampangi,’ to na kuvanda ti “ntima ya mawa.” (1 Piere 3:​8, NW, noti na nsi ya lutiti) Nkengi ya nzyunga mosi kewaka mpusa ya ‘kutula dikebi na konso muntu na kati ya dibundu mpi na kuwidikila na masonga yonso.’ Ti ngindu ya mutindu mosi, Polo sonikaka nde: “Beno vanda na kiese ti bantu yina ke na kiese, beno dila ti bantu yina ke dila.” (Roma 12:15) Nkadilu ya mutindu yina kepusaka bankengi-ntambudi na kusala bikesa ya kyeleka sambu na kubakisa makambu ti bamvwandilu ya bankundi bankwikidi. Na nima, bau lenda kupesa ndongisila ya Masonuku ya kutunga yina lenda lungisa lukanu ya kyeleka kana yau mesadilama. Nkengi ya nzyunga yina kesalaka ngolo na kuditula na kisika ya bantu yankaka kuzwaka mukanda yai ya kukatukaka na dibundu mosi mfinama na Turin, Italie: “Kana nge kezola bantu kumonisa mpusa sambu na nge, monisa mpusa na bantu yankaka, kana nge kezola kusepedisama, sepedisa, kana nge kezola kuzolama, zola; kana nge kezola kusadisama, vanda ya kuyilama na kusadisa. Yai kele dyambu ya beto melongukaka na nge!”

¹⁰ Kuvanda ya kudikulumusa mpi ya kuyilama na kuwidikila kesadisaka bankengi-ntambudi na kusala mambote mingi. Nkengi ya nzyunga mosi kumonaka nde: “Yau kele mfunu mingi na kulunda nkadilu ya kudikulumusa.” Yandi vandaka kukebisa bankengi-ntambudi ya mpa nde: “Beno kudibika ve na kupusama kuluta mingi na bampangi yina kele ti mbongo mingi sambu na yina ya bau lenda sala sambu na beno, beno sukisa ve kinduku na beno kaka na bantu ya mutindu yina, kansi beno sala ntangu yonso ngolo sambu na kutadila bantu yankaka kukonda kukabulakabulaka.” (2 Bansangu 19:​6, 7) Mpi nkengi-ntambudi ya kudikulumusa mpenza tavanda ve ti mboninu ya kuluta ndilu ya mfunu na yandi mosi bonso muntu ya kemonisa la Société. Nkengi ya distrike mosi pesaka komantere yai ya kufwana: “Vanda ya kudikulumusa mpi na luzolo ya kuwidikila bampangi. Ntangu yonso vandaka muntu yina ya bau lenda tubila kima.” Bonso muntu ya kuluta nene ya ntangu yonso, Yezu Kristu lendaka kusala nde bantu kubanga yandi, kansi yandi vandaka ya kudikulumusa mpenza mpi ya kuyilama na kuwidikila na mpila nde ata bana ya fyoti vandaka kudiwa na kisika na bau na ntwala na yandi. (Matayo 18:5; Marko 10:​13-16) Bankengi-ntambudi kezolaka bana ya fyoti, batoko, minunu​—⁠na ntembe ve konso muntu na kati ya dibundu​—⁠kuvanda na kimpwanza na kupusana na bau.

¹¹ Ya kyeleka, “beto yonso ke salaka bifu mingi,” mpi ata nkengi-ntambudi mosi ve kekondaka kusala bifu. (Yakobo 3:⁠2) Ntangu bau kesala bifu, kulomba ndolula na masonga yonso kepesaka bankuluntu yankaka mbandu ya kudikulumusa. Na kutadila Bingana 22:​4, (NW) “mbutu ya kudikulumusa ti kubanga [ya luzitu] Yehowa kele kimvwama ti lukumu mpi luzingu.” Mpi keti bansadi ya Nzambi yonso kele ve na mfunu ya ‘kuvanda ya kudikulumusa na kutambula ti Nzambi na bau’? (Mishe 6:​8, NW, Mbasika ya 1960) Ntangu yandi yufulamaka inki ndongisila yandi zolaka kuvanda na yau sambu na nkuluntu-ntambudi ya mpa, nkengi ya nzyunga mosi salaka komantere nde: “Vanda na luzitu ya mingi sambu na bampangi yonso, mpi baka bau bonso bau kele mbote kuluta nge. Nge talonguka mambu mingi na bampangi. Bikala ya kudikulumusa. Vanda mutindu nge kevandaka. Kuyika ve bikalulu yina nge kevandaka na yau ve.”​—⁠Filipi 2:⁠3.

¹² Kikesa sambu na kisalu ya Bukristu kepesaka kilo na bangogo ya nkengi-ntambudi. Ya kyeleka, ntangu yandi ti nkento na yandi kepesa bambandu ya kikesa na kisalu ya kusamuna nsangu ya mbote, bankuluntu, bankento na bau, mpi bantu yankaka ya dibundu yina mebikala kesyamisama na kumonisa kikesa na kisalu na bau. Nkengi ya nzyunga mosi longisilaka nde: “Vanda na kikesa sambu na kisalu.” Yandi yikaka nde: “Mono memonaka nde, na kutuba ya mbote, kana dibundu kele kikesa mingi na kisalu, bau kekutanaka ve ti makambu mingi.” Nkengi ya nzyunga yankaka monaka nde: “Mono keyindula nde kana bankuluntu kesala na bilanga ti bampangi-babakala mpi bampangi-bankento mpi kesadisa bau na kusepela na kisalu, dyambu yai tabuta ngemba ya mabanza mpi luyangalalu ya kuluta nene na kusadila Yehowa.” Ntumwa Polo ‘bakaka kikesa na kuzabisa Nsangu ya Mbote ya Nzambi na bantu ya Tesalonika na bandwanisa mingi.’ Mpila ya kuyituka kele ve nde bau vandaka ti bambambukilu ya mbote ya bavizite ti kisalu na yandi ya kusamuna mpi vandaka na nzala ya ngolo ya kumona yandi dyaka!​—⁠1 Tesalonika 2:​1, 2; 3:​6, NW.

¹³ Na ntangu yandi kesala ti bankundi Bakristu na kisalu ya bilanga, nkengi-ntambudi ketadilaka bamvwandilu ti bandilu na bau. Ata bangindu na yandi lenda sadisa, yandi kezaba nde bantu yankaka lenda banga na ntangu bau kesamuna ti nkuluntu yina kele na ngikana. Yau yina, bantangu yankaka, nsyamisa lenda vanda mbote kuluta ndongisila. Na ntangu yandi kefidisa bansamuni to bapasudi-nzila na kulonguka Biblia ti muntu, bau lenda zola nde yandi tambwisa muntu yango. Yai lenda vanda mutindu ya kuyikamisa bau ti mwa bampila ya kutomisa mitindu na bau ya kulonga.

¹⁴ Bankengi-ntambudi ya kikesa kevumbulaka kikesa na bantu yankaka. Nkengi ya nzyunga mosi na Ouganda nungaka na kutambula ngunga mosi na kati ya mfinda ya kukangama sambu na kufidisa mpangi bakala mosi na kulonguka Biblia ti muntu yina vandaka kuyela fyotifyoti. Na ntangu bau vandaka kutambula, mvula nokaka ngolo kibeni na mpila nde bau kumaka ya kupola kibeni. Ntangu dibuta ya bantu sambanu zabaka nde nzenza na bau vandaka nkengi-ntambudi, bau yitukaka mingi kibeni. Bau zabaka nde bansadi ya dibundu na bau lendaka kumonisa ve ata fyoti dikebi ya mutindu yina na kibuka. Na Lumingu yina landaka, bau kwendaka mbala ya ntete na lukutakanu mpi bau monisaka nsatu ya kukuma Bambangi ya Yehowa.

¹⁵ Na mbanza mosi ya Mexique ya Oaxaca, nkengi ya nzyunga mosi salaka kikesa mosi yina yandi tudilaka kibeni ve ntima. Yandi bongisaka sambu na kuvanda na suku mosi ya boloko bampimpa iya sambu na kutala kibuka mosi ya bantu ya boloko sambanu yina kukumaka bansamuni ya Kimfumu. Yandi fidisaka bantu ya boloko yai bilumbu mingi na ntangu bau vandaka kuta kimbangi suku na suku mpi kulonguka Biblia ti bantu. Sambu na mpusa ya kumonisamaka, kulonguka ya Biblia yankaka landaka mbote tii na mpimpa. Nkengi ya nzyunga yai ya kikesa kesonika nde: “Na nsuka ya vizite, bantu ya boloko ti mono kuwaka kyese mingi kibeni bonso mbutu ya kupesana nsyamisa.”

¹⁶ Bankengi-ntambudi kemekaka na kuvanda bantu ya kesyamisaka. Ntangu Polo talaka mabundu na Masedonia, yandi ‘syamisaka bau na bangogo mingi.’ (Bisalu 20:​1, 2) Bangogo ya nsyamisa lenda sadisa mingi na kutwadisa baleke ti bambuta na balukanu ya kimpeve. Na biro ya filiale mosi ya nene ya la Société Watch Tower, mfimpa ya dibaku mosi kusongaka nde bankengi-ntambudi syamisaka bantu ya luzolo ya mbote penepene na 20 na kati ya nkama sambu na kusala kisalu ya ntangu yonso. Na mbandu na yandi ya mbote bonso nsamuni ya Kimfumu ya ntangu yonso, nkento ya nkengi-ntambudi kumonisaka mpi nde yandi kele nto ya nsyamisa.

¹⁷ Minunu ti myoyo ya kunyokwama kele kibeni na mfunu ya nsyamisa. Nkengi ya nzyunga mosi ya mununu kesonika nde: “Mutindu ya kisalu na mono yina kebutaka kyese mingi kibeni na kati ya ntima kele dibaku yina ya kupesa lusadisu na bantu yina kesalaka dyaka ve ti bantu yina ngolo memanaka na nitu na kati ya kibuka ya Nzambi. Bangogo ya Roma 1:​11, 12 kele na disongidila ya mfunu mingi sambu na mono, mutindu mono kebaka nsyamisa mpi ngolo mingi na ntangu mono ‘kepesa mwa dikabu ya kimpeve na bantu ya mutindu yina sambu bau kuma ngolo.’ ”

Bansendo ya Kisalu na Bau ya Kyese

¹⁸ Bankengi-ntambudi ketulaka dikebi ya kuluta ngolo na bankundi bankwikidi. Bau kezolaka kupesa kikesa na mabundu mpi kutunga yau na kimpeve. (Bisalu 15:41) Nkengi mosi ya nzyunga kesalaka ngolo “na kusyamisa, na kulembika, mpi na kuyedisa nsatu ya kulungisa kisalu mpi ya kulanda kusadila kyeleka.” (3 Yoane 3) Yankaka kesosaka kupesa ngolo na lukwikilu ya bankundi bankwikidi. (Kolosai 2:​6, 7) Beno zaba mbote nde nkengi-ntambudi kele “nkundi ya kyeleka ya vangu,” (NW) mfumu ve na zulu ya lukwikilu ya bantu yankaka. (Filipi 4:3; 2 Korinto 1:24) Kukwisa na yandi kele dibaku sambu na nsyamisa ti kisalu ya ngika, ye mpi dibaku sambu nde kimvuka ya bankuluntu kutalulula kuyela ya mesalama mpi kutadila balukanu ya makwisa. Na bangogo na yandi ti mbandu, bansamuni ya dibundu, bapasudi-nzila, bansadi ya kisalu, mpi bankuluntu lenda tula kivuvu ya kutungama mpi ya kupusama sambu na kisalu yina kele na ntwala. (Fwanisa ti 1 Tesalonika 5:11.) Sambu na yau, beno simba bavizite ya nkengi ya nzyunga na ntima ya mvimba, mpi beno baka mpenza mambote ya kisalu yina nkengi ya distrike kesalaka.

¹⁹ Bankengi-ntambudi ti bankento na bau kebakaka bansendo mingi sambu na kisalu na bau ya kwikama, mpi bau lenda tula ntima nde Yehowa tasambula bau sambu na mambote yina bau kesala. (Bingana 19:17; Efezo 6:⁠8) Georg ti Magdalena kele bankwelani ya minunu yina mesalaka bamvula mingi na kisalu ya kutambula. Na lukutakanu mosi ya distrike na Luxembourg, muntu mosi yina Magdalena telaka kimbangi bamvula 20 na ntwala finamaka na yandi. Mpusa ya kyeleka ya nkento yai ya Muyuda kuvumbulamaka na mukanda ya Biblia yina Magdalena kubikilaka yandi, mpi nswalu mpenza yandi bakaka mbotika. Mpangi-nkento mosi ya kimpeve, yina yibukaka kukwisa na yandi na nzo na yandi bamvula penepene na 40 meluta, finamaka na Georg. Kuzabisa na yandi ya nsangu ya mbote na kyese nataka nsukansuka yandi ti bakala na yandi na kundima kyeleka. Mfunu ya kutuba kele ve, Georg ti Magdalena vandaka na kyese mingi kibeni.

²⁰ Kisalu ya kubuta mbuma mingi yina Polo salaka na Efezo natilaka yandi kyese mpi mbala yankaka yau pusaka yandi na kuvutukila bangogo ya Yezu nde: “Kiese ya kuluta mingi ke vandaka na kupesa, kansi na kubaka kiese ke vandaka fioti.” (Bisalu 20:35) Sambu kisalu ya kutambula kelombaka kupesa ntangu yonso, bayina kesalaka yau kezwaka kyese, mingimingi na ntangu bau kekwisaka kuzaba mbutu ya mbote ya kisalu na bau. Nkengi mosi ya nzyunga yina sadisaka nkuluntu mosi ya kulemba zabisamaka mutindu yai na mukanda mosi: “Nge vandaka ‘nsyamisi’ ya nene na luzingu na mono ya kimpeve​—⁠kuluta yina nge zaba. . . . Nge tabika kuzaba ve inki kiteso nge sadisaka Asafi ya bilumbu yai, yina ‘makulu na yandi zolaka kuvila nzila.’ ”​—⁠Kolosai 4:11; Nkunga 73:⁠2.

²¹ Mukristu mosi ya mununu yina salaka bamvula mingi na kisalu ya nzyunga kezolaka kuyindula 1 Korinto 15:​58, kisika Polo kelongisila nde: “Beno vanda ngolo, beno vanda bonso bantu yina lenda bwa ve. Beno kudipesa ntangu yonso na kisalu ya Mfumu . . . , sambu beno zaba nde konso kisalu ya Mfumu ya beno ke salaka yo kele ya mfunu.” Bankengi-ntambudi kevandaka ntangu yonso ti mambu mingi ya kusala na kisalu ya Mfumu. Mpi ntonda ya inki mutindu beto kele na yau na mpila bau kesala na kyese mingi bonso bakapita ya kwikama ya bumbote ya Yehowa yina beto mefwana ve na kubaka!

[Footnote]

[Study Questions]

1, 2. (a) Inki mutindu nge lenda tendula ngogo “kapita”? (b) Banani mekotisama na kati ya bakapita yina Nzambi kesadilaka?

3. Sambu na inki bankengi-ntambudi lenda bingama “bakapita ya mbote”?

4. Inki ngyufula tatadilama ntangu yai?

5, 6. Sambu na inki kutula ntima na Yehowa na kati ya kisambu kele mfunu mingi na luzingu ya nkengi-ntambudi?

7. Inki mutindu bukatikati kevandaka mfunu na kisalu ya nkengi-ntambudi?

8. Sambu na inki kulonguka ya Biblia, kusosa, mpi kuyindulula kele mfunu?

9. Sambu na inki bankuluntu-ntambudi kele na mfunu ya kuditula na kisika ya muntu yankaka?

10. Inki bankengi ya nzyunga ti ya distrike tubaka na yina metala kuvanda ya kudikulumusa, mpi inki mbandu Yezu bikaka sambu na dyambu yai?

11. Na ntangu yau kele mfunu, inki kulomba ndolula lenda buta?

12. Sambu na inki kikesa sambu na kisalu ya Mukristu kele mfunu mingi?

13. Inki nkengi-ntambudi ketadilaka na ntangu yandi kesala ti nkundi Mukristu na kisalu ya bilanga?

14. Sambu na inki yau lenda tubama nde bankengi-ntambudi ya kikesa kevumbulaka kikesa na bantu yankaka?

15. Inki eksperiansi ya mbote nkengi ya nzyunga mosi kuzwaka na Mexique?

16. Sambu na inki yau kenataka mpenza mambote na ntangu bankengi-ntambudi ti bankento na bau kepesa kikesa?

17. Inki mutindu nkengi ya nzyunga mosi kekudiwaka na yina metala dibaku na yandi ya kupesa lusadisu na bantu yankaka?

18. Inki balukanu ya Masonuku bankengi-ntambudi kele na yau?

19, 20. Inki mutindu bankengi-ntambudi ti bankento na bau mebakaka bansendo sambu na kisalu na bau ya kwikama?

21. Sambu na inki nge lenda tuba nde 1 Korinto 15:58 kesadilama na bisalu ya bankengi-ntambudi?

[Caption on page 1]

[Noti]

[Caption on page 1]

[Bangyufula]

[Caption on page 15]

[Ntendula ya Bifwanisu ya lutiti 15]

Bankengi-ntambudi kesosaka kusyamisa bankundi bankwikidi

[Caption on page 16]

[Ntendula ya Bifwanisu ya lutiti 16]

Baleke ti bambuta mpi lenda baka mambote yina kekatukaka na kinduku ti bankengi-ntambudi mpi bankento na bau

[Caption on page 17]

[Ntendula ya Bifwanisu ya lutiti 17]

Kisalu ya kikesa ya nkengi-ntambudi kematisaka kikesa na bantu yankaka

[Caption on page 1]

Inki Mutindu Nge Talenda Kuvutula?

◻ Sambu na inki bankengi-ntambudi lenda bakama bonso “bakapita ya mbote”?

◻ Inki mwa mambu yina kesadisaka nkengi ya nzyunga ti ya distrike na kusala mambu mingi ya mbote?

◻ Sambu na inki kudikulumusa ti kikesa kele mfunu mingi sambu na bayina kesalaka kisalu ya kutambula?

◻ Inki balukanu ya mbote bankengi-ntambudi kevandaka na yau?