Kuzinga na Kuzitisa Kudipesa ya Mukristu na Kimpwanza
“Kisika mpeve ya Mfumu kele, bantu kele kuna bo ke na dipanda.”—2 KORINTO 3:17.
1. Bambangi ya Yehowa mekudipesaka na nani, ye sambu na inki bau kesadilaka bimvuka ya nsiku kezabaka?
BAMBANGI YA YEHOWA kekwikilaka nde dibundu na bau tazinga mvula na mvula. Yau yina bau kevandaka dezia na mabanza ya kusadila Nzambi mvula na mvula “na mpeve mpi na kyeleka.” (Yoane 4:23, 24, NW) Bonso bantu ya kele ti dipanda ya kusala luzolo na bau, Bakristu yai mekudipesaka mvimba na Yehowa Nzambi mpi mesilaka na kuzinga na kuzitisaka yau. Bau ketulaka ntima na Ndinga ya Nzambi ti na mpeve santu na yandi sambu na kulungisa lusilu yina. Ntangu bau kelanda nzila ya kudipesa na bau ya ntima ya mvimba na kimpwanza ya Nzambi mepesaka bau, Bambangi kezitisaka kisalu ya “bamfumu ya leta” mpi kesadilaka bamwaye ti bangidika ya nsiku kezabaka. (Roma 13:1; Yakobo 1:25) Mu mbandu, Bambangi ya Yehowa kesadilaka la Société Watch Tower bonso kisadilu ya nsiku kezabaka—mosi na kati ya bimvuka ya kuswaswana na bansi mingi—na mpila nde yau sadisa bau na kulungisa kisalu ya kusadisa bantu, mingimingi na mambu ya kimpeve. Kansi, Bambangi mekudipesaka na Nzambi, na bimvuka yai ve, ye kudipesa na bau na Yehowa tazinga mvula na mvula.
2. Sambu na inki Bambangi ya Yehowa kezolaka mingi la Société Watch Tower ti bimvuka yankaka ya mutindu mosi?
2 Bonso bansadi ya mekudipesaka na Nzambi, Bambangi ya Yehowa fwete landa bantuma ya Yezu pesaka na ‘kukumisa bantu yonso balonguki, kubotika bo na zina ya Tata ti ya Mwana ti ya [m]peve-[s]antu, mpi kulonga bo.’ (Matayo 28:19, 20) Kisalu yai talanda tii kuna nsuka ya ngidika ya bima, sambu Yezu tubaka mpi nde: “Bo ta longaka Nsangu yai ya Mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo. Ebuna na nima, nsuka . . . ta kwisa.” (Matayo 24:3, 14) Konso mvula, binyeminu ya mikanda ya la Société Watch Tower, ti bimvuka ya mutindu mosi ya nsiku kezabaka, kebasisaka mafunda ya Bablia, mikanda, tumikanda, ti bazulunalu sambu na kusadisa Bambangi ya Yehowa na kisalu na bau ya kusamuna na ntoto ya mvimba. Yau yina, bimvuka ya mutindu yai kele mfunu mingi sambu na kusadisa bansadi ya mekudipesaka na Nzambi na kuzinga na kuzitisa kudipesa na bau na yandi.
3. Inki ntendula Bambangi ya Yehowa pesaka ntetentete na ngogo “la Société”?
3 Muntu yankaka lenda tuba nde ve, mutindu Bambangi ketubaka sambu na la Société Watch Tower—to mbala mingi “la Société” mpamba—kemonisa nde bau kebakaka yau ve kaka bonso kisadilu ya nsiku kezabaka. Keti bau kepesaka yau ve kiyeka ya kuluta mingi na mambu ya lusambu? Mukanda Les Témoins de Jéhovah : Prédicateurs du Royaume de Dieu ketemuna dyambu yango ti ntendula yai: “Ntangu Nzozulu ya Nkengi [ya Kingelesi, Yuni 1, 1938] tubilaka ‘La Société,’ yau tubilaka ve kaka kisadilu ya nsiku kezabaka, kansi kimvuka ya Bakristu ya kupakulama yina salaka yau mpi kesadilaka yau.”a Yau yina, la Société kele kimvuka ya “mpika ya kwikama mpi ya mayele.” (Matayo 24:45, NW) Yai kele ntendula ya Bambangi ya Yehowa pesaka ntetentete na ngogo “la Société.” Kansi, beto lenda sadila ve ngogo “la Société” na kisika ya ngogo “mpika ya kwikama mpi ya mayele.” Bantwadisi ya la Société Watch Tower keponamaka na eleksio, kansi Bambangi yina ketunga kimvuka ya ‘mpika ya kwika,’ Yehowa muntu kepakulaka bau ti mpeve santu.
4. (a) Inki Bambangi mingi ketubaka sambu na kukatula mavwanga na mutindu ya kubakisa? (b) Sambu na inki beto fwete vanda na bukatikati na yina metala bangogo?
4 Sambu mavwanga kuvanda ve na mutindu ya kubakisa, Bambangi ya Yehowa kekebaka ntangu bau ketubaka. Na kisika ya kutuba nde, “la Société kelongaka nde,” Bambangi mingi kezolaka kutuba nde, “Biblia ketuba nde” to, “mono zaba nde Biblia kelonga nde.” Na mutindu yai, bau kemonisaka nde Mbangi na Mbangi zengaka yandi mosi na kundima malongi ya Biblia. Yau kekatulaka mpi ngindu yonso ya mbi ya lenda monisa nde Bambangi kelandaka malongi ya kadibundu mosi na kingolongolo. Ya kyeleka, bangogo fwete kuma ve mambu ya kutudila bantembe. Na kutuba ya mbote, bangogo kevandaka mfunu kaka kana yau kekatula mpimpa sambu bantu kubakisa mambu. Bakristu fwete monisa bukatikati. Biblia kekebisa beto na “kunwana ve sambu na bangogo.” (2 Timoteo 2:14, 15, NW) Masonuku kepesa mpi munsiku yai: “Nki mutindu muntu lenda bakisa beno kana beno ke tuba na bandinga yina ya bantu kuzaba ve?”—1 Korinto 14:9.
Mpeve ya Nzambi Kefyotunaka Mfunu ya Bansiku
5. Inki mutindu beto fwete bakisa 1 Korinto 10:23?
5 Polo tubaka nde: “ ‘Beto ke na nswa ya kusala konso mambu yina ya beto zola!’ E, kansi mambu yonso ve kele ya mbote.” Yandi yikaka nde: “ ‘Beto ke na nswa ya kusala konso mambu yina ya beto zola’—kansi mambu yonso ve lenda sadisa beto.” (1 Korinto 10:23) Na ntembe ve, Polo tubaka ve nde beto kele na nswa ya kusala mambu yina ya Ndinga ya Nzambi kebuya pwelele. Bansiku ya pwelele ya ketwadisa luzingu ya Bukristu kele ndambu na kufwanisa ti bansiku 600 yina Nzambi pesaka na Izraele ya ntama. Yau yina, na mambu mingi, yau kelombaka nde kansansa ya muntu na muntu kuzenga. Muntu yina mekudipesaka na Yehowa kele na kimpwanza yina kekatukaka na lutwadisu ya mpeve ya Nzambi. Sambu kyeleka mekotilaka yandi, Mukristu kelandaka kansansa na yandi ya kulongama na Biblia mpi ketulaka ntima na lutwadisu ya Nzambi na nzila ya mpeve santu. Yau kesadisaka Mukristu na kuzaba mambu ya “mfunu” ti mambu ya “lenda sadisa” yandi ti bantu yankaka. Yandi kebakisaka nde banzengolo na yandi tatunga to tafwa kinduku na yandi ti Nzambi yina yandi mekudipesaka.
6. Na balukutakanu ya Bukristu, inki mutindu beto lenda monisa nde kyeleka mekotilaka beto?
6 Mukristu kemonisaka nde kyeleka mekotilaka yandi na kupesaka bamvutu na balukutakanu ya Bukristu. Na luyantiku, yandi lenda tanga mambu mutindu yau mesonama na mukanda ya bau kelonguka. Kansi, na nima, yandi tayela mpi takuma kutuba malongi ya Biblia na bangogo na yandi mosi. Pana yandi tamonisa nde yandi ke na kuyedisa ndenda na yandi ya kuyindula, kansi yandi ketubulula ve ntangu yonso mambu ya bankaka meyita kutuba. Kutuba bangindu na bangogo na yandi mosi, ti kutuba bangogo ya sikisiki ya kyeleka mutindu yau kele na ntima na yandi, tanata yandi na kusepela mpi yau tamonisa nde yandi mosi mpenza mendima yau na mabanza na yandi.—Longi 12:10; fwanisa ti Roma 14:5b.
7. Inki banzengolo bansadi ya Yehowa mebakaka na luzolo na bau mosi?
7 Kima kepusaka Bambangi ya Yehowa kele zola sambu na Nzambi mpi sambu na bantu yankaka. (Matayo 22:36-40) Ya kyeleka, zola bonso yina ya Yezu monisaka mevukisaka bau na kati ya kimpangi mosi ya inza ya mvimba. (Kolosai 3:14; 1 Piere 5:9) Kansi bonso bantu ya kele ti dipanda ya kusala luzolo na bau, muntu na muntu mesilaka na kusamuna nsangu ya mbote ya Kimfumu ya Nzambi, na kukota ve makambu ya politiki, na kubuya menga, na kusala ve bansaka yankaka, mpi na kulanda bansiku ya Biblia. Muntu mosi ve kepusaka bau na kubaka banzengolo yai. Yau kele banzengolo ya kewakana ti luzingu mosi ya bau solaka na ntwala na kulanda na luzolo na bau, ntangu bau mekuma ntete Bambangi mpi mekudipesa ve.
Keti Bantu Tasamba na Ntwala ya Nto-Kimvuka?
8. Inki ngyufula beto fwete tendula?
8 Biblia kemonisa pwelele nde Bakristu ya kyeleka kesadilaka ve Nzambi na kingolongolo. Yau ketuba nde: “Mfumu kele Mpeve; ebuna konso kisika ya [m]peve ya Mfumu kele, bantu kele kuna bo ke na dipanda.” (2 Korinto 3:17) Kansi, inki mutindu beto lenda wakanisa dyambu yai ti ngindu ya “mpika ya kwikama mpi ya meyele” ti Nto-Kimvuka na yau?—Matayo 24:45-47, NW.
9, 10. (a) Inki mutindu beto lenda sadila munsiku ya kimfumu na dibundu ya Bukristu? (b) Inki lombamaka sambu na kulanda munsiku ya kimfumu na dibundu ya Bukristu ya mvu-nkama ya ntete?
9 Sambu na kupesa mvutu na ngyufula yai, beto fwete vila ve munsiku ya kimfumu na Masonuku. (1 Korinto 11:3) Na Efezo 5:21-24, Kristu kebingama “mfumu ya Dibundu,” ye dibundu “ke lemfukaka” na yandi. Bambangi ya Yehowa kuzaba nde mpika ya kwikama mpi ya mayele kele kimvuka ya bampangi ya kimpeve ya Yezu. (Baebreo 2:10-13) Nzambi meponaka kimvuka ya mpika yai ya kwikama sambu na kupesa bantu na yandi “madya [ya kimpeve] na ntangu ya mbote.” Na ntangu yai ya nsuka, Kristu metulaka mpika yai “na zulu ya bima na yandi yonso.” Yau yina, muntu yonso yina ketuba nde yandi kele Mukristu fwete zitisa kiyeka ya mpika yai.
10 Lukanu ya kimfumu na dibundu kele sambu na kulunda bumosi mpi kuyidika na mpila nde ‘mambu yonso kusalama na nzila ya mbote ti ya luzitu.’ (1 Korinto 14:40) Sambu mambu kusalama mutindu yai na mvu-nkama ya ntete, kimvuka mosi ya Bakristu ya kupakulama na ndonga ya mpika ya kwikama mpi ya mayele ponamaka na kutwadisa kimvuka ya mvimba. Mutindu yau monanaka na mambu ya kulandaka, Yehowa ndimaka mpi sakumunaka lutwadisu ya nto-kimvuka ya mvu-nkama ya ntete. Bakristu ya mvu-nkama ya ntete ndimaka ngidika yina na kyese yonso. Ee, bau yambaka yau mpenza mpi vutulaka ntonda sambu na mambu ya mbote ya yau salaka.—Bisalu 15:1-32.
11. Inki mutindu beto fwete tadila Nto-Kimvuka ya ntangu yai?
11 Ngidika ya mutindu yina kele kaka ti mfunu. Bilumbu yai, Nto-Kimvuka ya Bambangi ya Yehowa mesalama na Bakristu ya kupakulama kumi, muntu na muntu na kati na bau mesalaka bamvu-kumi mingi na kisalu ya Bukristu. Bau kepesaka lutwadisu ya kimpeve na Bambangi ya Yehowa, mutindu nto-kimvuka ya mvu-nkama ya ntete vandaka kusala. (Bisalu 16:4) Mutindu mosi ti Bakristu ya ntete, Bambangi ketulaka ntima na kyese yonso na bampangi ya kuyela ya Nto-Kimvuka sambu na kuzwa lutwadisu ya Biblia na makambu ya lusambu. Ata bantu ya Nto-Kimvuka kele bampika ya Yehowa ti Kristu, mutindu mosi ti bampangi na bau Bakristu yankaka, Biblia kelonga beto nde: “Beno lemfuka na bambuta na beno ya Dibundu, beno wila bo mpi. Bo ke langidilaka moyo na beno, sambu bo fweti futa rapore na Nzambi sambu na kisalu na bo. Kana beno ke lemfukila bo, bo ta sala kisalu na bo na kiese; kana mpidina ve, bo ta sala kisalu na bo na mawa, ebuna mambu ya mutindu yina ta sadisa beno ve ata fioti.”—Baebreo 13:17.
12. Konso Mukristu tasamba na ntwala ya nani?
12 Keti kisalu ya kinkengi yina Masonuku kepesa na Nto-Kimvuka kemonisa nde konso Mbangi ya Yehowa fwete samba na meso na yau sambu na bisalu na yandi? Ve, kana beto tadila bangogo ya Polo sonikilaka Bakristu ya Roma: “Sambu na nki nge ke tongaka [“sambisaka,” NW] mpangi na nge? Mpi nge, sambu na nki nge ke vwenzaka mpangi na nge? Beto yonso, beto ta telama na meso ya Nzambi sambu yandi sambisa beto. . . . Konso muntu na kati na beto ta samba na meso ya Nzambi sambu na mambu na yandi mosi.”—Roma 14:10-12.
13. Sambu na inki Bambangi ya Yehowa kepesaka lapolo ya kisalu na bau ya kusamuna?
13 Kansi, keti ya masonga yau kelombamaka nde konso Mbangi kupesa lapolo ya kisalu na yandi ya kusamuna? Ee, ye mukanda mosi ya Bambangi ketendula pwelele kikuma ya lapolo yango mutindu yai: “Balandi ya ntete ya Yezu Kristu vandaka na kyese ya kupesa lapolo ya kuyela ya kisalu ya kusamuna. (Marko 6:30) Ntangu kisalu kekwenda na ntwala, bau vandaka sala lapolo na kupesaka bantalu mpi na kutaka masolo ya kitoko ya bayina vandaka samuna nsangu ya mbote. . . . (Bisalu 2:5-11, 41, 47; 6:7; 1:15; 4:4) . . . Yau vandaka pesa kikesa mingi mpenza na bansadi Bakristu ya kwikama yina na kuwa balapolo ya kisalu yina vandaka salama! . . . Mutindu mosi, organizasio ya Yehowa na bilumbu yai kesalaka ngolo na kupesa lapolo mosi ya sikisiki ya kisalu ya kesalamaka na kulungisa Matayo 24:14.”
14, 15. (a) Inki mutindu beto lenda sadila 2 Korinto 1:24 sambu na Nto-Kimvuka? (b) Inki kesadisaka Mukristu mosi mosi na kubaka banzengolo, na kundimaka inki dyambu?
14 Nto-Kimvuka kele ngidika mosi ya zola mpi mbandu mosi ya kwikama ya beto lenda landa. (Filipi 3:17; Baebreo 13:7) Na mutindu ya bau kendimaka mpi kelandaka mbandu ya Kristu, bau lenda tuba bonso Polo nde: “Beto ke songa beno na ngolo ve mambu yina ya beno fweti kwikila, sambu beno ke na lukwikilu ya ngolo. Kansi beto ke zola kusala ti beno sambu na kiese na beno.” (2 Korinto 1:24) Na kutala mutindu mambu kesalama, Nto-Kimvuka kebendaka dikebi na beto na mambote ya beto lenda baka na kulandaka ndongisila ya Biblia, yau kepesaka beto bangindu na mutindu ya kusadila bansiku ti minsiku ya Biblia, yau kekebisaka beto na bigonsa ya kubumbana, mpi yau kepesaka na beto bantu ya ‘kesalaka ti bo,’ kikesa ya beto kele na yau mfunu. Na mutindu yina, yau kelungisaka kinkengi na yau ya Bukristu, mpi kesadisaka beto na kulunda kyese na beto mpi ketungaka lukwikilu na beto na mpila nde beto vanda ngolo.—1 Korinto 4:1, 2; Tito 1:7-9.
15 Kana Mukristu mebaka nzengolo na kulandaka bandongisila ya Biblia yina Nto-Kimvuka kepesaka, yandi kebakaka yau na luzolo na yandi mosi sambu kulonguka na yandi ya Biblia mendimisaka yandi nde yai kele nzila ya mbote. Kele Ndinga ya Nzambi kepusaka konso Mbangi na kusadila bandongisila ya mbote ya Masonuku yina Nto-Kimvuka kepesaka, na kuzabaka mbotembote nde banzengolo ya yandi kebaka talunda to tafwa kinduku na yandi mosi ti Nzambi yina yandi kudipesaka.
Balongoki mpi Basoda
16. Ata nzengolo ya ndyatilu kele nzengolo ya muntu na muntu fwete baka, sambu na inki bau kebasisaka bantu yankaka na dibundu?
16 Kana yau kele nde muntu na muntu kebakaka nzengolo sambu na ndyatilu na yandi, sambu na inki bau kebasisaka Bambangi ya Yehowa yankaka na dibundu? Muntu mosi ve kezengaka na ntu na yandi nde disumu yai to yai kele ya kubasisila muntu na dibundu. Kansi, Masonuku ketuma kaka na kubasisa muntu ya dibundu yina kesala masumu ya nene, bonso yina kele na Korinto ya ntete kapu 5. Yau yina, ata bau lenda basisa Mukristu na dibundu sambu yandi mesala pite, yau kesalamaka kaka kana yandi mebuya lusadisu ya bangungudi ya zola. Bambangi ya Yehowa mpamba ve bantu kelandaka ntuma yai ya Bukristu. Mukanda mosi (The Encyclopedia of Religion) ketuba nde: “Konso kimvuka kekuditaninaka sambu kana bantu ya ntu-ngolo kele na kati, bau lenda kotisa mavwanga na kimvuka. Na lusambu, nswa yai kele na ngolo ya kuluta, sambu bantu kekwikila nde ndola yai [ya kubasisa muntu na dibundu] kebebisaka kinduku ya muntu ti Nzambi.”
17, 18. Inki mutindu nge lenda monisa nde muntu lenda basisama na dibundu na kusadilaka mbandu (a) ya ngidika ya nzo-nkanda? (b) ya kimvuka ya basoda?
17 Bambangi ya Yehowa kele balongoki ya Biblia. (Yozue 1:8; Nkunga 1:2; Bisalu 17:11) Programe ya kulonga Biblia ya Nto-Kimvuka kepesaka lenda fwanisama ti programe ya nzo-nkanda ya bamfumu ya ndongolo kesalaka. Ata kisina ya malongi ya fwete longama kele bantu yankaka, bamfumu yai kesalaka programe, kezabisaka mutindu ya kulonga, mpi kepesaka bantuma ya mfunu. Konso longoki yina kesala ntu-ngolo na kulanda bantuma ya nzo-nkanda, kenatila balongoki yankaka mavwanga, to kebebisa lukumu ya nzo-nkanda, bau lenda kula yandi. Bamfumu ya ndongolo kele na nswa ya kusala buna sambu na kulunda mambote ya balongoki yonso.
18 Bambangi ya Yehowa kele balongoki kaka ve, bau kele basoda ya Yezu Kristu, bau kele ti ntuma ya ‘kunwana ngolo sambu na lukwikilu.’ (1 Timoteo 6:12; 2 Timoteo 2:3) Kana muntu kekwamina na kusala mambu yina ya basoda ya Kristu kesalaka ve, Nzambi lenda buya yandi. Bonso muntu ya kele na kimpwanza ya kusola, soda ya Kristu lenda baka nzengolo yina yandi mezola, kansi malanda ya nzengolo na yandi tavanda na ntu na yandi. Polo keyindula mutindu yai: “Soda yina ke sala kisalu na yandi, yandi lenda kota ve na mambu yina ke tadila kisalu na yandi ve, kana yandi zola nde mfumu na yandi kubaka yandi bonso soda ya mbote. Muntu yina ke salaka bansaka, yandi lenda nunga ve kana yandi ke landaka bansiku ya bansaka ve.” (2 Timoteo 2:4, 5) Bakristu ya kuyela, kumosi ti bayina kele na Nto-Kimvuka, kebikalaka mvimba na kiyeka ya Ntwadisi na bau, Yezu Kristu, na kulandaka “bansiku” sambu bau nunga na kubaka nsendo ya luzingu ya mvula na mvula.—Yoane 17:3; Kusonga 2:10.
19. Mutindu beto metendula kyeleka ya kudipesa ya Mukristu, inki dyambu beto lenda ndima?
19 Keti kyeleka yai yonso kemonisa ve pwelele nde Bambangi ya Yehowa kele bansadi ya Nzambi, kansi bampika ya bantu ve? Bonso Bakristu ya kudipesa ya kele na kimpwanza ya Yezu mepesaka bau, bau kebikisaka mpeve ya Nzambi ti Ndinga na yandi kuyala luzingu na bau ntangu bau kesala kumosi ti bampangi na bau na kati ya dibundu ya Nzambi. (Nkunga 133:1) Banzikisa ya dyambu yai fwete katula mpi ketiketi yonso na yina metala nto ya ngolo na bau. Bau lenda yimba kumosi ti muyimbi-bankunga nde: “Mfumu Nzambi ke kebaka mono, yandi ke taninaka mono, mono ke tulaka yandi ntima. Yandi me sadisa mono, yo yina mono kele kiese, mono ke yimba bankunga na kukumisa yandi.”—Nkunga 28:7.
[Noti na nsi ya lutiti]
a Mukanda ya Watchtower Bible and Tract Society of New York, Inc. basisaka na 1993.
Inki Mutindu Nge Tapesa Mvutu?
◻ Inki mutindu la Société Watch Tower ti bimvuka yankaka ya mutindu mosi kesadisaka Bambangi ya Yehowa?
◻ Inki mutindu Bakristu kezwaka mambote ya kisalu ya Nto-Kimvuka ya Bambangi ya Yehowa?
◻ Sambu na inki bantu ya Yehowa kepesaka lapolo ya kisalu na bau ya kusamuna?
◻ Inki ntangu yau kevandaka mbote na kubasisa Mukristu ya kudipesa na dibundu?
[Kifwanisu ya kele na lutiti 16]
Nto-kimvuka ya mvu-nkama ya ntete lundaka bumosi ya malongi
[Kifwanisu ya kele na lutiti 19]
Na inza ya mvimba, Bambangi ya Yehowa kesepelaka na kimpwanza yina Yezu pesaka bau na kukatulaka bau na kimpika