“Yo Lungisaka Mpusa Yina Kuvandaka na Ntima na Mono”

NTANGU Mbangi ya Yehowa mosi kubakaka mukanda ya mpa ya balutiti 320 yina kubasikaka na Lukutakanu ya Distrike ya mvu 2002/03 yina kuvandaka na ntu-dyambu, “Bansamuni ya Kikesa ya Kimfumu,” yandi tubaka nde: “Mu kepesa beno matondo na ntima na munu ya mvimba sambu na dikabu yai ya kitoko Approchez-vous de Jéhovah. Yo lungisaka mpenza mpusa yina kuvandaka na ntima na munu: Mpusa ya kudiwa nde Yehowa kezolaka munu. Ntangu yai mu kekudiwa nde mu mekuma mpenza penepene ti Yehowa mpi ti Mwana na yandi ya yandi kezolaka mingi. Mu kezola kutubila konso muntu mambu yina kele na mukanda yai mpi kupesa yo na bantu yonso yina mu kezolaka.” Bika beto tadila mwa mambu yina kele na mukanda yai ya mpa mpi bikuma ya bo basisilaka yo.

Mwa Mambu Yina Kele na Mukanda Yai ya Mpa

Inki mambu mukanda yai ya mpa ketubila? Yo ketubila mambu yonso yina kele na masolo zole ya kulonguka yina kele na nimero yai, ti mambu yankaka mingi! Mukanda yango kele ti bakapu 31, konso kapu kele nda bonso disolo mosi ya kulonguka ya Nzozulu ya Nkengi. Na nima ya bangogo ya luyantiku mpi bakapu tatu ya ntete, mukanda yai kele ya kukabisa na bitini iya, konso kitini ketubila kikalulu mosi ya mfunu ya Yehowa. Konso kitini keyantika ti bangogo yina ketendula na bunkufi kikalulu yina yo ketubila. Ndambu ya bakapu yina kelanda na konso kitini ketubila mutindu Yehowa kemonisaka kikalulu yango. Konso kitini kele ti kapu mosi ya ketubila Yezu. Sambu na inki? Yezu kutubaka nde: “Muntu yina me mona mono yandi me mona mpi Tata.” (Yoane 14:9) Sambu yandi kele kifwani ya kukuka ya Yehowa, Yezu kepesa beto bambandu ya mbote mpenza yina kemonisa mutindu yandi sadilaka bikalulu ya Nzambi. Kapu ya nsuka ya konso kitini kelonga beto mutindu ya kulanda mbandu ya Yehowa na kumonisa kikalulu ya beto ketadila. Mukanda yai ya mpa tapesa nge kyese na kuzaba nde ntangu yo ketadila bikalulu ya Yehowa, yo ketubila mikanda yonso ya Biblia.

Mukanda Approchez-vous de Jéhovah kele mpi ti mambu yankaka mingi ya mfunu. Yantika na Kapu ya 2, konso kapu kele ti lupangu yina kele ti ntu-dyambu “Bangindu ya Kuyindulula.” (Éléments de méditation) Lukanu ya baverse ti bangyufula ya bo metula kele ve ya kusadila mvutukila ya kapu. Kansi, bo metula yo sambu na kusadisa nge na kusadila Biblia sambu na kuyindulula disolo yango na mudindu. Tanga mbotembote konso verse. Na nima, yindulula dyambu yina ngyufula ketubila, mpi sala ngolo na kusosa kuzaba mutindu nge lenda sadila yo. Kuyindulula ya mutindu yai lenda pesa nge kyese mingi na ntima, yo lenda sadisa nge na kukwenda penepene mpenza ti Yehowa.​—Nkunga 19:14.

Bo yidikaka mbotembote bifwanisu ya mukanda Approchez-vous de Jéhovah na mpila nde yo longa mpi yo pusa bantu na kisalu. Bakapu kumi na nsambwadi kele ti bifwanisu ya kitoko ya kebaka lutiti ya mvimba yina kemonisa mambu yina kele na Biblia.

Sambu na Nki Bo Basisaka Yo?

Sambu na nki bo basisaka mukanda Approchez-vous de Jéhovah? Lukanu ya ntete ya mukanda yai ya mpa kele ya kusadisa beto na kuzaba Yehowa mbotembote na mpila nde beto sala bangwisana ya kuluta ngolo ti Nzambi na beto.

Keti nge lenda yindula muntu yankaka yina lenda bakila mukanda Approchez-vous de Jéhovah mambote, mu mbandu longoki mosi ya Biblia to nkutu mpangi mosi Mukristu ya bakala to ya nkento yina kebasikaka dyaka ve na kisalu ya bilanga? Ebuna nge mosi, keti nge meyantikaka na kutanga mukanda yai ya mpa? Kana ve, sambu na nki nge sala ve programe sambu na kuyantika kutanga yo sesepi yai? Baka ntangu ya kuyindula mambu ya nge ketanga. Bika nde mukanda yai kusadisa nge na kukwenda penepene mpenza ti Yehowa Nzambi, na mpila nde nge zabisa nsangu ya mbote ya Kimfumu na yandi ti kyese mpi ti kikesa ya kuluta mingi!