Sambu na Nki Beto Fwete Zaba Mbeni ya Kristu?

Banda ntama, mpeve ya Nzambi kupusaka ntumwa mosi na kusonika nde: “Beno me waka nde mbeni ya Kristo fweti kwisa.” (1 Yoane 2:18) Bangogo yai kebenda dikebi na beto mpenza! Bantu kesosaka ntendula ya bangogo yai banda bamvu-nkama mingi. Nani kele mbeni ya Kristu? Inki ntangu yandi kwisaka? Inki mbeni yango tasala ntangu yandi takwisa?

BANDA bamvula mingi, bo kebingaka bantu mingi nde mbeni ya Kristu. Na ntangu ya ntama, bantu yina bo vandaka kubinga nde “mbeni ya Kristu” kuvandaka Bayuda, bapape ya Katolika, mpi bantotila ya Roma. Mu mbandu, ntangu Ntotila Frederick II (1194-1250) kubuyaka kuvukana na bitumba yina kubasikaka na dibundu, Pape Gregory IX kubingaka yandi nde mbeni ya Kristu mpi kukulaka yandi na dibundu. Innocent IV yina kuyingaka Gregory, kukulaka yandi mpi. Na mvutu na yandi, Frederick kutubaka nde Innocent kele mbeni ya Kristu.

Na Biblia ya mvimba, kaka ntumwa Yoane muntu kusadilaka bangogo yai “mbeni ya Kristu.” Na mikanda zole yina kele na zina na yandi, yandi sadilaka bangogo yina mbala tanu, na ntalu-bumosi mpi na ntalu-bumbidi. Baverse yina kele ti bangogo yango ke na lupangu yina kele na lutiti ya kelanda. Na nsadisa ya baverse yai beto kebakisa nde mbeni ya Kristu kele muntu ya luvunu mpi mukusi, yina kele ya kuyilama sambu na kubebisa bangwisana ya muntu ti Kristu mpi ti Nzambi. Yo yina, ntumwa kusyamisaka bampangi na yandi Bakristu nde: “Bampangi na mono ya mono ke zolaka, beno ndima ve bantu yonso ke tubaka nde bo ke na mpeve ya Nzambi, kansi ntete beno fweti bakisa kana mpeve yina me katuka na Nzambi. Sambu baprofete mingi ya luvunu me panzanaka na bandambu yonso ya nsi-ntoto.”​—1 Yoane 4:1.

Yezu mpi kukebisaka balongoki na yandi sambu na bakusi, to baprofete ya luvunu. Yandi tubaka nde: ‘Bo takwisila beno, bo tamonikaka bonso mameme, kansi na ntima na bo bo kele bonso bankoi. Beno tabakisa bo na mambu yina ya bo tasalaka.’ (Matayo 7:15, 16) Keti Yezu vandaka kukebisa balongoki na yandi sambu na mbeni ya Kristu ya kifwani? Beto tadila mutindu beto lenda zaba mukusi yai ya kuluta mbi.