Kwikama na Nge Kesepedisaka Ntima ya Yehowa
“Mwana na mono, vanda mayele, ebuna mono ta mona kiese; mpidina konso muntu yina ta tonga mono, mono ta zaba kupesa yandi mvutu.”—BING. 27:11.
1, 2. (a) Mukanda ya Yobi ketubila nki ntembe yina Satana kubasisaka? (b) Inki mambu kemonisa nde Satana kulandaka kutonga Yehowa na nima ya bilumbu ya Yobi?
YEHOWA kupesaka Satana nzila ya kumeka kwikama ya nsadi na yandi Yobi. Yo yina, Yobi kuvidisaka bitwisi na yandi, bana na yandi kufwaka, mpi yandi vandaka dyaka ve ti mavimpi ya mbote. Kansi, ntangu Satana kutulaka ntembe na kwikama ya Yobi, yandi vandaka kuyindula kaka Yobi ve. Satana kutubaka nde: “Muntu lenda bikisa bima yonso ya yandi ke na yo kansi moyo na yandi ve.” Dyambu yai kubasisaka ntembe yina kutadilaka kaka Yobi ve kansi mpi bantu yankaka, mpi ntembe yina landaka tii na nima ya lufwa ya Yobi.—Yobi 2:4.
2 Kiteso ya bamvula 600 na nima ya bampasi ya Yobi, Salomo kusonikaka na ngolo ya mpeve santu nde: “Mwana na mono, vanda mayele, ebuna mono ta mona kiese; mpidina konso muntu yina ta tonga mono, mono ta zaba kupesa yandi mvutu.” (Bing. 27:11) Yo kele pwelele nde tii na ntangu yina, Satana vandaka kaka kutula ntembe na Yehowa. Dyaka, ntumwa Yoane kumonaka na mbonameso Satana kefunda bansadi ya Nzambi, disongidila na nima ya kutulama ya Kimfumu ya Nzambi na mvu 1914 ntangu fyoti na nima ya kukula Satana na zulu. Ata bubu yai, ya bilumbu ya nsuka ya ngidika yai ya mbi mekuma mpenza na nsuka, Satana kelanda kaka na kutula ntembe na kwikama ya bansadi ya Nzambi.—Kus. 12:10.
3. Inki malongi ya mfunu beto lenda baka na mukanda ya Yobi?
3 Yo yina, bika beto tadila malongi tatu ya mfunu ya beto kebaka na mukanda ya Yobi. Ya ntete, bampasi ya Yobi kemonisa beto nani kele mbeni ya kyeleka ya bantu mpi kisina ya kimbeni yina bantu ya Nzambi kekutanaka na yo. Mbeni yango kele Satana Dyabulu. Ya zole, kuvanda ti bangwisana ya mbote ti Nzambi tasadisa beto na kutanina kwikama na beto, ata nki bampasi yina beto lenda kutana ti yo. Ya tatu, ntangu bampasi kebwilaka beto mpi beto kemekamaka na mutindu mosi buna, Nzambi kesadisaka beto mutindu yandi sadisaka Yobi. Bubu yai, Yehowa kesadisaka beto na nzila ya Ndinga na yandi, organizasio na yandi, mpi mpeve santu na yandi.
Kuvila Ve Nani Kele Mbeni ya Kyeleka
4. Nani kele na kisina ya mambu ya keluta na nsi-ntoto bubu yai?
4 Bantu mingi kekwikilaka ve nde Satana kele. Yo yina, ata bo lenda kudiyangisa na yina metala mambu ya kesalama na nsi-ntoto, bo keswasukisaka ve kisina ya kyeleka, disongidila Satana Dyabulu. Ya kyeleka, bantu bo mosi kele na kisina ya bampasi mingi yina bo kekutanaka ti yo. Bibuti na beto ya ntete, Adami ti Eva, kuponaka na kutambula kukonda lutwadisu ya Ngangi na bo. Yo yina, banda ntangu yina bantu kesalaka mambu na buzoba yonso mpenza. Ata mpidina, Dyabulu muntu kukusaka Eva na kukolama na Nzambi. Yandi muntu kuyedisaka, na kati ya bantu ya kukonda kukuka mpi ya kekwenda na nsuka, ngidika mosi ya kele na nsi ya kiyeka na yandi. Sambu Satana kele “nzambi” ya ngidika yai ya bima, bantu kemonisa bikalulu yina mefwanana ti ya yandi, disongidila lulendo, kukonda kuwakana, kimpala, mavwanga, luvunu, mpi kukolama. (2 Kor. 4:4; 1 Tim. 2:14; 3:6; tanga Yakobo 3:14, 15.) Bikalulu ya mutindu yai menataka kukonda kuwakana na kati ya bantu ya politiki ti ya mabundu, yika mpi kimbeni, luvunu, mpi mavwanga, ebuna yo mesalaka nde bantu kukuma na mpasi mingi.
5. Inki beto kezola kusala ti nzayilu ya mfunu yina beto kele na yo?
5 Beto bansadi ya Yehowa kele na nzayilu ya mfunu mpenza! Ya kyeleka, beto mezaba nani kele na kisina ya mambu ya kebeba na nsi-ntoto. Yo yina, keti yo kepusa beto ve na kusala kisalu ya kusamuna sambu na kuzabisa bantu na kubakisa nani kele mbeni ya kyeleka? Keti beto kele ve na kyese na kuvanda na lweka ya Nzambi ya kyeleka, Yehowa, mpi kutendudila bantu yankaka nki mutindu yandi tafwa Satana mpi tatula nsuka na bampasi ya bantu?
6, 7. (a) Nani kele na kisina ya mbangika yina bansambidi ya kyeleka kekutanaka ti yo? (b) Inki mutindu beto lenda landa mbandu ya Elihu?
6 Satana kele kaka ve na kisina ya mambu mingi yina kesalama na nsi-ntoto ya kepesa bantu mpasi, kansi yandi kele mpi na kisina ya kimbeni yina bantu ya Nzambi kekutanaka ti yo. Yandi kele ti lukanu ya kumeka beto. Yezu Kristu kutubilaka ntumwa Piere nde: “Simoni, Simoni! Wa! Satana me baka nswa ya kumeka beno.” (Luka 22:31) Kiteso mosi, konso muntu na kati na beto yina kelanda bitambi ya Yezu takutana ti bampasi na mutindu mosi buna. Piere kufwanisaka Dyabulu ti “ntambu yina ke dila; [ya] ke sosa muntu ya kudia.” Mpi Polo kutubaka nde: “Bantu yonso yina ke zolaka kulemfuka na Nzambi na kimvuka ti Yesu Kristo, bo ta monisaka bo mpasi.”—1 Pie. 5:8; 2 Tim. 3:12.
7 Inki mutindu beto lenda monisa nde beto kevila ve nani kele mbeni ya kyeleka ntangu mpasi mebwila mpangi Mukristu mosi? Na kisika ya kutina mpangi yina, beto tasala bonso Elihu, yina kusolulaka ti Yobi bonso nduku ya kyeleka. Beto tasadisa mpangi na beto na kunwana mvita ti Satana yina kele mbeni na beto yonso. (Bing. 3:27; 1 Tes. 5:25) Lukanu na beto tavanda ya kusadisa mpangi na beto na kulanda kutanina kwikama na yandi, ata nki bampasi yandi lenda kutana ti yo, ebuna yandi tasepedisa ntima ya Yehowa.
8. Sambu na nki Satana kunungaka ve na kupusa Yobi na kuyambula kukumisa Yehowa?
8 Kimvwama ya ntete ya Yobi yina Satana kuvidisaka kuvandaka bitwisi na yandi. Bitwisi yina kuvandaka mfunu mingi, ziku yo vandaka bima na yandi ya kuzingila. Kansi, Yobi vandaka mpi kusadila yo sambu na lusambu. Na nima ya kukatula mbi ya bana na yandi na meso ya Nzambi, “Yobi vandaka kutelama na suka-suka ti kubinga bana na yandi sambu na kukatula mbi na bo na meso ya Nzambi; yandi pesilaka konso mwana na yandi makabu ya kuyoka ya mvimba konso ntangu sambu yandi vandaka kuyindula nde mbala ya nkaka ke na mwana mosi me finga Nzambi na ntima na yandi.” (Yobi 1:4, 5) Yo yina, Yobi vandaka kupesa Yehowa bimenga ya bambisi konso ntangu. Ntangu bampasi kubwilaka yandi, mpila ya kupesa bimenga kuvandaka dyaka ve. Yobi kuvandaka ve na “makabu ya bima ya mbote mpenza” yina yandi lendaka kukumisila Yehowa. (Bing. 3:9) Kansi, yandi lendaka kukumisa Yehowa ti bikobo na yandi, mpi yandi salaka yo mpenza!
Yedisa Bangwisana ya Ngolo ti Yehowa
9. Inki kima meluta mfunu na luzingu na beto?
9 Yo vanda beto kele bamvwama to bansukami, batoko to bambuta, ata beto kele na mavimpi ya mbote to ya mbi, beto lenda yedisa bangwisana ya ngolo ti Yehowa. Kana beto kekutana ti bampasi ya nki mutindu, kuvanda na bangwisana ya ngolo ti Nzambi tasadisa beto na kutanina kwikama na beto mpi na kusepedisa ntima ya Yehowa. Ata bantu yankaka yina kuvandaka ve ti nzayilu ya mingi ya metala kyeleka kubikalaka kaka ngolo mpi kutaninaka kwikama na bo.
10, 11. (a) Inki mutindu mpangi na beto mosi ya nkento kusalaka ntangu kwikama na yandi kumekamaka? (b) Inki mvutu ya mbote mpangi-nkento yina kupesaka Satana?
10 Beto tadila mbandu ya mpangi-nkento Valentina Garnovskaya, mosi na kati ya Bambangi mingi ya Yehowa ya bwala Russie, bayina kutaninaka kwikama na bo ata na bampasi ya ngolo bonso Yobi muntu ya kwikama. Na mvu 1945, ntangu yandi vandaka na bamvula kiteso ya 20, mpangi mosi ya bakala kuzabisaka yandi nsangu ya Kimfumu. Mpangi yina ya bakala kuvutukilaka yandi mbala zole sambu na kusolula ti yandi mambu ya metala Biblia, kansi na nima Valentina kumonaka yandi dyaka ve. Ata mpidina, Valentina yantikaka kuzabisa nsangu ya Kimfumu na bamfinangani na yandi. Yo yina, bo kangaka yandi mpi bo zengilaka yandi nkanu ya bamvula nana na kan mosi ya mpasi. Na mvu 1953, bo basisaka yandi, mpi kukonda kusukinina yandi vutukilaka kisalu na yandi ya kusamuna. Bo kangaka yandi dyaka mpi kutulaka yandi na boloko, ntangu yai sambu na bamvula kumi. Na nima ya kusala bamvula mingi na kan mosi, bo nataka yandi na kan yankaka. Na kan yango, yo vandaka ti bampangi yankaka ya bankento yina kuvandaka ti Biblia. Kilumbu mosi, mpangi-nkento mosi kusongisaka Valentina Biblia. Yo vandaka ntangu mosi ya kyese mpenza! Yindula fyoti, banda yandi monaka Biblia na mbala ya ntete na maboko ya mpangi-bakala yina kuzabisaka yandi nsangu ya Kimfumu na mvu 1945, yandi monaka dyaka ve Biblia yankaka!
11 Na mvu 1967, Valentina kubasikaka na boloko mpi nsukansuka yandi monisaka kidimbu ya kudipesa na yandi na Yehowa na mbotika ya masa. Yandi sadilaka kimpwanza na yandi na kikesa yonso sambu na kusala kisalu ya kusamuna tii na mvu 1969. Kansi, na mvula yai, bo kangaka yandi dyaka, mpi bo zengilaka yandi nkanu ya bamvula tatu na boloko. Ata bo kangaka yandi, Valentina vandaka kaka kusamuna. Na ntwala nde yandi fwa na mvu 2001, yandi sadisaka bantu 44 na kulonguka kyeleka. Yandi lutisaka bamvula 21 na baboloko mpi na bakan ya mpasi. Na luzolo yonso, yandi ndimaka na kuyambula bima yonso, tanga mpi kimpwanza na yandi, sambu na kutanina kwikama na yandi. Na nsuka ya luzingu na yandi, Valentina kutubaka nde: “Mu vandaka ve ti kisika ya kuzingila. Bima na munu yonso kuvandaka na valize mosi mpamba, kansi mu vandaka na kyese mpenza na kusadila Yehowa.” Yai kele mvutu mosi ya mbote Valentina kuvutudilaka Satana, yina kutubaka nde bantu tabikala ve ya kwikama na Nzambi na ntwala ya bampasi! (Yobi 1:9-11) Beto lenda ndima nde, Valentina kusepedisaka ntima ya Yehowa mpi nde Yehowa kevingila na kyese yonso ntangu yina yandi tavutula Valentina ti bantu yonso yankaka yina mefwaka ya kwikama na luzingu na nzila ya lufutumuku.—Yobi 14:15.
12. Inki kele mfunu ya zola na bangwisana na beto ti Yehowa?
12 Bangwisana na beto ti Yehowa mesimbama na zola na beto sambu na yandi. Beto kesepelaka na bikalulu ya Nzambi mpi kesalaka konso kima yina beto lenda sala sambu na kuzinga na kuwakana ti balukanu na yandi. Na kuswaswana ti mambu yina Satana kutubaka, beto kezolaka Yehowa na luzolo yonso mpi kukonda kuvingila nde yandi vutudila beto kima na nima. Zola yai ya masonga kepesaka beto ngolo ya kutanina kwikama na beto na ntangu ya mumekamu. Ebuna, Yehowa ‘tatala mbote bantu yina kekudipesaka na yandi.’—Bing. 2:8; Nk. 97:10.
13. Inki mutindu Yehowa ketadilaka mambu yina beto kesalaka sambu na yandi?
13 Zola kepusaka beto na kukumisa zina ya Yehowa, ata beto keyindula nde beto lenda sala mingi ve. Yandi ketalaka bikuma na beto ya mbote mpi kesambisaka beto ve kana beto lenda sala ve mambu yonso yina beto kezola kusala. Kima ya mfunu na meso na yandi kele kaka ve mambu ya beto kesalaka, kansi mpi sambu na nki beto kesalaka yo. Ata Yobi kuvandaka na mawa ya ngolo mpi kukangaka mpenza ntima, yandi tubilaka bantu yina kufundaka yandi na yina metala zola na yandi sambu na banzila ya Yehowa. (Tanga Yobi 10:12; 28:28.) Na kapu ya nsuka ya mukanda ya Yobi, Nzambi kumonisilaka Elifazi, Bildadi, mpi Sofare makasi na yandi sambu bo tubaka ve kyeleka. Kaka na ntangu yina, Yehowa kumonisaka nde yandi ndimaka Yobi na mutindu yandi bingaka yandi mbala iya “nsadi na munu” mpi kuzabisaka yandi na kusamba sambu na banduku na yandi yina ya luvunu. (Yobi 42:7-9, NW) Bika nde beto mpi kusala mambu na mutindu yina tasala nde Yehowa kundima beto.
Yehowa Kesadisaka Bansadi na Yandi ya Kwikama
14. Inki mutindu Yehowa kusadisaka Yobi na kusungika mabanza na yandi?
14 Ata yandi vandaka muntu ya kukonda kukuka, Yobi kutaninaka kwikama na yandi. Bantangu yankaka, na nsi ya mpasi ya ngolo, yandi tadilaka ve mambu na mutindu ya mbote. Mu mbandu, yandi tubaka na Yehowa nde: “Mono ke binga nge kansi nge ke ndima ve. . . . Nge ke monisa mono mpasi na ngolo na nge yonso.” Dyaka, Yobi kutulaka dikebi mingi na kudinungisa yandi mosi ntangu yandi tubaka nde: “Mono salaka ka mono mbi ve,” mpi dyaka nde “mono salaka ka mono mbi ve, mono mpi vandaka kusamba Nzambi na ntima ya mbote.” (Yobi 10:7; 16:17; 30:20, 21) Ata mpidina, Yehowa kusadisaka Yobi na mawete yonso na kuyulaka yandi bangyufula ya kulandana yina kusadisaka yandi na kutula ve dikebi na yandi mosi. Yo sadisaka mpi Yobi na kumona pwelele nde Nzambi meluta nene mpi nde muntu lenda fwanana ve ti yandi. Yobi kundimaka lutwadisu mpi kusungikaka mabanza na yandi.—Tanga Yobi 40:8; 42:2, 6.
15, 16. Na nki mitindu Yehowa kepesaka bansadi na yandi lusadisu bubu yai?
15 Bubu yai, Yehowa kepesaka mpi bansadi na yandi lutwadisu ti bandongisila na mawete mpi na sikisiki yonso. Dyaka, beto kebakilaka yo mambote mingi. Mu mbandu, Yezu Kristu kupesaka nkudulu ya kimenga mpi na nzila na yo beto kebakaka ndolula ya masumu. Na nzila ya kimenga yina, beto lenda vanda na bangwisana ya ngolo ti Nzambi ata beto kele bantu ya kukonda kukuka. (Yak. 4:8; 1 Yoa. 2:1) Ntangu beto kekutanaka ti bampasi, beto kesambaka mpi sambu na kulomba lusadisu ti ngolo ya mpeve santu ya Nzambi. Dyaka, beto kele ti Biblia na mvimba na yo, mpi kana beto ketanga mpi keyindulula mambu yina ke na kati na yo, beto kekudibongisaka sambu na mimekamu ya lukwikilu. Kulonguka kesadisaka beto na kubakisa bantembe ya metala luyalu ya luyalanganu ya mvimba mpi kwikama ya konso muntu.
16 Dyaka, beto kebakaka mambote mingi sambu beto kele na kimvuka ya bampangi ya nsi-ntoto ya mvimba, yina Yehowa kepesaka madya ya kimpeve na nzila ya “mpika ya kwikama mpi ya mayele.” (Mat. 24:45-47, NW) Na konso dibundu na kati ya mabundu kiteso ya 100 000 ya Bambangi ya Yehowa, balukutakanu kesalamaka ya kelongaka beto mpi ya kepesaka beto ngolo na kunwana ti mambu yina lenda meka lukwikilu na beto. Dyambu yai kemonana na mambu yina kukuminaka Sheila, Mbangi mosi ya leke ya kezingaka na Allemagne, ya kuvandaka ti bamvula 15.
17. Tubila mayele ya kukangama mpenza na malongi yina organizasio ya Yehowa kepesa bubu yai.
17 Kilumbu mosi, Sheila kuvandaka na nzo-nkanda mpi longi na bo kuvandaka ve sambu na mwa ntangu fyoti. Banduku na yandi ya nzo-nkanda kubakaka lukanu ya kumeka kusadila planchette oui-ja (kamwa tablo mosi yina kele na kuwakana ti bampeve ya mbi ya bo kesadilaka sambu na kuzaba makwisa.) Na mbala mosi, Sheila kubasikaka na nzo-nkanda, mpi ntangu yandi waka mambu yina kusalamaka na nima, yandi waka kyese na mpila yandi basikaka. Ntangu bana yango yantikaka kusadila kamwa tablo yina, bankaka na kati na bo kuwaka nde bademo mekwisa na kati ya nzo-nkanda ebuna bo tinaka na boma yonso. Kansi, nki kusadisaka Sheila na kubaka lukanu ya kukatuka na nzo-nkanda kukonda kusukinina? Yandi ketendula nde: “Mwa ntangu fyoti na ntwala nde mambu yai kusalama, beto longukaka na lukutakanu na Nzo ya Kimfumu bigonsa ya kusadila tablo ya oui-ja. Yo yina mu zabaka dyambu ya mu lendaka kusala. Mu vandaka ti luzolo ya kusepedisa Yehowa, kaka mutindu Biblia ketubaka na Bingana 27:11.” Yo vandaka mbote mpenza mutindu Sheila kuvandaka na lukutakanu mpi kuwidikilaka manaka na dikebi kibeni!
18. Inki lukanu nge mebaka?
18 Bika nde konso muntu na kati na beto kubaka lukanu ya kukangama na malongi ya beto kebakaka na organizasio ya Nzambi. Beto kebakaka lutwadisu mpi lusadisu yina beto kele na yo mfunu na kukwendaka mbala na mbala na balukutakanu, na kutangaka Biblia, na kulongukaka mikanda yina ketendulaka Biblia, na kusambaka mpi na kuvukanaka ti Bakristu ya kuyela. Yehowa kezola nde beto nunga, mpi yandi ketula ntima nde beto talanda na kuvanda ya kwikama. Beto kele ti dibaku ya kukumisa zina ya Yehowa, ya kutanina kwikama na beto, mpi ya kusepedisa ntima ya Yehowa!
Keti Nge Keyibuka?
• Satana kele na kisina ya nki bampasi?
• Beto kele ti nki kima ya mfunu?
• Bangwisana na beto ti Yehowa mesimbamaka na nki?
• Tanga mwa mitindu yina Yehowa kepesaka beto lusadisu bubu yai.
[Kifwanisu ya kele na lutiti 15]
Beto lenda sadisa bampangi na beto Bakristu na kutanina kwikama na bo