Kusala Kumosi Kesadisaka na Kuyela na Kimpeve

KIKALULU ya kusala kumosi kele mfunu sambu na bantu yina kezola kusansa dibuta mosi ya kezolaka mambu ya kimpeve. Ntangu Yehowa kusalaka bankwelani ya ntete, yandi monisaka mfunu ya kusala kumosi. Yo lombaka nde Eva kusala kumosi ti Adami “sambu na kusadisaka yandi.” (Kuy. 2:18) Bakala ti nkento fwete sala kumosi mpi kusadisana. (Lo. 4:9-12) Sambu na kulungisa mukumba yina Yehowa mepesaka bibuti mpi bana, yo kelombaka mpi kusala kumosi.

Lusambu ya Dibuta

Barry ti Heidi kele ti bana tanu. Bo kemonaka nde kusala kumosi sambu na kulonguka Biblia na dibuta kesadisaka bo na kuyela. Barry ketendula nde: “Sambu na kulonguka Biblia na dibuta, mono kepesaka bana mikumba ya fyoti mbala na mbala. Mono lenda lomba bo na kuyidika mwa bakomantere ya mekatuka na masolo ya Réveillez-vous! Beto kemekaka mpi na ntwala mambu yina beto tatuba na kisalu ya bilanga na mpila nde konso mwana kuvanda ti bangogo ya kukotila na disolo.” Heidi keyika nde: “Beto yonso kevandaka ti listi ya balukanu ya kimpeve yina beto kezola kulungisa, mpi beto ketadilaka yo mbala na mbala na ntangu ya kulonguka ya dibuta sambu na kumona kuyela yina beto kesala.” Bankwelani yai kemonaka mpi nde kulutisa mbala na mbala bampimpa ya mvimba kukonda kutala televizio kepesaka dibuta ya mvimba dibaku ya kutanga.

Balukutakanu ya Dibundu

Mike ti Denise kusansaka bana iya. Inki mutindu dibuta na bo kubakaka mambote yina kekatukaka na kusala kumosi? Mike ketuba nde: “Bantangu yankaka ata manaka ya kuyidika mbotembote vandaka kununga ve, kansi beto monaka nde kusala kumosi kusadisaka beto na kukuma na balukutakanu na ntangu.” Denise ketendula nde: “Ntangu bana vandaka kuyela, konso mwana vandaka ti kisalu na yandi ya kusala na nzo. Kim, mwana na beto ya nkento, vandaka kusadisa na kulamba mpi kuyidika mesa.” Mwana na bo ya bakala Michael keyibuka nde: “Na Kizole na nkokila beto vandaka ti lukutakanu mosi ya dibundu na kati ya nzo na beto. Yo yina, beto vandaka kuyobisa suku, kusadila mashini sambu na kukatula mvindu na sima, mpi kuyidika bakiti.” Matthew, mwana yankaka ya bakala keyika nde: “Na bilumbu ya lukutakanu, papa vandaka kusala yonso na kwisa kuvutuka na ntwala na nzo, kana yandi mekatuka na kisalu, sambu na kubaka kisika ya ntete na kusadisa beto na kuyilama sambu na lukutakanu.” Inki bambuma yo butaka?

Bikesa Yonso Kele Mfunu

Mike ketuba nde: “Na mvu 1987, Denise ti mono beto yantikaka kusala bonso bapasudi-nzila. Na ntangu yina, bana tatu na kati ya bana na beto vandaka kuzinga dyaka na nzo. Zole na kati na bo kukumaka mpi bapasudi-nzila, mpi bankaka kusalaka bisalu ya kutunga banzo ya Betele. Dibuta na beto kubakaka kyese mingi dyaka sambu beto kukaka kusadisa bantu 40 na kudipesa mpi na kubaka mbotika. Dibuta na beto ya mvimba kuvandaka mpi ti dibaku ya kusala kisalu ya kutunga banzo, ata nkutu na bansi ya nzenza.”

Ya kyeleka, bikesa yonso yina dibuta kesala sambu na kusala kumosi kele mfunu. Keti nge lenda mona mitindu yankaka yina nge lenda sala kumosi ti bankaka na dibuta na nge? Nge lenda ndima nde kuvanda ti kikalulu ya kusala kumosi tasadisa dibuta na nge na kuyela dyaka na kimpeve.

[Kifwanisu ya kele na lutiti 28]

Kumeka na ntwala mambu yina beto tatuba na kisalu ya bilanga kesadisaka na kuyela