NIMERO YA KULONGUKAKA

Kana beto ke yindulula na balusakumunu yina Yehowa me pesaka beto mpi ke pesa yandi mersi, beto lenda yedisa mpi kutanina kikalulu ya kumonisila yandi ntonda. Kikalulu yango ta swaswanisa beto ti bantu yina ke monisaka ve ntonda mpi yo ta sadisa beto na kununga bampasi. Mukapu na beto ya mvula sambu na mvu 2015 ta yibusa beto kikalulu yai na mvula ya mvimba.

Disolo yai ke monisa pwelele kikuma yina beto fwete sala Lusungiminu ya lufwa ya Yezu. Yo ke pesa ntendula ya dimpa mpi ya vinu yina beto ke sadilaka na Lusungiminu, mpi ke tendula mutindu muntu lenda zaba nde yandi me fwana na kudia dimpa mpi kunwa vinu. Disolo yai ta sadisa beto mpi na kuzaba mutindu ya kudibongisa sambu na Madia ya Nkokila ya Mfumu.

Bankwelani ke kutanaka ti bampasi mpi mimekamu mingi. Kansi, ti lusadisu ya Yehowa, bo lenda vanda ti bangwisana ya ngolo mpi makwela ya kiese. Na disolo ya ntete, beto ta tubila makunzi tanu ya kimpeve yina ta sadisa bankwelani na kutunga makwela ya ngolo, yina ta zinga luzingu na bo ya mvimba; beto ta tubila mpi dikunzi yina ke simbaka makunzi yina ya nkaka. Na disolo ya zole, beto ta tubila mutindu ya kukumisa binwaninu ya kimpeve ngolo na kati ya makwela.

Zola ya kieleka na kati ya bankwelani ke tendula nki? Keti bankwelani lenda landa na kuzolana luzingu na bo ya mvimba? Inki mutindu bo lenda monisa zola ya mutindu yai? Baka malongi yina Mukanda ya Kitoko ke pesa na yina me tala zola ya kieleka.