“Beno Keba nde Muntu Mosi Ve Kukumisa Beno Bampika”!

1. Mutindu Bakolosai 2:4, 8 ke monisa yo, nki mutindu Satana ke sosaka kusoba mabanza na beto sambu beto kuma bampika na yandi?

SATANA ke zolaka ve beto sadila Yehowa. Sambu na kulungisa lukanu na yandi, yandi ke sosaka kusoba mabanza na beto sambu beto lemfukila yandi mpi beto kuma bampika na yandi. Yandi ke sadilaka bampusa na beto sambu na kundimisa mpi kukusa beto na kulanda yandi.—Tanga Bakolosai 2:4, 8.

2-3. (a) Sambu na nki beto fwete tula dikebi na lukebisu yina kele na Bakolosai 2:8? (b) Inki beto ta longuka na disolo yai?

² Keti luvunu ya Satana kele mpenza kigonsa sambu na beto? Ee. Zaba nde Polo sonikaka ve mambu ya kele na Bakolosai 2:8 sambu na mimpani. Yandi sonikilaka Bakristu yina bo me tulaka mafuta na nsadisa ya mpeve santu. (Bakol. 1:2, 5) Kana Bakristu yina vandaka na kigonsa na ntangu yina, beto kele na kigonsa ya nene bubu yai. (1 Bak. 10:12) Sambu na nki? Sambu bo me losaka Satana na ntoto mpi lukanu na yandi kele ya kukusa bansadi ya Nzambi. (Kus. 12:9, 12, 17) Diaka, beto ke zinga na ntangu yina bantu ya mbi mpi bantu ya luvunu ta sala “diaka mbi kuluta.”—2 Tim. 3:1, 13.

³ Disolo yai ta tubila mutindu Satana ke sadilaka ‘bangindu ya mpamba-mpamba’ sambu na kuyala mabanza na beto. Beto ta longuka mpi mitindu tatu ya ‘mayele na yandi ya mbi.’ (Baef. 6:11) Disolo yina ke landa ta tubila mutindu beto lenda pesa ve nzila nde mayele na yandi ya mbi kuyala mabanza na beto. Beto tadila ntete mutindu Satana kusaka bantu ya Izraele na Ntoto ya Lusilu mpi dilongi yina beto ta baka.

SATANA PUKUMUNAKA BANTU YA IZRAELE NA KUSAMBILA BITEKI

4-6. Na kutadila Kulonga 11:10-15, nki mutindu ya nkaka ya kusala bilanga bantu ya Izraele longukaka ntangu bo kotaka na Ntoto ya Lusilu?

⁴ Na mayele yonso, Satana kusaka bantu ya Izraele na kusambila biteki. Inki mutindu? Yandi sadilaka bampusa na bo ya kuzwa madia. Ntangu bantu ya Izraele kotaka na Ntoto ya Lusilu, yo lombaka nde bo soba mutindu ya kusala bilanga. Na Ezipte, bo vandaka kusadila masa ya Nile sambu na kulosa na bilanga. Kansi na Ntoto ya Lusilu sambu na kusala bilanga, yo lombaka nde bo sadila masa ya mvula to malulu na kisika ya kubaka masa na nzadi. (Tanga Kulonga 11:10-15; Yez. 18:4, 5) Yo yina, yo lombaka nde bantu ya Izraele kulonguka mitindu ya nkaka ya kusala bilanga. Yo vandaka pete ve sambu bantu mingi yina zabaka kusala bilanga fwaka na ntoto ya zelo na zelo.

⁵ Yehowa songaka bansadi na yandi nde luzingu na bo ta soba. Yandi pesaka diaka ndongisila yina vandaka kumonana bonso nde yo wakanaka ve ti kusala bilanga. Yandi tubaka nde: “Beno keba, beno bika ve nde bo pukumuna ntima na beno na kuvila nzila mpi kusambila banzambi ya nkaka mpi kufukimina bo.” (Kul. 11:16, 17) Ndongisila yango vandaka kutadila mutindu ya nkaka ya kusala bilanga kansi sambu na nki Yehowa kebisaka bo na kusambila ve banzambi ya luvunu?

⁶ Yehowa zabaka nde bantu ya Izraele ta longuka mitindu ya nkaka ya kusala bilanga na mimpani yina vandaka kuzinga na nziunga na bo. Ya kieleka, bantu yango zabaka kusala bilanga mbote kuluta bantu ya Izraele mpi bansadi ya Nzambi zolaka kulonguka mayele ya nkaka na bo kansi yo vandaka kigonsa. Bansadi-bilanga ya Kanana vandaka kutula ntima na Baale. Bo vandaka kukwikila nde Baale vandaka ngangi ya zulu mpi yandi muntu vandaka kunokisa mvula. Yehowa zolaka ve nde bansadi na yandi kukwikila na luvunu yai. Malembe-malembe bantu ya Izraele kumaka kusambila Baale. (Kut. 25:3, 5; Baz. 2:13; 1 Bant. 18:18) Tala mutindu Satana kumisaka bantu ya Izraele bampika.

BAMETODE TATU YA SATANA SADILAKA SAMBU NA KUKUMISA BANTU YA IZRAELE BAMPIKA

7. Inki mekaka lukwikilu ya bantu ya Izraele ntangu bo kotaka na Ntoto ya Lusilu?

⁷ Metode ya ntete yina Satana sadilaka vandaka mpusa na bo ya kumona mvula ke noka. Na Ntoto ya Lusilu, mvula vandaka kunoka mingi ve na nsuka ya ngonda ya Aprili tii na ngonda ya Septembri. Sambu bo zinga mbote mpi bima kubuta mingi na bilanga, bo vandaka kuvingila ngonda ya Oktobri. Satana kusaka bantu ya Izraele na kusala mambu yina mimpani ya vandaka kuzinga pene-pene na bo vandaka kusala sambu bima kubuta mingi. Mimpani yango vandaka kukwikila nde bo fwete sala binkulu ya nkaka sambu banzambi na bo kunokisa mvula. Bantu ya Izraele yina vandaka kukwikila diaka ve na Yehowa ndimaka nde yo kele mutindu ya mbote ya kutina musibu, yo yina bo vandaka kusala binkulu ya mimpani sambu na kusambila Baale.

8. Inki kele metode ya zole yina Satana sadilaka? Tendula.

⁸ Metode ya zole yina Satana sadilaka sambu na kukusa bantu ya Izraele vandaka bampusa ya mbi ya kuvukisa nitu. Mimpani yina vandaka kusala mansoni sambu na kusambila banzambi na bo. Lusambu yai ya mbi pusaka babakala ti bankento na kusala kindumba na tempelo. Bo vandaka kundima kuvukisa nitu babakala ti babakala to bankento ti bankento mpi mitindu ya nkaka ya mansoni. (Kul. 23:17, 18; 1 Bant. 14:24) Mimpani vandaka kukwikila nde kusala mambu yai vandaka kupusa banzambi na bo na kubasisa bima mingi na bilanga. Bantu mingi ya Izraele salaka mansoni yina mimpani vandaka kusala mpi bo kumaka kusambila banzambi ya luvunu. Ya kieleka, Satana kumisaka bo bampika.

9. Na kutadila Ozea 2:16, 17 nki mutindu Satana pusaka bantu ya Izraele na kuvila Yehowa?

⁹ Metode ya tatu yina Satana sadilaka vandaka kupusa bantu ya Izraele na kuvila Yehowa. Na bilumbu ya profete Yeremia, Yehowa tubaka nde baprofete ya luvunu pusaka bansadi na yandi na kuvila zina na yandi “sambu na Baale.” (Yer. 23:27) Yo monanaka nde bansadi ya Nzambi yambulaka kusadila zina ya Yehowa mpi kumaka kusadila zina ya Baale yina ke tendula “Munkwa” to “Mfumu.” Yo kumaka mpasi sambu bantu ya Izraele kuswaswanisa Yehowa ti Baale mpi bo kumaka kuvukisa lusambu ya Baale ti ya Yehowa.—Tanga Ozea 2:16, 17 mpi noti na nsi ya lutiti.

METODE YINA SATANA KE SADILA BUBU YAI

10. Inki mayele Satana ke sadilaka bubu yai?

¹⁰ Bubu yai, Satana ke sadilaka mayele ya mutindu mosi. Sambu na kukumisa bantu bampika, yandi ke sadilaka bampusa na bo, mansoni mpi ke pusaka bantu na kuvila Yehowa. Bika beto tubila ntete mayele yai ya nsuka.

11. Inki mutindu Satana pusaka bantu na kuvila Yehowa?

¹¹ Satana ke pusaka bantu na kuvila Yehowa. Na nima ya lufwa ya bantumwa ya Yezu, bantu ya nkaka yina vandaka kudibinga Bakristu yantikaka kulonga malongi ya luvunu. (Bis. 20:29, 30; 2 Bate. 2:3) Baaposta yai pusaka bantu na kuvila zina ya Nzambi ya kieleka. Mu mbandu, bo vandaka kusadila diaka ve zina ya Nzambi na Babiblia na bo mpi kumaka kusadila ngogo “Mfumu.” Ntangu bo katulaka zina ya Nzambi mpi yingisaka yo na “Mfumu,” yo kumaka mpasi sambu muntu ya ke tanga Biblia kuswaswanisa Yehowa ti “bamfumu” ya nkaka yina kele na Biblia. (1 Bak. 8:5) Bo vandaka kusadila kaka ngogo yina mosi, “Mfumu,” sambu na Yehowa mpi Yezu. Yo kumaka mpasi sambu na kubakisa nde Yehowa ti Mwana na yandi vandaka bantu zole ya kuswaswana. (Yoa. 17:3) Diambu yai basisaka dilongi ya Butatu, dilongi yina Ndinga ya Nzambi ke longaka ve. Yo yina, bantu mingi kumaka kumona nde Nzambi kele diswekamu mpi bo lenda zaba yandi ve. Yo kele mpenza luvunu!—Bis. 17:27.

12. Mutindu Baroma 1:28-31 ke monisa yo, dibundu ya luvunu ke siamisaka nki mambu mpi nki bampasi yo me nataka?

¹² Satana ke sadilaka bampusa ya mbi. Na Izraele ya ntama, Satana sadilaka dibundu ya luvunu sambu na kusiamisa pite. Yandi ke salaka mutindu mosi bubu yai. Dibundu ya luvunu ke ndimaka mpi ke siamisaka mansoni. Yo yina, bantu mingi yina ke kudibingaka bansadi ya Nzambi ke zitisaka ve minsiku na yandi ya bikalulu ya mbote. Na mukanda yina ntumwa Polo sonikilaka Bakristu ya Roma, yandi tubilaka bampasi yina bo kutanaka ti yo. (Tanga Baroma 1:28-31.) Mitindu yonso ya mansoni mpi ya kuvukisa nitu babakala ti babakala to bankento ti bankento kele na kati ya “mambu yina me fwana ve.” (Bar. 1:24-27, 32; Kus. 2:20) Yo kele mfunu kibeni nde beto zitisa malongi ya Biblia!

13. Inki mayele ya nkaka Satana ke sadilaka?

¹³ Satana ke sadilaka bampusa ya bantu. Beto ke butukaka ti mpusa ya kukuma mayele sambu yo sadisa beto na kulungisa bampusa na beto mpi ya mabuta na beto. (1 Tim 5:8) Mbala mingi, beto ke bakaka mayele yango na nzo-nkanda mpi kana beto ke kudipesa na kulonguka. Kansi beto fwete keba. Na bansi mingi banzo-nkanda ke longaka bantu filozofi mpi mayele yina ta sadisa bo. Bo ke siamisaka bana ya nzo-nkanda na kundima ve nde Nzambi kele mpi na kuzitisa ve Biblia. Bo ke longaka bo nde dilongi ya evolisio ke tendulaka mbote kisina ya luzingu ya bantu. (Bar. 1:21-23) Malongi yai ke wakanaka ve ti “mayele ya Nzambi.”—1 Bak. 1:19-21; 3:18-20.

14. Malongi ya filozofi ke siamisaka bantu na kusala nki?

¹⁴ Malongi ya filozofi ke ndimaka ve mpi ke zitisaka ve minsiku ya lunungu ya Yehowa. Yo ke siamisaka ve bantu na kuyedisa mbuma ya mpeve ya Nzambi kansi yo ke siamisaka “bisalu ya nitu.” (Bag. 5:19-23) Yo ke siamisaka lulendo mpi yo ke pusaka bantu na kuvanda “bantu ya ke kudizolaka.” (2 Tim. 3:2-4) Bikalulu yai ke wakanaka ve ti kudikulumusa, kikalulu yina bansadi ya Nzambi fwete vanda na yo. (2 Sam. 22:28) Bakristu ya nkaka yina me salaka banzo-nkanda ya nda me kumaka ti mabanza ya bantu na kisika ya kuvanda ti mabanza ya Nzambi. Bika beto tadila mbandu mosi.

15-16. Inki dilongi beto ke baka na mambu yina mpangi-nkento mosi kutanaka ti yo?

¹⁵ Mpangi-nkento mosi yina vandaka na kisalu ya ntangu yonso bamvula kuluta 15 ke tuba nde: “Ntangu mono bakaka mbotika, mono vandaka kutanga mpi kuwa bigonsa yina bo vandaka kutubila sambu na banzo-nkanda ya nda kansi mono vandaka kumona yo mpamba. Mono yindulaka nde bandongisila yina vandaka ve sambu na mono.” Inki bampasi yandi kutanaka na yo? Yandi ke tuba diaka nde: “Kulonguka vandaka kubaka mono ntangu mpi bikesa mingi na mpila nde mono vandaka kukuka ve kusamba Yehowa, kusamuna mpi kuyidika balukutakanu mutindu mono vandaka kusala ntete. Ntangu mono bakisaka nde nzo-nkanda bebisaka kinduku na mono ti Yehowa, mono zengaka yo.”

¹⁶ Nzo-nkanda ya nda pusaka mpangi-nkento yai na kuvanda ti mabanza ya nki mutindu? Yandi ke tuba nde: “Mono ke ndima nde nzo-nkanda pusaka mono na kuvweza bantu ya nkaka, mingi-mingi bampangi na dibundu, kulomba bo mambu mingi mpi kukangama ve ti bo. Yo bakaka ntangu mingi sambu mono yambula mabanza yai. Mambu yai longaka mono nde kubuya balukebisu yina Tata na beto ya zulu ke pesaka beto na nzila ya dibundu na yandi kele kigonsa. Yehowa ke zabaka mono mbote kuluta mono mosi. Yo lombaka nde mono wila Yehowa.”

17. (a) Inki fwete vanda lukanu na beto? (b) Inki beto ta longuka na disolo yina ke landa?

¹⁷ Baka lukanu ya kukuma ve mpika ya nsi-ntoto ya Satana “na nzila ya mayele ya nsi-ntoto mpi ya bangindu ya luvunu ti ya mpamba-mpamba.” Landa na kuditanina na mayele ya Satana. (1 Bak. 3:18; 2 Bak. 2:11) Kupesa ve Satana nzila ya kupusa nge na kuvila Yehowa. Zinga na kuwakana ti minsiku ya bikalulu ya mbote ya Yehowa. Kubika ve nde Satana kukusa nge na kubuya bandongisila ya Yehowa. Ebuna kana nge me bakisa nde mabanza ya nsi-ntoto ke yala nge, nki nge ta sala? Disolo yina ke landa ta monisa mutindu Ndinga ya Nzambi lenda sadisa beto na kuyambula bangindu yina “me kangamaka ngolo.”—2 Bak. 10:4, 5.