Beto Sambila Yehowa na Dibuta
1 Na ntangu ya ntama, bantu ya dibuta vandaka kusala mambu mingi kumosi. Bo vandaka kusala bisalu ya konso kilumbu kumosi, mpi kima ya kuluta mfunu kele nde bo vandaka kusambila Yehowa bo yonso na dibuta. (Levi 10:12-14; Kul. 31:12) Na bisika mingi bubu yai, bantu ya dibuta kesalaka mpenza ve mambu mingi kumosi. Kansi, Bakristu kebakisaka mfunu ya kusala bisalu na kimvuka na dibuta, mingimingi na mambu ya metala lusambu. Ntembe kele ve nde yo kepesaka mpenza Muntu yina kuyantikisaka dibuta kyese kana mabuta kesambila yandi na bumosi!
2 Beno Samuna Kumosi: Kusamuna nsangu ya mbote kumosi kevukisaka mpenza bantu ya dibuta. Yo yina, katula kusamuna ti bampangi yankaka ya dibundu, nkuluntu tasamunaka mpi mbala na mbala ti nkento mpi bana na yandi. (1 Tim. 3:4, 5) Ata bankengi-ntambudi kevandaka ti mambu mingi ya kusala, bo kebumbaka ntangu sambu na kusamuna ti bankento na bo.
3 Bibuti yina kesamunaka ti bana na bo kekukaka kusadisa bo na kuyela mpi na kukuma bansamuni. Bana tamona kaka ve kyese yina bibuti na bo kele na yo na kisalu ya kusamuna kansi bo tamona mpi mutindu bibuti na bo kemonisa zola na bo mosi sambu na Yehowa mpi sambu na nkweno. (Kul. 6:5-7) Bo kemonaka nde yo kele kaka mfunu na kusamuna kumosi ti bana na bo ata ntangu bana kekumaka bambuta. Tata mosi ti nkento na yandi yina bana na bo kele ti bamvula banda na 15 tii 21 kelandaka na kusamuna ti bo mbala na mbala. Tata kutubaka nde: “Konso ntangu beto kelongaka bo kima mosi. Mpi beto kesalaka yonso sambu yo vanda eksperiansi mosi ya mbote mpi ya kepesa kikesa.”
4 Beno Kudibongisa Kumosi: Mabuta kemonaka nde yo kele mfunu na kudibongisa kumosi sambu na kisalu ya kusamuna. Mbala mingi bana kesepelaka ntangu bo kesalaka bansonga ya kemonisa mutindu ya kusamuna; na bansonga yina bantu ya dibuta kesalaka bature ya kuvanda muntu yina keta kimbangi to munkwa-nzo. Mabuta yankaka kebakaka mwa minuta na nsuka ya kulonguka ya dibuta sambu na kusala yo.
5 Kyese na beto kekumaka mingi ntangu beto kesalaka bisalu ya mfunu mpi ya kepesaka kyese ti bantu yina beto kezolaka. Yo kele kyese mingi kana bantu ya dibuta kesamuna kumosi nzo na nzo, kesala bamvutukilu ya mpa, mpi kelonguka Biblia ti bantu! Kana nge kesambila Yehowa ti dibuta na nge, nge lenda tuba na kyese yonso nde: “Mono ti fami na mono beto ta sadilaka Mfumu Nzambi.”—Yoz. 24:15.